Isai1
155 Juda pren kowi Uzia, Jotham, Ahaz hai Hezekia büah chowm mang khe Amawz kowh chapa Isai mih Juda pren hai Jerusalem marow lawnguan kowi khi mukmang khai. Nami mukmang lawnguan mih mami bowih kowi aia ruiah khai.2Aw mukuang, sünta diah.Aw lusa, sünta diah.CHAKRAMANG tek mih,“Ang chauüa kowi ang thum ang mawmah khai,now ang pe iuksownah khai.Nachenganchepaw amatni dow kingküa ang khai.3Chia khowm padow aia kowh kim iah kowi tuk mat,now kawrngaramchük paw aia kowi peah chak reng mih maru kowi tuk mat chekhai.Nachenganchepaw Israeluüa dow tuk mat ang dowi;ang maru-uüa dow tuk mat ang dowi chekhai,” pakhai.4Aw Israel, enni dow angak kangowh mih chenchap hai aprek kangowh mih maru chekhai,enni dow maru ngak krungchak hai lup ngak chang mih chauüa chekhai.Enni dow enni kowh chimsaima mih CHAKRAMANG kowi nuata khai,now aia prakowi enni dangta pe kung khai.5Tawngplawng kowchow nakala ripra kown mih lup enni lang chang rereng?Tawng rakowi chow CHAKRAMANG kowi enni lang kingküaah rereng?Enni kowh lu kowi müa towm kangowh towbowt,now enni kowh sak kowi paw arau kangowh towbowt.6Enni kowh lunui hownia khawkpha mowr tawng re-e paw amüngchow mih rah uowi dowi bowt;enni kowh buk kowi dow müa towm hai ma kangowh towbowt.Naiawngün ma dow sau paw enni sauah dowi, bawm paw enni bawmah dowi,now arau na-ela kownkow chakhang paw enni phawk pe dowi chekhai.7Enni kowh pren dow apiaknama takuak hüah towbowt,enni kowh marow dow maih hown kam bowk khowk.Enni kowh luprak maten dow enni pur kowi prenlang maru-uüa pawla khai;prenlang maru-uüa mih enni kowh pren dow piakta enni nak khai.8Jerusalem marow dow chawngah dowi mih grep krum iawng towbowt.Nami dow laih kowi kowh te iawng hai ransu-uüa rumta hüah mih marow iawng towbowt.9Mukuang siphaiuüa kowh CHAKRAMANG che pe sing a-i ne dowi e dow a-i napiak prang bowt;Sawdawm hai Gawmawra marow iawng a-i nachowng prang bowt.10Aw Jerusalem, en kowh kruitown miuüa dow Sawdawm marowchak iawng chekhai,en kowh maru-uüa dow Gawmawra marowchak iawng chekhai.Naiawng rakowi CHAKRAMANG kowh laiklow sünta diah,now Thurai kowh ana pek kowi pe param diah.11CHAKRAMANG tek mih, “Enni kowh tawncher phuchua tawngpaw ang lakke dowi.Ruapur hai aiuk akauma mih tawncher sau hown kowh tikah mih uanap ang ka lai bowt kowh ang dua khai bowt.Chia, rua hai ruapur chah vi kowi tawngpaw ang awmrawm dowi.12Uang chupiia ang kownkow ang kowh chup kim kowi enni uang khai;nami khin khe ang kowh chup kim viadawng nakrawi thuala nak kown mih mia chow tek enni?13Auan uowi dowi mih phuchua hauang chang büah tham bowt.Enni uang towk ang maikhük mih nam ang du hüp khai bowt.Lasi Pawi, Tanai Ni hai kawngmu pawi khe kowhenni chang lup ngak mih ang nowng kham dowi bowt.14Enni kowh Lacher Pawi hai khowm bowkta mih pawi maten ang sui chekhai.Naiawngün pawi dow ang tut-e kurdik iawng chekhai;nami kurdik kur hown ang bowm mih nowm khowk.15Chupiia ang kownkow enni awr iaw rut khe enni hownia ang nacham plengta mik kown.Mün khowt chow enni awr lü awr leng chepaw ang nasünta enni kown nadowi.Tawngplawng kowchow panow enni kowh rut kowi dow vi kangowh chekhai.16Tasawk tasau büah hanow chimsaima uowiah büa diah.Ang pur hownia enni kowh lup ngak maten kuakta büa diah,now taingta lup ngak chang büah bowt, hang chang büah tham bowt.17Nachang lup iung kown mih tasang büa diah;now chet tara nowm büa diah.Nowng changra kowi uowi miuüa kowi khowngah büa diah,saratchowuüa kowi tawi takhula büa diah,now mamaimowuüa kowi tawi tangila büa diah,” pakhai.18CHAKRAMANG plan tek mih, “Kawmat dow uang büa diah, a-i talawp talai diah sik.Enni kowh angak maten aringma towbowt chepaw nangkhe iawng hai ruapur pawi iawng akawma naphaw bowt kown.19Ang laiklow che enni chün khai hanowpren kowi kowh chakkham aiungma mih enni naka cha kown.20Nachenganchepaw ang laiklow che enni chün dowi kowi kingküa ang khai hanowsaidawng hown enni napiak kown.Mami laiklow dow ang CHAKRAMANG tek khowk,” pakhai.21Aw Jerusalem, pakat khe dow kaah sakowmma en uowi chowdiah.Tawkche kawmat dow en chowng chawkkrawma khai bowt.Pakat khe dow tara nowm hai tachi tanawmra atekma en uowi chowdiah.Tawkche kawmat dow sai maru sak miuüa en tut-e tek khai bowt.22Pakat khe dow en mih achangma mih tai iawng chowdiah.Tawkche kawmat dow en mih asung uowi dowi bowt chekhai.Pakat khe dow en mih aiungma mih grep tui iawng chowdiah.Tawkche kawmat dow tui taraw mih grep tui iawng en chowng khai bowt.23En kowh kruitown miuüa dow kingküa dawma hai kuk miuüa kowh auiua chowng khai bowt.Amatni dow bümsua chak hai awmrawm sung kak dawma chekhai.Amatni dow saratchowuüa kowi tawi takhula dowi,now mamaimowuüa kowi paw tawi tangila dowi chekhai.24Naiawng rakowi mukuang siphaiuüa kowh CHAKRAMANG,Israel kowh akürma mih Thurai tek mih,“Kingküa ang miuüa kowi ang naripah kown,now ang kowh ransu-uüa kowi ang nasat pe klai bowt kown.25Ang nabawp en kownkow ang napar rut bowt kown.Tai kowi achangma thawpah khe maih kowi chawrah reng,nami iawng en kowh asür alawk maten nakuakta en kownkow ang nachang en kown.26Nami kung kowi dow alai kowh iawng pren kruitown mih hai prengia pek mih ang nape en kown.Now anowmma hai achinawmma mih marow pahai maru natek en bowt kown,” pakhai.27Thurai mih aia kowh tara nowm hown Zaiawn kowi nalawngah kown,now angak hownia dia sar mih kowi dow aia kowh anowm hown nalawngah kown.28Nachenganchepaw aia kowi kingküaah miuüa hai maru ngakuüa dow akrowksang napiak kown,now aia kowi nuata miuüa dow nachur bowt kown.29Sasua singh kowi enni krawi chupiia mih rakowi enni naka rukrai kown,now enni kowh arup aren bakan kowi enni chupiia mih rakowi paw enni naka rukrai kown.30Aram keu bowk mih sasua singh iawng enni nachowng kown,now tui uowi dowi mih bakan iawng enni nachowng kown.31Akürma mih maru-uüa dow chathang keu iawng naown kown,now amatni kowh lup ngak maten dow maih iawt sek iawng naown kown.Amatni dow akrowksang nakam bowk kown;nami maih dow miapaw nowng mit kown nadowi.
The Seed Company