Hosea10
1Israel dow grep ruih mung asama mih kowi kowh auih achakma mih iawng chekhai.Tawkche aia dow uang kureng ngamlam akeng thurai vüi lang thawp phuchuara ngamlam khai,now aia pren dow uang iuksown ngamlam chupiiaah mih hua ün tawngah ngamlam khai.2Aia kowh maru-uüa saktuak dow kaah sakowm dowi chekhai;kawmat dow amatni mih amatni kowh aprek nakur büah kown.CHAKRAMANG dow amatni kowh phuchuara maten napiakta pe kown,now amatni chupiiaah mih hua maten paw napiakta pe nak kown.3Nakhowk khe amatni natek kown mih,“CHAKRAMANG kowi a-i kram dowi rakowi a-i kowh mang uowi dowi mih chekhai;mang uowi chepaw mang dow a-i vüi tawngpaw nanowng chang kown nadowi chekhai,” pabüah kown.4Maru-uüa dow takham sawi naklak chekhai;amatni dow dai lai hown kham sawi büah khai.Naiawng rakowi amatni tut-e dow tara nowm nadowi mih prung khai;nami dow laih kowi kowh akru uowi mih mawh iawng chekhai.5Samari kowi kowh maru-uüa dow Beth-Aven kowi kowh chia chah rup tawng chü naown kown mih kowi kram khai;nami arup kowh klangiungra dow amatni hownia alakma kowi nacham kuakta pe kown.Naiawng rakowi maru-uüa hai uamowuüa dow uowila uiting uangtak hai kar büah khai.6Nami arup dow Asuria kowi napawla pe kown;nami dow mangkri kowh mangmu vüi kowi napeah kown.Efraim dow naka rukrai kown, now Israel paw aia kamrütta khowk mih rakowi narukrai kown.Tawngplawng kowchow panow amatni kowh maru-uüa dow nami arup kowi owmsak khai.7Asowmchow mih singh mia kowi dow tui nawmla reng;nami iawng Samari maru-uüa hai amatni kowh mang kowi dow nacham pawla kown.8Israeluüa changla angak reng mih arup chupra dow napiak bowk kown;Beth-Aven kowi kowh arah kroma mih kowi kowh chupiiara maten napiak bowk kown,now amatni kowh phuchuara maten paw chuh mung hown natamung bowk kown.Nakhowk khe amatni dow aiuk aiukma mih hungh kowi natek pe kown mih, “Uang iu thia anging bowt!” napa kown.Now asowm asowmchow mih hungh kowi natek pe kown mih, “Anging luk kowi uang iu takla bowt!” napa büah kown.9CHAKRAMANG tek mih,“Aw Israel, Gibeah kowi uowi khe hownia kawmat pat en chang lup ngak reng tak,lup ngak chang mih en uang huah ngamlam khai.Naiawng rakowi Gibeah marow kowi ransu-uüa nauang sen en kown.10En kowi dow ang nau khe ang narip en kown.En kowh angak dow uang hu ngamlam chekhai;naiawng rakowi nauang sen en kownkow chenchap ahuma kowi ang nauang chinah kown.11Efraim dow asangia lai tuktama mih chiama iawng,aia dow cha thua dawma mih chiama iawng chekhai.Aia kowh ngawng klangiungma mih kowi dow ang natang pe laithawn tim kown.Juda kowi dow kür hown ang nape küngah laithawn tim kown,now Jakawb kowi dow akhawtma mih bawn ang nape pawkah kown.12“Ang tek mih, ‘Tachi tanawmra liu iung dow sawt büa diah,now sakraura luprak dow enni naka ngen kown.Bawn iawng akhawtma mih enni kowh sak thawnah büa diah;tawngplawng kowchow panow CHAKRAMANG kowi nacham kown mih khin kawmat chowbowt.Enni che aia kowi cham hanow aia mih nauang kown,now tachi tanawmra mih aia nauang pe enni kown,’ pakhai.13“Nachenganchepaw angak liu mih enni sawt khai;angak sung dow enni ngenah khai,now kuan rak dow enni chaah khai.Enni matia kowh kür kowi enni owmsak khai,now enni kowh tasen müa siphai akawmma mih luk kowi enni neplawng nesak khai.14Kawmat dow enni pungmadawng kowi kramra uowima mih tasen naphaw kown.Enni kowh akhawtma mih kangchawngra kim maten natapiak kown,naiawngün dow Beth-Arbel marow kowi Salman senah khe kowh iawng natapiak kown.Nami ni khe dow u-uüa hai chauüa kowi mih kowng pat krawng kowi maru theuah khai.15Aw Bethel, en kowh angak dow nowm nowm hu khai bowt;naiawng rakowi en paw Beth-Arbel iawng naphaw kown.Uar thowi hanow Israel mang kowi asaima napiakta kown,” pakhai.
The Seed Company