Uown Thawp49
Achapauüa kowi Jakawb peah prasi hai piati mih
1Nami kung kowi achapauüa kowi Jakawb hawah now tek pe mih, “Enni bowkbowk ang tut-e uang büa diah. Pur prakowi tawng iawng chow enni kowh chownglawng nata own kown mih ang natekla enni kown.2“Jakawb kowh chapauüa low, enni bowkbowk ang tut-e uang büa diah,enni kowh pa Israel tekla enni lai kown mih sünta büa diah.3“Reuben, en dow ang kowh chapa ta;en dow ang kowh kür, ang rik kaah mih chah chekhai;en kowh dow ringkawra hai kürra en naumowuüa kowh lak-e lainowmma lang hu.4Nachenganchepaw en dow nowng town sak dowi chekhai,ang changla masi mih narma hown en taphua taiua hanow en sürlawk ang mawk rah khai.Naiawng rakowi en kowh chah ta rah dow nauowi kown nadowi bowt.5“Simiawn hown Levi iüah dow lup ngak prakowi auiua chekhai;amatchi dow nachangla angak kownkow dowk saidawng khai.6Amatchi dow kunmarau now sai maru sak reng,amatchi dow aiawnglowma krawi tüng chia uowntüng sa reng chekhai.Amatchi kowh sangkrangra ngak kowi dow ang tawi talük takak dowi,ang dow amatchi kowh thumchak nadowi chekhai.7Amatchi kowh kunmaraura kramra uowima mih dow pacham ka piati lah.Amatchi kowh kunma ngak dow pacham ka piati lah.Amatchi kowh krungchakuüa kowi dow ang nasetta pe plawt kown;amatni dow Jakawb kowh akeng mih chauüa tut-e nacham krawi uowi kown,amatni kowi dow Israeluüa pungmadawng kowi ang nauetta plawt kown.8“Juda, en kowi dow en tainau-uüa nakiow en kown,en kowi dow en tainau-uüa nachup en kown.Tawngplawng kowchow panow ransu-uüa kowi en nowngta kown chekhai.9Ang chapa Juda, en dow krangsila powrchow iawng akürma;cham makah mih chak en ki chala now en uowi rah kowi en uang plan khai.Krangsi iawng dow en mawk hanow en müi khai,amia iawng mih paw uam krüng en dowi chekhai.10Juda, en krungchak hownia dow mang nauang uowi reng kown,en krungchakuüa dow nakruitown pren kown;en kowi dow maru nauang pawla en awmrawm sung reng kown,en kowh ana pek dow chenchapuüa maten nachün en reng kown.11Juda, grep ruih hu lai rakowi grep ruih kowi en nakhuowk kawrngaramchük kown,now grep ruih prek lang iung mih kowi kawrngaramchük chah en nakhuowk pe kown.Mün khowt chow grep tui hu kown mih dawnguan khowm padow en naia chu kown,en kowh tawnguat dow grep tui avima mih hown en nachuah kown.12Kham grep tui lai kowh en kowh mik dow grep tui lak-e nalang rik kown,kham iawn tui lai kowh en kowh iüng dow iawn tui lak-e nalang kaw kown.13“Zebulun dow sata pang kowi nauowi kown,aia kowh uowi rah dow chawnlawng naira nachowng kown.Aia kowh pren sünghi dow Sidawn marow mowr naiuk kown.14“Isakar dow akürma mih kawrngaramchük iawng chekhai.Nachenganchepaw aia dow kurdik takra kowi mawk khai.15Aia dow aia kowh pren klangiung mih nakhi kown,now aia kowh tanaira sowr uowi mih natuk kown;naiawng rakowi nakur kurdik kownkow aia dow pangkawt towng natakla kown,aia dow nar iawng akratma mih lup chang natakla kown.16“Dan paw Israel chen kowi kowh akeng miuüa iawngaia maru-uüa kowh tara chet mih nachowng kown.17Aia dow ransu-uüa tut-e tiama ria kowi kowh rua iawng,tia keng kowi kowh akru uowima mih rua iawng naown kown.Aia dow nachawt kawrnga klowng kown,now kawrnga chowm mih dow kung prakowi nadowh kown.18“Aw CHAKRAMANG, en nauang lawng ang kown,en nauang lawng kown mih kowi ang hawt chawng reng chekhai.19“Gad kowi dow maru nauang thowkah hia kown.Nachenganchepaw nami hia kowi aia nahawt krawiah kown.20“Aser kowh süng kowi dow lainowmma luprak naphaw kown;aia dow mang kowi achak iungma mih chakkham napeah kown.21“Naptali dow thaulangma mih naki iia iawng,aia kowh chauüa dow klangiungma kangowh chekhai.22“Josef krungchak dow lainowmma naprung kown;aia dow tui ria kowi kowh auih achakma mih singh iawng,aia dow amia klang rengreng mih singh iawng chekhai.23Salangba ap miuüa dow aia kowi lainowmma senah khai,leba sek hown ap-ah rakowi aia dow lainowmma ngare khai.24Nachenganchepaw Jakawb kowh akürma mih Thurai rut dow Josef tut-e uowi reng,Israeluüa kowh Singku Huamang hai mingkhet miia dow aia tut-e tawi uowi reng chekhai.Naiawng rakowi aia kowh salangba dow achükma uowi reng,aia kowh rut paw akhawtma uowi reng chekhai.25Ang kowh Thurai dow nakhowng en kown.Lowra nowngia chang mih Thurai dow nape en prasi reng kown;aia dow kuang hownia nape en uang tui kown,krawng dak hownia paw nape en krawng dawng tui reng kown.Masiuüa hai tawncherma kowi paw ahuma nape kaah chah kown,now amatni buk kowi iawn tui paw nape uowiah reng kown;aia dow naiawng hai nape en prasi kown.26Ang pe en mih prasira dow pipu-uüa kaah mih lak-e lang hu.Nami dow alai chowng khe kowh hungh hownia kaah mih luprak la rak lak-e lang hu.Nami prasira dow Josef pacham ka lah,aia dow atainau-uüa lak-e lang iuk mih chekhai.27“Benjamin dow arangpranma mih sui iawng;rau-e dow nakrawi sai ransu kown,now iak pra dow cham rupla mih uanh naret kown,” pakhai.28Maiawngünuüa dow Israel kowh laipre chen maru chekhai. Maiawngün lai dow amatni kowi amatni kowh pa peah prasi khe kowh tek pe mih chekhai. Naiawng hai amatni kowh pa dow amatni bowkbowk kowi pela prasi khai.29Akung kowi achapauüa kowi Jakawb peah ana mih, “Ang kowh dow pipu-uüa tut-e mang kown mih khin uang na iawlaw khowk. Naiawng rakowi ang kowi paw ang pipu-uüa kowi kowh towah mih puk kowi kowtow ang diah. Nami puk dow Hit chenchap Efrawn kowh laih le kowi chekhai.30Nami puk dow Kanan pren kowi kowh Mamre marow re-e kowh Makpela pami arah dakchow kowi chekhai. Nami puk dow nachangla chengrawng kownkow Hit chenchap Efrawn hownia laih hailawm apu Abraham ranah mih chekhai.31A-pu Abraham hai a-pi Sari iüah kowi mih nakowi dupah khai. Now a-pa Isak hai a-u Rebeka iüah kowi paw nakowi dupah khai. Now Leah kowi paw nakowi ang dupla khai.32Nami laih dow puk hailawm Hituüa tut-e kowh ranah mih chekhai,” pakhai.33Jakawb mih achapauüa kowi ki pela ana kung kowi dow awr mawk khai bowt. Nami kung kowi dow aia kowh sak mih that khai bowt. Aia dow kowng hanow aia pipu-uüa tadupra kowi tawi tadup khai bowt.The Seed Company