Hosea11
1CHAKRAMANG tek mih,“Israel kowi ngeuüa reng tak khe ang sakrauah khai;ang chapa kowi Aigupta pren hownia ang uang hawla khai.2Nachenganchepaw Israel dow ang hawah ngamlam powt ngamlam chekhai;aia kowh maru-uüa dow tawncher hown Baal thurai kowi phuchuaah khai,now arup kowi ün nam iungma mih maikhük cham towk pe khai.3Efraim kowi sangah mang mih dow ang matia chowdiah,now aia kowi kowh dawnah paiah mih paw ang matia chowdiah.Nachenganchepaw aia kowh maru-uüa dow tuk ang büah dowi,amatni kowi iungah mih dow ang matia ngengche pami tuk büah dowi chekhai.4Ang dow sana sakraura hown amatni kowi ang kruiah reng chowdiah;amatni kowh pangkawt hownia namuai dow ang uowt pe reng chowdiah,now mum se amatni kowi dow ang peah chakkham reng chowdiah.5“Nachenganchepaw Israeluüa dow tarip now ang tut-e uang plan kown nau dowi;naiawng rakowi amatni dow Aigupta kowi uowi khe kowh iawng nauowi iawk kown,now amatni kowi dow kür hown Asuriauüa vüi nape changah lup kown.6Amatni kowh marow towng kowi dow tasen kraingma nauowi kown;amatni kowh tap dow natapiak bowk kown,now amatni kowh sangkrangra angakma mih rakowi amatni dow napiak kown.7Ang maru-uüa dow ang hownia napowt kown mih kamrüt khai bowt;lang kri lang kraing mih Thurai pahai haw ang chepaw amatni dow ringkaw ang nowm dowi chekhai.8“Efraim, tawng iawng chow ang nape powt en kown chow?Israel, tawng iawng chow akeng mih maru rut kowi ang naap en kown chow?tawng iawng chow Adma hai Zebuim iüah kowi iawng ang napiak en kown chow?En rakowi ang kowh sak mih lainowmma rau khai,now ang kowh saksing sanara uang hu khai.9Ang kowh kramra uowima mih kunmarau ang nape lawtah kown nadowi;tawngplawng kowchow panow ang dow lusa maru nadowi, ang dow Thurai chekhai.Naiawng rakowi Efraim kowi dow ang napiakah kown nadowi;Efraim tut-e kowh chimsaima uowi mih ang na chekhai,now ang kowh kunmaraura mih ang nauang pawla pe kown nadowi.10En maru-uüa mih ang kung kowi nauang krawi kown;tawngplawng kowchow panow krangsi hek klow iawng atünma ang nahawah kown.Ang hawah mih khin khe ang maru-uüa dow nauang plan kown,amatni dow satkup hownia chür se nauang plan kown.11Amatni dow Aigupta pren hownia uakling iawng nauang kown,amatni dow Asuria pren hownia uatur iawng chür se nauang kown.Amatni kowi dow amatni kowh kim kowi ang nape uowiah iawk kown;ang CHAKRAMANG, mami laiklow ang tek khowk,” pakhai.12CHAKRAMANG tek mih,“Efraim kowh dai lai hai Israel kowh limmara dow virta ang lut khai;Juda dow kaah sakowm mih Thurai chimsaima mih kowh lai chün pe dowi chekhai,” pakhai.
The Seed Company