Isai14
1Jakawb kowi CHAKRAMANG nasanaah iawk kown; Israel kowi aiamat vüi aia nalang kloah iawk kown. Amatni kowi dow amatni pren kowi aia nauang plan pawla iawk kown, now prenlang maru-uüa mih amatni hown nauang tawi tabawng kown.2CHAKRAMANG peah mih pren kowi Israeluüa nakowplanla kownkow akeng chenchapuüa mih natawi khowngah kown, now nakowi dow akeng chenchapuüa mih nar iawng Israeluüa krüa kowi nauowi kown. Nakhowk khe dow amatni kowi towah nar miuüa kowi amatni natowah nar lai kown, now amatni kowi changah nowng miuüa luk kowi amatni nachang low bowt kown.3Nami ni khe dow Israeluüa kowi kawmra, kratra hai ngarera hownia CHAKRAMANG nalawngah bowt kown.4Nakhowk khe dow Babulawn pren mang kowi kharema hown natek pe büah kown mih,“Khowt maru nga mih mang piak khai bowt lownow!Kawmat dow aia mih krawi nowng chang nowng dowi bowt.5Maru ngakma mih pren kruitown miuüa kowh kür piak khai bowt;amatni kowh kür dow CHAKRAMANG piakta pe khai bowt.6Nowng chang powng chang miuüa dow maru kowi krawi chang nowng reng chowdiah,amatni dow kunmarauma hown chenchapuüa kowi amowt uowi dowi krawi chang nowng reng chowdiah.7Nachenganchepaw kawmat dow palusama ka thaulangra khai bowt.Naiawng rakowi amatni dow awmrawm kowh tek meng khai.8Sidar singh hai Lebanawn kowi kowh karpowng singh khowm padow awmrawm khai;amatni dow awmrawmma hown Babulawn mang kowi tek pe mih,‘Kawmat dow krawng kowi iüata en hüah khowk.Naiawng rakowi mia iawng mih singh tuk mih paw uang krip anging dowi bowt,’ pakhai.9“Makownguüa uowi rah kowi en uang rakowi makownguüa uowi rah kowi kowh maru-uüa mih en hown nauang takrum kown mih lainowmma sakkrowng khai.Naiawng rakowi kowng miuüa kowh lümla mih en hown nauang takrum kownkow awr rü khai.Mami lusa kowi kowh aluchowuüa maten awr rü bowk khai;chenchapuüa luk kowi kowh chowm mang miuüa maten paw amatni kowh mang chowm rah hownia awr rü bowk khai.10Amatni dow nahaw en hanow natek en kown mih,‘En paw anging iawng dow kow uak mih chowbowt;en paw anging iawng towbowt,’ napa kown.11En kowh klangiungra maten dow makownguüa uowi rah kowi uang dowh khai bowt.Nami klen kowi en kowh taraw tün paw uang dowmla khai bowt.En dak kowi dow dung kawm krawi tauet plawt khai;naiawngün dung dow mumta en klum khai.12“Rauleng krek ow, rau ria chah ow,en dow mukuang pren hownia uang iiu dowh khai bowt.Pakat khe dow chenchapuüa luk kowi en awng khai;kawmat dow lusa kowi kuakta en hüah khai.13Sakdawng kowi en tek mih, ‘Mukuang kowi ang napün kown,now Thurai kowh krekuüa luk kowi ang natow mang chowm rah kown.Tawngphak pra kowh hungh luk kowi akeng thuraiuüa takua talawmra kowi mang chowm rah kowi ang nachowm kown.14Uangnim luk kowi ang napün kown;lang kri lang kraing mih Thurai hown talele ang nachowng kown,’ pakhai.15Tawkchedow makownguüa uowi rah kowi uang klata en hüah khai.Tadupra kuam lang büp nowm nowm mih kowi uang klata en hüah khai.16Khi en miuüa dow en prakowi amik sang tang mü khai.Amatni dow khita en hanow tek mih,‘Lusa kowi chü lowlow howngah reng mih maru nami chowbowt nadowi bow?pren kowi chür nukluk changah reng mih maru nami chowbowt nadowi bow?17Lusa kowi süngrüp süngkangma iawng thawpah mih,marow kowi khum planta mih hai naruüa kowi pe mangah kim dowi mih maru nami chowbowt nadowi bow?’ pakhai.18“Chenchapuüa kowh mang maten dow ka tadupra khai;amatni dow ringkawra uowima hown chowlowkkow kuam kowi ka tadup khai.19Nachenganchepaw en kowi dow kuam uat kowi cham kuakta en hüah khai.Saidawng rut kowi kowh kowng miuüa uowi rah lang büp mih kowi uak hown en tamum klum khai.En kowh uak dow thuata naknak mih uak iawng chekhai.20En dow akeng mih manguüa iawng natawi ka tadupra kown nadowi.Tawngplawng kowchow panow en matia pren kowi en piakah khai,now en matia maru-uüa kowi en saiah khai.Maru ngak krungchakuüa kowi dow maru natamata kown.21Amatni kowh pipu-uüa ngak rakowi amatni kowh chauüa kowi nakowngta kownkow khowm bowkta arah lowk diah.Amatni dow napowng pren kownkow narü kown nadowi bowt;amatni dow lusa kowi marow atekma nachangah kown nadowi bowt,” pakhai.22Mukuang siphaiuüa kowh CHAKRAMANG tek mih,“Amatni kowi ang nakingküaah kown; Babulawn kowh ming,aia kowh ta lat mih maru-uüa hai aia kowh krungchakuüa kowi dow asaima ang napiakta kown.23Aia kowi dow kaurawng uaramchak hawmh uowi rah mung ang nachangah kown.Aia kowi dow piak müa sang hown ang naserah kown.Ang mukuang siphaiuüa kowh CHAKRAMANG tek khowk,” pakhai.24Takham se mukuang siphaiuüa kowh CHAKRAMANG tek mih,“Ang khowm bowkta iawng ang nachang nowm kown,now ang tuakta mih iawng ang nachang ngengche kown.25Ang kowh pren kowi Asuria mang kowi ang napiakta nak kown,now ang kowh hungma mawngma süng kowi aia kowi ang nathuata nak kown.Nakhowk khe dow ang maru-uüa luk kowi kowh aia kowh laithawn tim mih naklata pe bowt kown,now amatni pangkawt kowi kowh kurdik dow ang nauowtta pe bowt kown,” pakhai.26Palusama vüi mami sangkrangra khowm bowkta khowk,now chenchap maten kowi naripah kownkow ang parta rut hüah khowk.27Mukuang siphaiuüa kowh CHAKRAMANG mih naiawngün khowm bowkta mih chowbowt.Naiawng rakowi nami dow miapaw nowng klowi dowi bowt chekhai.Aia mih parta rut hüah khowk;nami rut dow miapaw nowng kunta pe dowi bowt chekhai.28Mami mukmang dow mang Ahaz kowng mih ning khe kowh risi Isai khi-ah mih chekhai.29Filistinuüa low, hupla enni mih müa taklowk khai bowt pache miapaw hangkow awmrawm büa diah.Tawngplawng kowchow panow rua lowk mih kowng kung kowi nami rua uowi rah kowi nami lak-e kowh akru lang uowi mih rua uang ta uowi reng chekhai.30Lang ngarai mih maru-uüa naka chakkham kown,now akhawr hown uowi miuüa athaulangma naka müi kown.Nachenganchepaw Filistin kowi dow khown hown ang napiakah kown,nahanow aia kowh ta lat mih maru-uüa dow nakowng bowk kown.31Marow tapplawt ow, kar hai nguk hown uowi diah.Marow ow, kar diah.Filistinuüa low, kram hown chür büa diah.Tawngphak hownia maikhük iawng siphaiuüa uang khowk,siphaiuüa pungmadawng hownia lowk ia khowm kung pra süt dowi chekhai.32Nami chenchap kowh ria mang mih kowi tawng iawng chow naklangah kown?Amatni kowi dow anging natek pe kown mih,“Zaiawn kowi CHAKRAMANG chowkah khai,nakowi kowh nowng chang powng changra kowi uowi mih aia maru-uüa dow naka tatung tanim kown,” napa kown.
The Seed Company