Isai13
1Babulawn lawnguan kowi Amawz kowh chapa Isai mih maiawng khi mukmang khai.2Singh kau uowi dowi mih hungh chut kowi ruang tamkhuown büah lowk diah.Bawrima mih marow kowi nakowsen kownkow atünma siphaiuüa kowi peah ana diah,now nakowsen kown mih amat müa lek pe rut büa diah.3Ang CHAKRAMANG kunmarauah mih maru-uüa kowi naripla kownkowang lang krata mih akürma mih siphaiuüa kowi ang hawta khowk.Amatni dow ang pe changah mih lup nachang kownkow lainowmma piaw khai.4Hungma mawngma luk kowi maru kawm klow sünta madiah.Chenchap maten hai pren kowi kowh maru maten takua talawm hanow pawpan urlur khai.Natasen kownkow mukuang siphaiuüa kowh CHAKRAMANG mih kua siphaiuüa khai bowt.5Amatni dow pren lakma hownia kowh uang mih chekhai,amatni dow prenchur nammowt hownia kowh uang mih chekhai.CHAKRAMANG mih aia kowh kunmaraura hown palusama kowi napiakta kownkow uang tarü khowk.6Atün atünma kar büa diah.Tawngplawng kowchow panow CHAKRAMANG kowh ni mih uang tawn khowk chekhai.Nami ni khe dow lang kri lang kraing mih Thurai hownia piakra nauang ting kown.7Naiawng rakowi maru maten kowh rut mih nauak kown,now maru maten kowh sakkraingra mih natama bowt kown.8Amatni dow lainowmma nakram kown,amatni dow lainowmma nakham arau kown,now penchow kimuowi mu rau iawng nangare büah kown.Amatni dow ka tuak ka cha dowi bowt kowh lowkkowlowk prakowi natamü kown,now kram lai kowh amatni kowh lumowr dow müakangma naown kown.9Mü diah, CHAKRAMANG kowh ni uang ting kown chowbowt.Nami dow kramra uowima mih kunmarau lün pluplup mih ni chekhai;nami dow lusa hai alak kowi kowh maru ngakuüa maten kowi nauang piakta kownkow uang tarü khowk.10Nakhowk khe dow mukuang kowi kowh anowi uowi mih krek chap maten nanowi kown nadowk;sat lawt khe paw aiiuma nauowi bowt kown, now lama paw nanowi kown nadowi bowt.11Angak rakowi lusa kowi ang CHAKRAMANG naripah kown;maru ngakuüa chang ngak mih rakowi ang naripah kown.Chang bawri miuüa naia chang bawri kown nadowi bowt,nga chamang maru nga miuüa kowh bawrira ang nachurta pe bowt kown.12Nakhowk khe dow lusa maru kowi nakrum kown mih krat krang kuh kowi kowh krum kown mih lak-e krat ang nachangah kown;maru cham krat krang Ofir süng kowi kowh kuh cham lak-e krat ang nachangah kown.13Ang mukuang siphaiuüa kowh CHAKRAMANG,nami ni khe dow ang kowh lün pluplup mih kunmaraura ang natüngah kown.Nakhowk khe mih mukuang khowm padow nachü kown,now lusa paw aia uowi rah hownia natasüt kown.14Babulawn pren kowi kowh takhang mih prenlang maru maten chowlowkkow pren prakowi napowt kown.Amatni dow chakmit miuüa rut hownia kowh powt mih naki iawng hai athing mih uowi dowi mih ruapur hawmh iawng chowlowkkow chenchap tut-e napowt kown.15Ka khümta miuüa dow nakowng kown,amatni dow napawk hai saidawng rut kowi nakowng kown.16Amatni pur kowi amatni kowh chauüa kowi ransu-uüa natheu pe kown;amatni kowh kim üa dow ransu-uüa nakhünta pe kown,now amatni kowh masi kowi dow kür hown naphua naiua pe kown.17Mü diah, Babulawn kowi nakingküaah kownkow Mediauüa kowi ang natowkah kown.Mediauüa dow tai kowi nalawpha kown nadowi,amatni kowi dow kuh hown naia bümsuaah kown nadowi.18Amatni dow leba hown klanguüa hawmh kowi naap-ah kown;amatni dow ingrikchowuüa kowi paw nasana kown nadowi,now ngeuüa hawmh kowi paw nasanaah kown nadowi.19Palusama kowi kowh asung lang uowi mih pren,Kaldaiuüa kowh kri kraingma mih pren Babulawn kowi Thurai mih napiakah kown,aia dow Sawdawm hai Gawmawra marow kowi iawng napiakah kown.20Nami pren dow tawng nam khe paw nachowng uowi rah kown nadowi bowt;nami pren kowi dow tawng nam khe paw maru nauowiah kown nadowi bowt.Nakowi dow Arabuüa mih nakhup tangbung kown nadowi bowt,now tawncher thing miuüa paw nakowi mih miapaw nakowthing tawncher kown nadowi bowt.21Tawkchedow süngrüp süngkangma kowi kowh asaduauüa mih nakowi nauowi kown,nakowi kowh kim kowi dow rang pranma mih asaduauüa atekma nauowi kown,now ut uakling hai kaurawng rua hawmh mih nakowi nakrawi chetla dawk kown.22Nakowi kowh kimkrowng kowi brenkhui hai kramra uowima mih asaduauüa nauowi hanow nalai kown.Babulawn kowh chur khin uang ting khowk,aia kowh ni dow naplan dawng pe kown nadowi bowt.
The Seed Company