Isai26
1Nami ni khe dow Juda pren kowi maiawng maru natek meng kown,“Anging kowh akhawtma mih marow uowi lowk,nami marow kowh tap hai taka müa dow Thurai matia chekhai.2Enni mih marow tapplawt uowta büa diah,anowmma hai kaah sakowmma mih chenchapuüa pacham ia kup lah.3Aw Thurai, en luk kowi anikma owmsak mih kowi dow thaulangma en natowah kown.Tawngplawng kowchow panow aia dow en luk kowi neplawng nesak mih chekhai.4Chowngchowng saksakma vüi CHAKRAMANG luk kowi neplawng nesak büa diah,aia dow chowngchowng saksakma vüi tatung tanimra hungh chekhai.5Bawrima miuüa kowi dow anemchow kowi aia klaah reng;bawrima mih marow kowi dow aia piakah hanow aia nemah khai,nami marow kowi dow dinchow hown talawk nak aia changah khai.6Nami dow nowng chang powng changra kowi uowi miuüa nünah khai,now ngarawng ngarai miuüa paw khawk hown thuaah khai,” napa kown.7Achinawmma miuüa kowh tiama dow atengma uowi reng,aw Thurai, amatni kowh tiama dow atengma en chang pe reng chekhai.8Aw CHAKRAMANG, en tiama nowm kowi mang hai anging chawng reng,en kowh lup hown en nauang tatüng kown mih anging nau chekhai.9Uar-e khe ang kowh sak hai ang kowh lümla mih prüa en lai rakowi kar lawt reng,lusa kowi en uang chet tara nowm hanow lusa maru mih natuk tara nowm bowt kown.10Maru ngakuüa kowi dow tüng pe sanara chepaw tachi tanawm rakowi tasang dowi chekhai;amatni dow anowmma mih pren kowi khowm padow chang angak reng tak chekhai,now CHAKRAMANG kowh kraingra kowi khi büah dowi chekhai.11Aw CHAKRAMANG, naripah kownkow en par rut khai.Nachenganchepaw amatni dow nami khi dowi chekhai.En maru-uüa kowi en towah sak mih khi hanow maru ngakuüa dow pacham rukrai lah,en ransu-uüa kowi dow maih pacham kamta bowk lah.12Aw CHAKRAMANG, anging vüi en nathawp anging taking tasangra kown.Tawngplawng kowchow panow lowra sia anging nowng changah mih dow en kür hown chekhai.13Aw CHAKRAMANG, anging kowh Thurai,en klen kowi akeng miuüa paw anging luk kowi chang low chowdiah.Nachenganchepaw en low chowtaih anging chün khai.14Amatni dow kawmat kowng khai bowt,amatni dow naplan sing kown nadowi bowt.Amatni kowi dow en ripah hanow en piakta khai,amatni kowi dow miapaw sak kowi towah dowi bowt.15Aw CHAKRAMANG, mami chenchap kowi aiukma en changah khai,now amatni kowh pren sünghi mih en plan uar pe khai.Mami chenchap aiukma en changah mih hownia en ka rowsira khai.16Aw CHAKRAMANG, akrat pusa mih khin khe amatni haw en khai,en hownia ka ripra mih khin khe amatni mih en tut-e uang lü uang leng khai.17Penchow kimuowi mu rau phaw mih maru dow hek hai pla reng chekhai,Aw CHAKRAMANG, anging paw en pur kowi naiawng phaw khai.18Anging kum nau khai, mu rau hown anging uowi khai.Tawkche anging ngare mih dow auih uowi dowi chekhai.Anging hown pren ka lawngra dowi,lusa kowi kowh maru-uüa paw anging hownia ka singra dowi chekhai.19Tawkche en kowh maru-uüa dow kowng chepaw nasing iawk kown,amatni kowh buk dow naplan sing iawk kown.Dinchow kowi kowh uowi miuüa low, rü büa diah,now apiawma tek meng büa diah.Pe singra mih en kowh anowi dow en maru-uüa luk kowi nang tui iawng nauang kla kown.Nakhowk khe kowng miuüa kowi dow en napeah singra kown.20Ang maru-uüa low, enni kowh kim kowi kup büah hanow büngta kim büa diah,CHAKRAMANG kowh kunmarau prowng dowi mowr tapet büah nawng diah.21Sünta, lusa kowi kowh maru-uüa kowi naripah kownkowmukuang hownia CHAKRAMANG uang lawt khowk.Krawi sai maru miuüa dow nauang tatüng kown,kowng khowk miuüa maten amatni kowi nakhi kown.
The Seed Company