Isai3
1Sünta, maru-uüa kowh neplawng nesakra uanh hai maru maten kowi Jerusalem hai Juda howniamukuang siphaiuüa kowh CHAKRAMANG napawta pe bowk kown chowbowt.Aia dow amatni kowh chakkham hai tui khowm padow nahenta pe bowk kown.2Nami klen kowi tasen kiakma miuüa hai siphaiuüa,pren kruitown miuüa hai risiuüa,hawra sarauüa hai lawngtang aluchowuüa,3siphai aluchowuüa hai ringkawra uowima mih maru-uüa, prengia pek miuüa,now mantan sarauüa hai krimarang sarauüa kowi aia nahenta pe kown chowbowt.4Juda hai Jerusalem luk kowi ning diachow miuüa kowi aia nape changah alow kown;prengia e chow mih klanguüa hawmh amatni kowh pren kruitown mih nachowng kown.5Maru maten lowkkowlowk natachang nowng kown;asowmchow miuüa paw lawngtanguüa kowi naringkaw kown nadowi,now asung uowi dowi mih maru-uüa paw ringkawra uowima miuüa kowi naringkaw kown nadowi.6Nakhowk khe tawngbak mih maru dow aiamat machak lowk ia kowi nadowkah hanow natek pe kown mih,“En kowh dow kowrmow thawng uowi.Naiawng rakowi en chowng a-i kruitown mih lowk ia towbowt,now mami apiaknama mih pren kurdik en paw a-i towbowt,” napa kown.7Nachenganchepaw nakhowk khe nami maru natek pe kown mih,“Mami pren iung müa tawngpaw ang nowng chang dowi.Ang kim kowi chakkham hai tawnguat paw uowi dowi bowt.Naiawng rakowi hauang tow ang kruitown mih büa diah,” napape kown.8Jerusalem dow tatheu khai bowt,now Juda dow tim khai bowt.Tawngplawng kowchow panow amatni kowh lai hai lup dow CHAKRAMANG kowi kingküala mih kangowh chekhai,now amatni dow aia pur kowi aia kowh kraingra mih nuata khai.9Amatni kowh powm dow amatni kowh angak uowi mih powm tüngah khai;amatni dow Sawdawm marowchakuüa iawng amatni kowh angak tüngah khai,amatni dow amatni kowh angak petah dowi bowt chekhai.Amatni luk kowi piakra nauang ting kown mih dow kramra uowi lai kowbow!Amatni dow amatni luk kowi uang pawla phih khai.10Achinawmma miuüa dow naka iungra kown.Amatni dow amatni kowh lup sung aiung sia naka kown.11Nachenganchepaw maru ngakuüa kowh piakra nauang ting kown mih dow kramra uowi lai kowbow!Amatni luk kowi dow phih nauang ting kown,now amatni dow amatni kowh lup ngak sung angak sia naka kown.12Ang maru-uüa kowi dow ngeuüa hawmh changah nowng khai,now amatni kowi dow masiuüa hawmh kruitownah khai.Ang maru-uüa low, enni kowh kruitown miuüa mih tiama tawi kowi kruila enni khai.13CHAKRAMANG dow chenchapuüa kowi nachet pe tara kown chowbowt.Naiawng rakowi aia dow tara chetra kowi iowng khai bowt.14CHAKRAMANG mih aia maru-uüa pungmadawng kowilawngtanguüa hai aluchowuüa kowi chet pe tara khai.Aia tek pe mih, “Ang kowh grep krum enni piakta ang khai;ngarai miuüa kowh dawngthawnguan kür hown enni pawta pe hanow enni matia kim kowi enni towah khai.15Tawngplawng kowchow ang maru-uüa kowi enni tuk thua khai?Tawngplawng kowchow ngarai miuüa kowi dinchow kowi enni tuk rowt pe lumowr khai?” pakhai.Mami laiklow mukuang siphaiuüa kowh CHAKRAMANG tekah mih chekhai.16CHAKRAMANG plan tek mih, “Zaiawn chamauüa dow bawrima chekhai.Amatni dow downg rawngrawng se krawi len reng,tawn rukrai dowi kowi lowra mih maru kowi mik auma krawi mü reng,now khawkkhen tün nowk sengleng se saing uowima hown krawi mang reng chekhai.17Naiawng rakowi CHAKRAMANG mih Zaiawn chamauüa lu kowi ma nape phawah kown,nahanow aia dow natüng pe siri kown towbowt,” pakhai.18Nami ni khe dow CHAKRAMANG mih amatni kowh klangiung klangiungma mih tatawng müa maten narupta pe kown.Aia dow amatni kowh ro, lumem, ngawng awr,19ramseng, kuaiseh, lumowr mum müa uan,20lu mum müa uan, khawkkhen, kekawm,paingbawng, laphawi,21rutbüt, nadawr,22klangiung klangiungma mih kowrmow thawng,aluk kowi kowh khupah mih kowrmow, uanchow, tangka im,23nimrua, adipükchow mih la hown kowh uan,napawng hai uanpowngchow ün narupta pe bowk kown.24Paingbawng takcha su nam, kekawm takcha leng,klangiungma rütah mih sam takcha lu kiama,asung khakma mih uan takcha sala uan,now kow klangiungma mih takcha rukraima nauowi büah kown.25Enni kowh kachakuüa dow saidawng rut kowi nakowng kown,enni kowh tasen kiakma miuüa dow tasenra kowi nakowng kown.26Zaiawn tapplawt ün dow kar hai nguk hown nauowila uiting uangtak kown.Zaiawn dow uowi mih maten mata bowk kowh bawn kowi chowm hüah mih masiuüa iawng naown kown.
The Seed Company