Isai17
1Mami dow Damaska marow napiak kown mih lawnguan chekhai.Sünta, Damaska marow dow nauowi kown nadowi bowt;nami marow dow apiaknama naown kown.2Aroer marowchakuüa dow towla marow hüah now napowt bowk kown;naiawngün marow dow tawncher hawmh nata powngta kown.Nakowi mih tawncher hawmh nata mawkla rim kown;amatni kowi naprütah kown mih maru miapaw nauowi kown nadowi.3Israeluüa kowh marow dow kangchawngra kim nauowi kown nadowi bowt,now Damaska kowh paw kruitownra kür nauowi kown nadowi bowt.Siria kowi kowh ta sing uowi mih maru-uüa paw Israeluüa iawng kraingra nauowi kown nadowi.Ang mukuang siphaiuüa kowh CHAKRAMANG mami laiklow ang tek khowk.4Nami ni khe dow Jakawb kowh kri kraingra nauowi kown nadowi bowt;akauma mih maru kowh sau chawr bowk khe arawngchow mih iawng aia dow naown kown.5Israel pren paprenma dow laih kowi ki ngenta cha bowk khe kowh tawngpaw ta uowi dowi mih iawng naown kown.Amatni dow Refaim lawngrawi kowi kowh ki kuata luprak bowk mih laih iawng akhawma naown kown.6Nachenganchepaw amatni mih luprak ta dowh mih iawng nata lat ne kown.Amatni dow howngta kanrawn uih kung kowi kowh singh chem kowi auih ta lat pre sum buk mih iawng naown kown.Ang CHAKRAMANG, Israeluüa kowh Thurai mami laiklow ang tek khowk.7Nami ni khe dow maru-uüa mih amatni kowi thawpah miia prakowi natang mü bowt kown;amatni dow Israeluüa kowh chimsaima mih Thurai prakowi nauang dang bowt kown.8Nakhowk khe dow amatni rut hown kowh thawpah mih phuchuara prakowi natang mü kown nadowi bowt,now amatni thawpah mih Asera limpu hai maikhük towk müa phuchuara prakowi nape ching büah kown nadowi bowt.9Nami ni khe dow Israeluüa kowh marow akhawtma mih nachowng kaurawng bowt kown.Amatni kowh marow dow amatni rakowi alai kowh Hivuüa hai Amawruüa towla hüah mih marow iawng naown kown.Amatni kowh pren dow natapiak kown.10Aw Israeluüa, enni kowh lawng miia Thurai kowi enni tamata khai bowt;enni kowh tatung tanimra hungh kowi sak kowi enni towah dowi bowt chekhai.Naiawng nachang lak dow enni nachupiiala akeng thuraiuüa kownkow lang iung mih singh tut pau tut enni chowk khai.11Nami bakan kowi enni chowk singh pawi mih rau khe amum awr uowi chepaw achur kowi auih nauowi kown nadowi.Nakowi dow akrat pusara hai nowng iungah dowi mih arau kangowh nauowi kown.12Sünta, akürma mih pren kowh siphaiuüa klow dow sata tui klow iawng nowk rumrum khai;akeng chenchapuüa kowh klow dow tui talowng phunglung mih klow iawng taah khai.13Kramra uowima mih tui lawt klow iawng siphaiuüa dow hek khai.Tawkche CHAKRAMANG che nangah hanow amatni dow alakma kowi napowt kown.Amatni kowi dow hungh luk kowi kowh chapli kowi li rownla iawng,now liku uang khe kowh rownla prawn mih dinchow iawng CHAKRAMANG naprütta kown.14Sat kowi pra dow lainowmma Israeluüa nakram kown;uarthowi dowi rawn amatni kowh ransu-uüa mih napiak bowk kown.Nami dow Israeluüa kowi krawi piak miuüa kowh kakbak chekhai;nami dow alai hownia amatni vüi Thurai khowm bowk pe mih chekhai.
The Seed Company