Isai11
1Kripta mih singh ngut hownia singh sar awr tak reng,nami iawng Jese krungchak hownia paw mang sar nauang uowi kown.2Nami mang sar luk kowi dow CHAKRAMANG kowh lümla mih nahing nai hüah kown;aia kowi dow nami lümla mih chanlaira, tukra hai prengia iung napeah kown,now kürra hai CHAKRAMANG kowi ringkawra saktuak paw napeah kown.3Aia dow CHAKRAMANG kowi ringkaw mih rakowi naawmrawm kown,aia dow müah apowm hai taah mih luk kowi nachet tara kown nadowi.4Aia dow ngarai miuüa kowi nachet pe tara nowm kown,now akhowng takla miuüa kowi aia natangila kown.Aia kowh ana pek hown dow maru naka ripra kown,now aia kowh ana pek hown maru ngakuüa dow nakowng kown.5Tachi tanawmra dow kekawm iawng aia nasükla kown,now kaah sakowm mih rah dow namphai iawng aia na-üla kown.6Sui hown ruapur chah mih nataiua uowi kown,pri rengchow hown rua chah paw nataiua mawk kown,chia chah hown krangsila powrchow paw nataiua taw kown,now amatni kowi dow ngeuüa mih nathingah kown.7Chia hai tawm hown katsang nataw kown,now amatni kowh chauüa paw arasang nataiua mawk kown.Krangsi paw chia iawng nacha chahau bowt kown.8Akru uowima mih rua kua re-e ngeuüa ngawk chepawnami ngeuüa kowi tawngpaw rua nachangah kown nadowi.9Ang kowh hungh chimsaima mih kowi tawng re-e paw piakra nauowi kown nadowi.Tawngplawng kowchow panow sata kowi tui atekma mih iawng maru nauowi bowt kown;CHAKRAMANG kowi tuk mih maru lusa kowi atekma nauowi bowt kown.10Nami ni khe dow chenchap maten vüi Jese krungchak hownia kowh uang ta towk mih mang tamkhuown iawng natachowk kown;chenchap maten aia tut-e nauang takua talawm kown,now aia kowh tanaira dow kraingra uowima naown kown.11Nami ni khe dow aia kowh ta lat mih maru-uüa kowi nakrawi lawngah kownkow CHAKRAMANG mih aia kowh rut akürma mih natang pe iawk kown;aia dow Asuria, Aigupta, Pathraws, Ethiawpia, Elam, Babulawn, Hamat hai süngdum kowi kowh uowi mih maten kowi aia kowh rut natang pe iawk kown.12Chenchap vüi aia mih naruang pe tamkhuown lowk kown,now prenlang kowi kowh cham takhang mih Israeluüa kowi aia nakua nalawmah kown.Lusa kowi kowh cham taset tauet mih Judauüa kowi arasang aia nakuaah kown.13Israel kowh irsira dow nauowi kown nadowi bowt,now Juda kowh paw ransu saktuak nauowi kown nadowi bowt.Juda kowi Israel nairsiah kown nadowi bowt,now Juda paw Israel kowi natuakla ransu kown nadowi bowt.14Amatchi mih satkup pra kowh Filistinuüa kowi nataiua sen iüah kown,now satlawt pra kowh pren paw nataiua sen iüah kown.Amatchi mih Edawm hai Moab pren napowngta kown,now Amawnuüa mih amatchi krüa kowi nauowi bowt kown.15CHAKRAMANG mih Aigupta pren re-e kowh Sata Rik kowi akangma nachangta kown;aia mih adenma mih li hown Iufratis aw luk kowi natüng pe kür kown.Nami aw dow ranit prek aia nachangah kown,nahanow phanaikhawk kruama nami aw mih maru nowng pown kown towbowt.16Aigupta pren hownia Israeluüa uang lawt khe Israeluüa vüi aia tawi chowng pe tiama khai,nami iawng aia kowh ta lat mih maru-uüa vüi paw Asuria pren hownia kowh tiama aia nachowng pe kown.
The Seed Company