Isai16
1Aw Moab, pren kruitown mih vüi krawi sa pe awmrawm sung diah;Sela marow hownia süngrüp süngkangma iawng Zaiawn chama kowi krawi sa pe ruapur chah sangrum diah.2Abai hownia lawtta mih uakling mapra lai paipra lai cham krawi iow mih iawngMoab dow Arnawn aw pown rah re-e nakrawi mang panglang kown.3Judauüa kowi Moabuüa natek pe kown mih,“Tawng chow achang takla mih pe anging prengia büa diah.Ni-e kowh sat den hownia singh klim tung anging mih iawng pe tatung tanim anging diah.Enni tut-e anging uang tatung tanim khai;miapaw khi anging dowi mih re-e pet anging diah.4Enni kowh pren kowi pe uowi anging diah.Piakta anging kown nau miuüa rut hownia towkala anging diah,” napa kown.Nowng chang powng changra dow nachur kown,now krawi piak mih lup paw nataing bowt kown.Krawi sen pren miuüa kowi nakhi-ah kown nadowi bowt.5Nami khin khe David krungchak hownia mang nauang pawk lowk ia kown.Aia dow achur uowi dowi mih sakraura hai kaah sakowmma mih rah hown nachowm mang kown.Aia dow anowmma mih lup alenma nachang kown,now aia dow anowmma nachet tara kown.6Moab dow bawrima chekhai.Aia kowh bawri laiklow hai aiamat kowi aiukma nachangah kown mih laiklow anging ta chekhai.Tawkchedow aia kowh bawri laiklow maten tawngpaw mrawkra uowi dowi.7Naiawng rakowi Moab dow aia kowh pren rakowi atün atünma nakar kown.Kir-Heres marow kowi kowh kawmpah prüa rakowi aia dow atün atünma nakar kown.8Hesbawn hai Sibma marow kowi kowh grep ruih dow keu bowk khowk.Akeng pren kruitown miuüa mih grep ruih aiung aiungma mih krawi thuata nak khowk.Naiawngün grep ruih mih pakat khe dow Jazer marow hai süngrüp süngkangma mowr chowdiah arui krawi ting.Nami klen kowi naiawngün grep ruih mih sata klen prang chowdiah cham krawi ting.9Naiawng rakowi Jazer hai Sibma marow kowi kowh grep ruih rakowi ang kar khai.Hesbawn hai Eleale marow rakowi ang hawk mik tui khai.Tawngplawng kowchow panow nakowi dow ngen luprak khe kowh piawra uowi dowi bowt chekhai.10Uih-ak rawng hownia awmrawmra hai piawra uowi dowi bowt.Grep krum kowi miapaw tek meng dowi bowt,now grep uih küara kowi paw miapaw küa grep uih dowi bowt.Tawngplawng kowchow panow naiawngün klow dow rimta khai bowt.11Moab hai Kir-Heres rakowi ang kowh sak mih taraw tün iawng kar khai bowt.12Arah kroma kowi kowh phuchuara kowi Moab cham chupiia chepaw mrawkra nauowi kown nadowi,now aia kowh thurai chup kim kowi nakowchup thurai kownkow kowkowi chepaw mrawkra nauowi kown nadowi.13Moab lawnguan kowi mami laiklow alai hownia CHAKRAMANG tekta khowk chekhai.14Nachenganchepaw kawmat dow CHAKRAMANG tek mih, “Sum ning chi hown krowksang Moab kowh dawngthawnguan maten natama kown. Khowt maru kawm mih dawng hownia maru iun akekchow nata plai kown, now ta plai miuüa paw kür nauowi kown nadowi,” pakhai.
The Seed Company