Isai29
1Uh! Ariel, Ariel, David uowi rah marow Jerusalem!Paning kowh paning en klen khai,now en kowh pawi ün paw uang talen lütlüt chekhai.2Nachenganchepaw Ariel luk kowi ang nauang pawla pe phih kown;aia dow nauowila uiting uangtak hai nanguk nakar kown,aia dow ang tut-e vi taplik nak mih phuchuara iawng naown kown.3Ang nakingküa en kownkow en tapat lut ang nakrawi khup tangbung kown,nathawp kimkrowng hanow narumta en lut kown,now naklawla tap kownkow alowngma nachun bawn kown.4En kowi dow adak kowi naklata en kown;bawn krüa hownia en natek lai kown,now dinchow dawng hownia tuktaah kaneu dowi iawng en kowh laiklow nauang lawt kown.En kowh laiklow dow süngnam klow iawng bawn krüa hownia nauang lawt kown,now dinchow krüa hownia klawk burlur en kowh laiklow nauang lawt kown.5Nachenganchepaw naiawngün en kowh ransu-uüa maten dow natama kown;amatni dow dinchow iawng hai iowla prawn mih chapli iawng naphaw kown.Linlanma sang mukuang siphaiuüa kowh CHAKRAMANG mih amatni kowi naripah kown;aia dow muk tün, lihowng, liku uangchak, akraingma mih tün hai bia laplap mih maih hown naripah kown.7Nakhowk khe dow Ariel kowh akhawtma mih kangchawngra kim kowi sen miuüa mih uarmang iawng natama kown,now aia kowi pe klaah phih mih chenchap maten dow mukmang iawng natama kown.8Zaiawn hungh kowi kingküa hai sen mih chenchapuüa maten dow maiawng naown kown;amatni dow hawm sakkrai mih maru mang lak kowi cha hawm chepaw awr thowr khe hawm sakkrai uowi reng iawng,now tui sakkrai mih maru mang lak kowi kham tui chepaw tui sakkrai rim dowi hai auaklakma awr thowr mih iawng naphaw kown.9Awda hai lakkhia büa diah,bengta mik büah now mik duma uowi büa diah.Pua büa diah;tawkchedow grep tui kham hown nadowi;Tim bawilawi büa diah;tawkchedow arak kham hown nadowi.10Tawngplawng kowchow panow CHAKRAMANG mih uang pawla enni müi su müa khowk.Enni changla mik mih risiuüa, nami mik mih aia klipta pe khai bowt,now enni changla lu mih risiuüa, nami lu mih aia mumta pe khai bowt.11Mami mukmang uan dow enni tut-e tuk pe mur hanow kowpta hüah mih bowih iawng chowtaih chekhai.Tuk phat mih maru kowi mami bowih pe phatah e dow aia natek kown mih,“Ang ia phat dowi tham.Tawngplawng kowchow panow mami bowih mih tukta pe mur khai,” napa kown.12Now tuk phat dowi mih maru kowi mami bowih pe phatah eaia natek kown mih, “Ang tuk phat dowi,” napa kown.13CHAKRAMANG tek mih, “Maiawngün maru-uüa mih nawr hown chowtaih chupiia ang,now nawr hown chowtaih ringkaw ang.Tawkche amatni kowh sak dow ang hownia alakma chekhai.Amatni dow lusa maru tüngsangah mih ari arow hown chowtaih chupiia ang.14Naiawng rakowi lakkhiara uowima mih awdara lup hown maiawngün maru-uüa kowi ang nape awdaah iawk kown.Nahanow chanlai miuüa kowh chanlaira dow napiak kown,now prengia uowi miuüa kowh prengia paw natama kown,” pakhai.15Amatni kowh sangkrangra CHAKRAMANG tut-e petah kown kamrüt miuüa luk kowipiakra nauang ting kown mih dow kramra uowi lai kowbow!Amatni dow iiu dawng kowi chang lup hanow ka tuak mih,“Mia chow khi a-i? Mia chow tuk kown pe?” pakhai.16Matawng iawng mih prengia chow enni tut-e uowi khai?Enni dow bawn hown kowh pu thawp miuüa kowi bawn hown katsang tuakah khai.Athawp miia kowi aia thawpah mih uanh, “Aia thawp ang mih nadowi,” pami nowng tek pe bow?Puh thawp miia kowi puh mih, “Tawngpaw aia tuk dowi,” pami natek pe kown bow?17Nawngchow sang Lebanawn kowi kowh kaurawng dow asi uowima mih krawng naawr phaw kown,now asi uowima mih krawng dow kaurawng iawng naphaw kown.18Nami ni khe dow param pangma miuüa kowpta hüah mih bowih kowi kowh laiklow nata kown,now iiu dawng kowi kowh uowi mih mik duma miuüa paw nakhi bowt kown.19Khamsum khamdaw miuüa dow CHAKRAMANG hown napiaw iawk kown,now ngaraima miuüa dow Israel kowi kowh chimsaima mih Thurai hown napiaw kown.20Maru angakma miuüa nauowi kown nadowi bowt;krawi prawngren maru miuüa paw nachur bowt kown,now nachang lup ngak kown nau miuüa dow napiak kown.21Dai lai hown maru kowi krawi tang aprek miuüa,chang ngak dowi mih maru kowi tangila mih kowi kuakah sum miuüa,now daila saksi hown chang ngak dowi mih maru kowi pe kaah tara nowm dowi miuüa dow nachur bowk kown.22Naiawng rakowi Abraham kowh lawng miia CHAKRAMANG dow Jakawb krungchak lawnguan kowi tek mih,“Ang kowh maru-uüa mih naka rukrai kown nadowi bowt;amatni kowh lumowr dow amawlawma naphaw kown nadowi bowt.23Amatni pungmadawng kowi amatni kowh chauüa dow ang rut hown kowh lup chekhai,naiawngün khita hanow amatni mih ang chimsaima pami nachün büah bowt kown.Jakawb kowh chimsaima mih Thurai kowi amatni mih chimsaima pahai naphuang büah bowt kown,now Israel kowh Thurai kowi ringkawma hown nakram büah bowt kown.24Nakhowk khe dow lümla tama khowk miuüa mih natuk ta bowt kown,now sak-ih dowi miuüa paw natasang bowt kown,” pakhai.
The Seed Company