Isai2
1Juda hai Jerusalem lawnguan kowi Amawz kowh chapa Isai khi-ah mih mukmang dow maiawng:2Ni chur pra khe dow CHAKRAMANG chup kim hungh kowi nalang peah ringkawra kown,nami arah dow lusa kowi kowh lang pankri mih arah nachowng kown.Nami hungh kowi dow akeng mih hungh maten lak-e nalang lowngah kown,now chenchap maten tui hawr iawng nami prakowi nauang hawr iualua kown.3Chenchap akawmma nauang hanow, “Chu! CHAKRAMANG hungh kowi a-i kowpün lah,chu, Jakawb kowh Thurai chup kim kowi a-i kowkowi lah.Aia dow aia kowh tiama lawnguan natüngsang a-i kown,now aia kowh tiama kowi a-i namang kown,” napa büah kown.Tawngplawng kowchow panow CHAKRAMANG mih Zaiawn hungh hownia nape ana kown,now Jerusalem marow hownia aia kowh laiklow mih nauang lawt kown chekhai.4Aia dow chenchapuüa pungmadawng kowi nachet pe tara kown,now alakma kowi kowh akürma mih chenchapuüa hown taking tasangra nathawp pe kown.Amatni dow amatni kowh saidawng naphengah hanow nathawpla laithawn tim bowt kown,now amatni kowh reh dow nathawpla tangchen büah bowt kown.Chenchapuüa mih akeng chenchap kowi nasen kownkow napar saidawng kown nadowi bowt,now cham tasen kown mih paw natatüng tasang büah kown nadowi bowt.5Jakawb krungchakuüa low, uang büa diah;chu, CHAKRAMANG nowi kowi a-i mang diah sik.6Aw CHAKRAMANG, en kowh maru Jakawb krungchakuüa kowi en nuata khai bowt.Tawngplawng kowchow panow amatni dow satlawt pra kowh prenchak chowm krang uowi krang iawng tawi uowi khai,now Filistinuüa iawng maiaklese chang ün tawi kiang khai.Amatni dow akeng chenchapuüa hown chang auiua khai.7Amatni kowh pren dow kuh hai tai atekma chowdiah.Amatni kowh dow dawngthawnguan akhowk uowi dowi chowdiah.Amatni pren kowi dow kawrnga hai kawrnga kari ün nowng rüaah dowi mowr chowdiah.8Nachenganchepaw amatni kowh pren dow arup aren hown tek khai bowt.Amatni dow amatni rut hown kowh thawpah mih uanh kowi chupiiaah khai;amatni dow amatni rutchawk hown kowh thawpah mih uanh tut-e tabawk khai.9Naiawng rakowi amatni dow naka rukrai kown,amatni dow kür uowi dowi mih maru iawng nachowng bowk kown.Amatni kowi hangkow lawtah diah.10CHAKRAMANG kowh kramra uowima mih kunmaraura hai kri kraingra hownia naplaila kownkowaiuk aiukma mih hua cheng takra kowi cham kup büa diah;thai kuam hanow krawng dawng kowi ün cham tapet büa diah.11Tawngplawng kowchow panow aia dow bawrima miuüa kowi nape khamah sum kown chekhai,now maru-uüa kowh bawrira dow aia mih naklata pe kown chekhai.Nami ni khe dow CHAKRAMANG lowk iachow taih naka ringkawra kown.12Mukuang siphaiuüa kowh CHAKRAMANG mih bawrima hai owrowma miuüa kowinaripah kown mih ni khowm bowkta hüah khowk.Nami ni khe dow amatni bowkbowk kowi aia nape khamah sum kown.13Lebanawn kowi kowh akroma mih sidar singh aia napiakta bowk kown,now Basan kowi kowh aiukma mih sasua singh paw aia napiakta bowk kown.14Aiuk aiukma mih hungh aia napiakta bowk kown,now mawng maten paw aia napiakta bowk kown.15Kimkrowng maten aia napiakta bowk kown,now akhawtma mih tap maten paw aia napiakta kown.16Tarsis marow kowi kowh aiuk aiukma mih chawnlawng maten aia napiakta kown,klangiung klangiungma mih chawnlawng maten aia napiakta bowk kown.17Lusa maru kowh bawrira hai owrowra paw aia napiakta kown.Nami ni khe dow CHAKRAMANG chowtaih naka ringkawra kown.18Now arup aren dow mapaw nauowi kown nadowi bowt.19Lusa maru-uüa kowi nauang tüng pe kramra kownkow CHAKRAMANG mih nauang kown;nami khin khe dow aia kowh kramra uowima mih kunmaraura hai kri kraingra aia nauang tüng kown.Nami khin khe dow nami hownia naplaila kownkow maru mih nacham tapet kown;lusa maru-uüa mih hungh kowi kowh puk kowi ün nacham tapet kown,now krawng kowi kowh kuam kowi ün nacham tapet büah kown.20Nami ni khe dow lusa maru-uüa mih amatni nachupiiaah kownkowkuh hai tai hown amatni thawpah mih arup aren maten utmow kua hai mailap khawng kowi nakuakta kown.21Lusa maru-uüa kowi nauang tüng pe kramra kownkow CHAKRAMANG mih nauang kown;nami khin khe dow aia kowh kramra uowima mih kunmaraura hai kri kraingra aia nauang tüng kown.Nami khin khe dow nami hownia naplaila kownkow maru mih nacham tapet kown;Nami khin khe amatni dow aiuk aiukma mih hua cheng takra kowi ün nacham tapet kown,now rak kowi kowh puk kowi ün nacham powt büah kown.22Lusa maru luk kowi hang cham owmsak büa diah.Amatni dow nakawng kowi kowh kawli iawng chowtaih,amatni dow tawngpaw nowng khowng dowi chekhai.
The Seed Company