Isai25
1Aw CHAKRAMANG, en chowtaih ang kowh Thurai;ang narowsi en kown, now en ming kowi ang nakiow kown.Achük alai hownia en sangkrangta mih awdara uowima mih lup maten en changta khowk;naiawngün lup dow kaah sakowmma hown en changta bowk khowk.2Ransu-uüa kowh marow dow huaklu chun kangowh en changah khai,tap tapat lut mih marow dow apiaknama en changah khai.Marow kowi kowh mang kim dow nauowi kown nadowi bowt.Nami dow katpaw naplan thawpah iawk kown nadowk chekhai.3Naiawng rakowi akürma mih chenchapuüa dow narowsi en kown,now maru ngakma mih chenchapuüa kowh marow dow ringkawma hown nakram en kown.4En dow ngarai miuüa kowh akhawtma mih kangchawngra kim,akhawr hown uowi miuüa kawm khe kowh akhawtma mih kangchawngra kim chekhai.En dow liku uangchak hownia naka tatung tanimla kown mih rah chekhai,now sat den hownia naka tatungla kown mih rah chekhai.Maru ngakuüa kowh lup dow tap bang kowi kowh uang kla mih liku uangchak iawng chekhai,amatni kowh lup dow süngrüp süngkangma kowi kowh aden iawng chekhai.Prenlang maru-uüa kowh hek klow plak klow dow en rimta khai.Aden kowi uangnim nowng klamta iawng maru ngakuüa kowh meng dow en rimta khai.6Mukuang siphaiuüa kowh CHAKRAMANG mih mami hungh luk kowi aiungma nathak pawi kown,aia dow chenchap maten vüi chaknga aiungma mih hai asung khakma mih grep tui hown nathak pawi kown.7Chenchap maten kowi tungta mih taprüa taiiara uaniang dow aia nahenta pe kown,now chenchap maten kowi khuta mih makowng nim dow aia namata pe kown.8Kowngra dow chowngchowng saksakma vüi aia napiakta bowt kown.CHAKRAMANG Thurai mih maru maten kowh mik tui naiawtta pe bowt kown,now palusama hownia aia maru-uüa kowh rukraira aia namata pe bowt kown.Mami laiklow dow CHAKRAMANG tek khowk chekhai.9Nami ni khe dow maru natek kown mih, “Mü madiah,aia chowbowt a-i kowh Thurai.Nauang lawng a-i kownkow a-i hawt chawngah mih aia kowi chowbowt.Aia chowbowt CHAKRAMANG; a-i chawngah mih aia kowi chowbowt.Chu, aia kowh lawngra lup rakowi piaw hai a-i awmrawm diah sik,” napa kown.10CHAKRAMANG kowh prasira rut mih Zaiawn hungh kowi nauowi bowt kown.Nachenganchepaw chahau kowi chia kih hown thuaah mih iawng Moab kowi aia nathuaah kown.11Tui kowi iau khe kowh iawng amatni dow chia kih dawng kowi naiau kown.Tawkche amatni dow nami hownia naia lawt kown nadowi.Amatni kowh bawrira hai lup ngak mih Thurai napiakta pe kown.12Aia dow Moab kowi kowh alowngma mih kangchawngra kim maten napiakta pe kown;naiawngün kangchawngra kim dow dinchow dawng kowi natalawk nak kown.
The Seed Company