Isai30
1CHAKRAMANG tek mih,“Lai üa kürma mih chauüa kowh piakra nauang ting kown mih dow kramra uowi lai kowbow!Amatni dow sangkrangah kaneu hanow chang lup reng chekhai;tawkche ang kowh sangkrangra iawng nadowi.Amatni dow akeng pren hown chang auiua khai.Tawkchedow ang kowh lümla naukrang iawng nadowi.Naiawng hown amatni dow angak luk kowi angak thiaah büah khai.2Amatni dow ang tut-e paw prengia dowi matchang Aigupta pren kowi kowkowi khai,now Faraw tut-e kowlü tatung tanimra khai.3Tawkche Faraw tut-e hai Aiguptauüa nimkrüa kowitatung tanim mih rakowi naka rukrai büah kown.4Amatni kowh maru iukuüa hai ria mang miuüa dow Zoan marow kowi kowting khowk chowdiah,now Hanes marow kowi paw kowting büah khowk chowdiah.5Nachenganchepaw amatni bowkbowk naka rukrai kown.Tawngplawng kowchow panow Aiguptauüa dow amatni vüi tawngpaw mrawkra nauowi kown nadowi.Aiguptauüa mih amatni kowi tawng iawng paw naia khowngah kown nadowi,amatni kowi rukraira chowtaih napeah kown,” pakhai.6Mami dow Negeb kowi kowh kaurawng uaramchak hawmh lawnguan kowi CHAKRAMANG tekah mih laiklow chekhai:Ria mang miuüa mih krangsi hai akru uowima mih rua dawng kowikramra uowima mih pren iawng kowmang khai.Amatni dow amatni kowh dawngthawnguan mih kawrngaramchük luk kowi tangla khai,amatni kowh asung khakma mih uanh dow ut kumlawng kowi tangla khai,now amatni vüi tawngpaw mrawkra uowi dowi mih chenchap tut-e kowpawla büah khai.7Aigupta kowh khowngra dow tawngpaw asung uowi dowi chekhai.Naiawng rakowi aia kowh ming dow Rahab ang rük pe khai. (Rahab pami dow “Chowm phulu mih” pami chekhai).8Kawmat dow en mih huapher kowi hai chabowih kowi mami laiklow ruiah diah.Nami laiklow dow pur prakowi Israeluüa vüi chowngchowng saksakma mih saksi iawng pacham uowi lah.9Maiawngün maru-uüa dow kingküa dawma hai dailama chekhai;amatni dow CHAKRAMANG kowh laiklow sünta kown nau dowi.10Amatni dow khi mukmang miuüa kowi tek pe mih,“Hang khi mukmang büah tham bowt,” pakhai.Now risiuüa kowi tek pe büah mih,“Anowmma mih lai hauang tek anging tham bowt.Asowrma anging nauowila kown mih laiklow phai tek anging bowt;pur prakowi nauang ting kown mih lawnguan kowi anowm nadowi mih phai tek anging bowt.11Tiama hownia tahen diah, tiama hownia lang süt diah.Israeluüa kowh chimsaima mih Thurai laiklow sünta kown anging nau dowi bowt,” pakhai.12Naiawng rakowi Israel kowi kowh chimsaima mih Thurai tek mih,“Ang kowh laiklow enni nuata khai,now dai lai hown chang nowng kown mih kowi enni neplawng nesak khai.13Naiawng rakowi nami angak dow enni vüi alowngma mih,achengma mih hai tim ngialia mih tap iawng nachowng kown.Nami dow mingmang dowi khe amaisang natim krum kown.14Nami dow bawn puh iawng adi asekma nateu kown;nami dow taping hownia nakhuowkla maivia kown mih pasekchow khowm naka kown nadowi,now tuikuam hownia navürla tui kown mih paw naka kown nadowi,” pakhai.15CHAKRAMANG Israeluüa kowh chimsaima mih Thurai tek mih,“Angak hownia uang plan kowh enni taingta angak chang hanow enni naka lawngra kown,now anikma hown enni owm khai hanow enni naka kür kown,” pakhai.Nachenganchepaw nami kowi enni nauta dowi chekhai.16Enni tek mih, “Anging nauta dowi,kawrnga kowi chowm hanow anging nacham powt kown taih,” pakhai.Naiawng rakowi enni mih cham powt natakla kown.Enni tek mih, “Iowm lenma mih kawrnga kowi chowm hanow anging nacham powt kown,” pakhai.Naiawng rakowi nakawikrawi enni kown miuüa mih alenma nauang krawi enni kown.17Lowk iachow kowi kram rakowi 1,000 ia maru enni napowt kown,now tanga iachow kowi kram rakowi enni bowkbowk nacham powt kown.Nahanow enni kowh siphaiuüa dow nacham taset plawt kown,amatni dow hungh luk kowi kowh uowi mih tamkhuown chüng iawng naown kown.18Nachenganchepaw CHAKRAMANG mih nasana enni kownkow chawng enni khai;nasaksing enni kownkow aia mih kamrütma hown uowi khai.Tawngplawng kowchow panow CHAKRAMANG dow tara nowm chet mih Thurai chekhai;aia kowi chawng miuüa dow prasira uowima chekhai.19Aw Zaiawn maru-uüa, Jerusalem kowi kowh uowi miuüa low, enni mih kar takla dowi bowt. Naka khowng kownkow enni kar hanow aia mih nasana enni ngengche bowt kown. Aia dow ta hown krowksang nauang klang enni bowt kown.20CHAKRAMANG mih akawm hai akrat pusara pe enni khai. Nachenganchepaw enni kowh Tüngsang Miia dow natapet kown nadowi bowt. Aia kowi dow enni matia mik hown enni nakhi bowt kown.21Hawmlawm pra hai lakuai pra tiama tawi kowi enni cham mang mih khin khe kung hownia aia kowh laiklow enni nata kown mih, “Mami chaw tiama, mami tiama phai mang büa diah,” napa kown.22Nakhowk khe enni mih enni kowh kuh hai tai hown kowh thawpah mih arup aren kowi enni napiakta kown. Naiawngün dow asürlawima mih dawnguan iawng enni nakuakta hanow natek kown mih, “Ang hownia cham lang powt, ang hownia cham lang powt,” napa kown.23Krawng kowi enni sawtah mih liu hownia luprak iung nakala kownkow aia mih nape enni uang kown. Nami ni khe dow enni kowh tawncher hawmh mih dowm aiukma mih kowi nataw kown.24Enni thawnla laih mih chia hai kawrngaramchük paw nakhe dow chak iungma mih naka cha kown.25Nami ni khe dow enni kowh ransu-uüa kowi enni nasaita kown, now amatni kowh kimkrowng enni natimta pe kown. Nakhowk khe dow hungh towng mawng towng hownia tui nahawr iualua kown.26Aia kowh ka ma mih maru-uüa hai aia peah arau miuüa kowi CHAKRAMANG mih nabawm pe ma hanow naiungta pe kown. Nami ni khe dow lama mih sat iawng nanowi kown, now sat nowi paw ranit ni mowr nowi mih iawng ranit dungna nanowi kown.27Sünta, CHAKRAMANG dow kunmarau se uangnim atatma mih hown alakma hownia uang tarü khowk;aia kowh lumowr dow kunmarau atekma hai aia kowh dai dow krawi kamta bowk mih maih iawng chekhai.28Aia dow lowra sia nawmla bowk mih tuikling mangma iawng ransu-uüa vüi uang chin pe li khai.Aia dow bawrima mih chenchapuüa kowi piak rakowi nacham pawla hanow nahing piakta bowk kown.29Nachenganchepaw enni Thurai maru-uüa dow chimsaima mih pawi ni khe kowh iawng apiawma enni natek meng kown. Nakhowk khe dow enni mih pawla prui hanow CHAKRAMANG kowh hungh Israeluüa kowh tatung tanimra hungh luk kowi uang khe kowh maru piaw iawng enni kowh sak napiaw kown.30CHAKRAMANG mih aia kowh kunmarau, krawi kamta bowk mih maih, liku uangchak hai ria kla mih hown aia kowh nowng changra uowima mih klow dow maru-uüa kowi nape taah kown, now aia krawi ripla mih rut aia natüng pe kown.31CHAKRAMANG kowh klow hown Asuria mih natapiak kown; aia kowh müa hown aia mih Asuriauüa kowi nabawpah kown.32CHAKRAMANG mih amatni hown tasen mih khin khe aia kowh müa hown Asuriauüa kowi nahupah kown; nakhowk khe sawkchow hai taraw natün kown.33Natowkla uak kown mih rah alai hownia kamrütta kaneu khowk; nami dow Asuria mang vüi kamrütah mih chekhai. Nami arah dow abüpma hai auarma changah khai, now nami lak kowi dow sawp ahuma uowi khai. Nami sawp kowi dow napawksi maih iawng mih CHAKRAMANG kowh kawli hown nauang towkah kown.
The Seed Company