Hosea9
1Aw Israeluüa, akeng chenchapuüa iawng piaw müa pawi hang tawi chang diah.Enni dow enni kowh Thurai tut-e kaah sakowmma enni uowi dowi chekhai;enni dow enni kaah mih luprak hown akeng thuraiuüa kowi cham phuchuala khai.2Naiawng rakowi cha thuara hai grep uih küara dow maru-uüa kowi napeah chakkham kown nadowi bowt;amatni dow naka grep tui sar kown nadowi bowt.3Amatni dow CHAKRAMANG pren kowi tawi ia uowi kown nadowi.Efraim dow Aigupta pren kowi nakowplan kown,now Asuria pren kowi asür alawkma mih chakkham nakowcha kown.4Amatni dow CHAKRAMANG vüi grep tui hown khamah mih uanap nachang kown nadowi bowt,now amatni kowh tawncher phuchuaün paw CHAKRAMANG mih nasak-ih pe kown nadowi bowt.Naiawngün phuchua dow asür alawkma chekhai,naiawngün dow uowila uiting uangtak mih maru-uüa kowh chakkham iawng chekhai,Naiawng rakowi naiawngün chakkham cha miuüa dow asür alawkma naown kown.Naiawngün chakkham dow amatni sakkraira rim müa krowngchow vüi naown kown.Naiawngün chakkham dow CHAKRAMANG kim kowi naia pawla kown nadowi.5Amatni kowh kawngmu pawi ni kowi tawng chow nachang büah kown?CHAKRAMANG kowh pawi ni kowi tawng iawng chow nasunah büah kown?6Piakra hownia powt büah mih khin khe Aigupta mih amatni kowi nakuaah kown,now Memfis marow kowi amatni kowh uak mih nadupah kown.Amatni krümah mih tai dow mawh namungah kown,amatni kowh uowi rah dow chuh mung namungah kown.7Ripra khin uang ting khai bowt mih Israeluüa pacham tuk lah,tara chetra ni uang ting khai bowt mih sak kowi pacham towah büah lah.Amatni kowh angak dow lainowmma hu khai bowt,amatni dow Thurai kowi lainowmma suiah büah khai.Naiawng rakowi amatni dow risiuüa kowi, “Bualama” pahai tuak büah khai,now Thurai Lümla ka miuüa kowi paw, “Thuklama” padow tuak büah khai.8Risi dow Thurai vüi Efraim kowi kowh kangchawng mih chekhai.Nachenganchepaw aia cham mang cham katra maten kowi leng chak ia kangowh chekhai;aia kowi dow aia kowh Thurai kim kowi khowm maru suiah khai.9Amatni dow alai kowh Gibeah kowi uowi khe kowh iawng chang ngak khai.Thurai mih amatni kowh angak natuak pe kown,now amatni kowh angak rakowi amatni kowi aia naripah kown.10CHAKRAMANG tek mih,“Süngrüp süngkangma kowi ka grep uih mih iawng Israeluüa kowi ang kaah mih chowdiah,now uidut singh kowi kowh uih müng iawng alai chowng khe kowh enni pipu-uüa kowi ang tuakah chowdiah.Nachenganchepaw amatni dow Bal-Peur tut-e kowkowi khai,now uowiah parukrai mih arup aren kowi tawi chupiia büah khai.Amatni dow amatni naukhi-ah mih arup iawng suiiai kaniaima phaw khai bowt,now suiiai kaniaima tawi uowi büah khai bowt.11Efraim kowh rowsira dow uakling iawng nacham iow kown.Nakhowk khe dow ngeuüa paw nauang dia kown nadowi;mu paw miapaw namu kown nadowi,now chah paw miapaw naka kown nadowi.12Mia iawng mih chünchü thum chah khai chepaw nami chah kowi ang napawta pe kown;amatni kowh dow lowk iachow paw chah nauowi kown nadowi.Ang powtta pe mih khin khe amatni dow lainowmma nakawm nakrat kown.Amatni kowh piakra nauang ting kown mih dow kramra uowi lai kowbow!13Tura marow klangiungma mih iawng Efraim klangiung mih ang khi khai.Nachenganchepaw kawmat Efraim dow aia chauüa kowi angen miuüa tut-e nacham pawla kown,” pakhai.14Aw CHAKRAMANG, mami maru-uüa vüi tawng chow ang nalü kown?Tawng chow amatni kowi en napeah kown?Amatni kowh chah ruih hai iawn dow piakta pe diah;amatni dow hang pacham ka chah lah.15CHAKRAMANG tek mih,“Gilgal kowi amatni kowh türchaura maten uown büah khai,now nakowi mih amatni kowi ang uown suiah khai.Amatni kowi dow ang pren hownia ang naprütta kown;tawngplawng kowchow panow amatni dow chang angak khai.Amatni kowi dow ang nasakrauah kown nadowi bowt;tawngplawng kowchow panow amatni kowh aluchowuüa maten dow kingküa ang khai.16Efraim dow aprün keu mih singh iawng raw khai bowt.Naiawng rakowi aia dow uih paw uih dowi bowt.Aia maru-uüa dow ka chah chepaw ang nakowngta pe kown,amatni lang sakrauah mih chah kowi ang nasaita pe kown,” pakhai.17Amatni dow ang kowh Thurai low chün dowi chekhai.Naiawng rakowi amatni kowi dow Thurai mih nanuata kown,now amatni dow akeng chenchapuüa tut-e nakrawi len panglang kown.
The Seed Company