Isai23
1Mami dow Tura marow lawnguan kowi kowh CHAKRAMANG laiklow chekhai.Tarsis marow kowi kowh aiuk aiukma mih chawnlawng ow,tarua phawnglawng kar büa diah.Tawngplawng kowchow panow Tura marow dow piak khai bowt;nakowi dow kim paw uowi dowk,now chawnlawng nai rah paw uowi dowi bowt chekhai.Nami satang dow Saipras süngdum hown enni ta khowk chekhai.2Aw sata pang kowi kowh maru-uüa hai Sidawn marow kowi kowh kun chang miuüa,ririmma uowila uiting uangtak büa diah.Enni kowh chawnlawng te miuüa dow chang kun kownkow sata kowi krawi kowi reng chekhai.3Nail aw pang kowi kowh luprak dow sata aiukma mih iawng uang mang reng;enni kowh tangka pawisa uang kup mih dow Aigupta pren kowi kowh luprak hownia chekhai.Enni dow chenchap maten hown chang kun khai.4Sidawn marow ow, rukrai diah.Tawngplawng kowchow panow sata hai sata kowi kowh akhawtma mih kangchawngra kim tek mih,“Penchow kimuowi mu rau mih paw ang tuk dowi,now ang kowh chama chapa paw uowi dowi chekhai,” pakhai.5Naiawng Tura marow piak mih satang tata hanowAigupta prenchakuüa khowm lainowmma sak kowi narau kown.6Sata pang kowi kowh maru-uüa low,tarua phawnglawng kar büa diah,now Tarsis marow kowi cham powt büa diah.7Apiaw apama mih Tura marow mami chowbowt nadowi bow?Nachang kun kownkow achük alai hownia akeng pren kowi cham uowi reng mih mami marowchak chowbowt nadowi bow?8Tura dow akeng pren manguüa luk kowi nowng changra uowi chekhai.Aia kowh kun chang miuüa dow manguüa iawng kangowh chekhai,now palusama kowi aia dow ka ringkawra reng chekhai.Mami Tura marow kowi naiawng napiakah kownkow sangkrang mih mia chekhai chow?9Naiawng sangkrang mih dow mukuang siphaiuüa kowh CHAKRAMANG chekhai.Aia kowh bawrira napiakta pe kownkow naiawng aia chang mih chekhai,now lusa kowi kowh ming iung nang iungma miuüa kowi naklata kownkow naiawng aia chang mih chekhai.10Aw Tarsis marow, Nail aw tui lawt iawng dow enni paw paprenma kowi krawi tauet büa diah;enni kowi nahang enni kown mih miapaw uowi dowi chekhai.11CHAKRAMANG mih sata luk kowi aia kowh nowng changra tüng pe khai,now pren maten kowi aia pe chürah klukluk khai.Aia dow akhawtma mih kangchawngra kim maten napiakta kownkow lawt ana khai;aia dow Kanan pren kowi kowh kangchawngra kim maten napiakta kownkow lawt ana lowk khai.12Aia tek mih, “Sidawn kowi kowh maru-uüa low, enni kowh piaw khin chur khai bowt.Tawngplawng kowchow panow nowng chang powng changra kowi enni uowi khai bowt.Rü hanow Saipras süngdum kowi enni cham powt chepawnakowi paw thaulangma enni naka uowi kown nadowi,” pakhai.13Babulawnuüa kowi tawng chow Asuriauüa changah mih tang mü büa madiah. Asuriauüa mih Babulawnuüa kowi uang senah khai, now pren kowi kowh arah maten krawi piakta pe nak khai. Kawmat dow apiaknama mih pren kowi kaurawng uaramchak hawmh towbowt uowi.14Tarsis marow kowi kowh aiuk aiukma mih chawnlawng ow, tarua phawnglawng kar büa diah. Tawngplawng kowchow panow enni kowh akhawtma mih kangchawngra kim dow piak khai bowt.15Nakhowk khe dow mang lowk ia chownglawng khowt, ranitkawm ning vüi Tura marow kowi maru natamata kown. Nachenganchepaw ranitkawm ning chur pra khe dow chawkkrawma meng kowi kowh uowi iawng Tura marow mih alai kowh iawng naplan phaw kown:16Aw maru tamata mih chawkkrawma,pawla taraw now marow kowi krawi len diah.Klangiungma tep taraw diah,now naplan tukla en iawk kownkow ahuma tek meng diah.17Ranitkawm ning chur khowk khe dow CHAKRAMANG mih Tura marow kowi nape changah kun iawk kown. Nakhowk khe dow aia kowh chawkkrawma lup kowi naplan hanow lusa kowi kowh pren maten hown nachang kun iawk kown.18Nachenganchepaw aia kowh marat hai kaah mih srui CHAKRAMANG vüi napeah kown; naiawngün dow aia matia vüi naia towah kown nadowi. Nami takcha kowi CHAKRAMANG kowh uamowuüa vüi chakkham hai klangiungma mih tawnguat ran müa nasunah kown.
The Seed Company