Isai24
1Sünta, CHAKRAMANG mih napiakta lusa kown chowbowt;aia dow lusa mih akhaw aklaima nachangta kown,now lusa kowi kowh uowi mih maru-uüa kowi aia nasetta plawt kown.2Nami ni khe dow maru maten kowh uowi krang katsang naown kown:uamow hai iawngpa mih maru katsang naown kown,kim iah hai nar paw katsang naown kown,asum mih hai aran mih katsang naown kown,lowi thut mih hai lowi pawk mih paw katsang naown kown,now kureng mih hai ngarai mih paw katsang naown kown.3Lusa mih akhaw aklaima nauowi hüah kown,lusa kowi kowh uowi mih srui natama bowk kown.Mami laiklow CHAKRAMANG tek khowk chekhai.4Lusa dow akang khawngma hai rüprapma phaw khai bowt.Lusa kowi kowh ringkawra uowima mih maru-uüa dow auaklakma phaw khai bowt.5Lusa kowi dow maru-uüa sürlawita nak khowk;amatni dow Thurai kowh ari aiang chün dowi bowt chekhai,now chowngchowng saksakma mih CHAKRAMANG kowh sangbowk laitawm nuata büah khai bowt.6Naiawng rakowi lusa kowi mih piati uang ting khai bowt;lusa kowi kowh maru-uüa mih amatni kowh angak rakowi ka ripra khai bowt.Naiawng rakowi lusa maru-uüa kowi dow towkah ngare bowk khai,now maru iun a-echow towbowt ta sing uowi khai.7Grep tui sar uowi dowi bowt,now grep ruih paw ngawi khai bowt.Naiawng rakowi apiaw apama uowi reng miuüa dow sak nga khai bowt;amatni dow sak nga kowh hü sak surlur towbowt.8Piawla pala mih sawkchow tün hai taraw tün rim khai bowt,tawng iawng mih pawi paw uowi dowi bowt chekhai.9Amatni dow tekla meng se kham grep tui dowi bowt;arak kham lu-uüa nawr kowi arak tui kha khai bowt.10Marow dow apiaknama takuak hüah towbowt,now miapaw ia kup dowi kownkow kim maten kliata bowk khowk.11Tiama towng kowi grep tui rakowi maru hekla sawm khai;apiaw apama mih takcha dow sak ngara hai taprüa taiiara chowng khai bowt,now lusa kowi kowh piawra para maten dow tama khai bowt.12Marow dow apiaknama takuak hüah towbowt,now aia kowh tapplawt dow takhue hanow tadi nak khowk.13Lusa kowi kowh maru-uüa maten dow howngta kanrawn uih kung kowi iawng own khai bowt,now klekta grep uih kung kowi a-echow towbowt auih ta lat mih iawng phaw khai bowt.14Nachenganchepaw ta lat miuüa dow awmrawm kowh tek meng khai.Satkup pra kowh maru-uüa dow CHAKRAMANG kowh kraingra kowi atün atünma kiowri khai.15Naiawng rakowi satlawt pra kowh maru-uüa mih CHAKRAMANG kowi rowsiah khai,alakma mih pren kowi kowh maru-uüa dow CHAKRAMANG Israeluüa kowh Thurai kowi kiowriah khai.16Prenchur nammowt hownia Achinawmma mih kowi maru rowsiah mih anging ta khai.Nachenganchepaw ang kowh dow sakowmra uowi dowi bowt,ang kowh dow kür uowi dowi bowt chekhai.Tawngplawng kowchow panow krawi kuan maru miuüa dow krawi kuan maru reng tak chekhai.17Lusa kowi kowh maru-uüa low, enni vüi dow kramra hawt chawng enni khai,enni vüi dow kuam hai chakta hüah mih leng hawt chawng enni hüah khowk.18Kram rakowi cham powt mih maru dow kuam kowi cham dowh khai,now kuam hownia kowh ia powt mih maru dow leng kowi cham tasowk khai.Piakra mih mukuang hownia uangchak iawng uang kla khai,now lusa chüng dow chü lowlow khai.19Lusa dow adi asekma phaw khai bowt,lusa dow tadi nak khowk,now lusa dow lainowmma chü khai.20Lusa dow pua mih maru iawng tim bawilawi khai,now li hown kowh chü lowlow mih te iawng chü lowlow khai.Aia kowh angak dik dow hu lai bowt kowh aia khowm tim krum khai;aia dow tawng khe paw ia rü dowi bowt chekhai.21Nami ni khe dow mukuang kowi kowh nowng changra uowi miuüa kowi CHAKRAMANG naripah kown,now lusa kowi paw manguüa kowi aia naripah kown.22Amatni kowi dow thawngrum kowi arasang natowah kown,now akrama kung kowi amatni kowi mih naripah kown.23Lama dow naiiu bowt kown,now sat paw nanowi kown nadowi bowt.Tawngplawng kowchow panow mukuang siphaiuüa kowh CHAKRAMANG mih Zaiawn hungh hai Jerusalem pur kowiaia maru-uüa kowh aluchowuüa pur kowi kri kraingma nachowm mang bowt kown.
The Seed Company