Uown Thawp48
Manase hai Efraim iüah kowi Jakawb peah prasi mih
1Nami pre sum ni kung kowi dow Josef mih a-pa Jakawb arau uowi pami satang ta khai. Naiawng rakowi aia dow achapa Manase hai Efraim iüah pre ia kowi pawla now nakowmü a-pa kownkow kowkowi khai.2Josef kowtowm mih khin khe Jakawb kowi maru kowtek pe mih, “En chapa Josef uang mü en kownkow uang khowk,” pakhai. Nami tata hanow Jakawb dow aia kowh kür uowi mih maten hown phangbek kowi awr chowm khai.3Now Jakawb tek pe Josef mih, “Lowra nowngia chang mih Thurai dow Kanan pren kowi kowh Luz marow kowi ang tut-e uang tatüng hanow pe ang prasi khai.4Thurai tek ang mih, ‘En kowi mih chauüa akawmma ang nape en kown. Naiawng rakowi en kowh krungchakuüa hownia chenchap ahuma nauang uowi kown. En kung kowi kowh nauang ta uowi kown mih en kowh krungchakuüa kowi dow chowngchowng saksakma vüi nachangla dawngthawnguan kownkow mami pren ang napeah kown,’ pakhai.5En tut-e ang uang dowi rawn khe kowh Aigupta pren kowi en kaah mih en kowh chapa pre ia dow ang kowh chapa padow nadowkah kown. Reuben hai Simiawn iüah iawng Efraim hai Manase iüah paw ang kowh chapa chekhai.6Nachenganchepaw kowiüah kung kowi kowh uang ta dia mih chauüa maten kowi dow en kowh chauüa padow nadowkah kown. Naiawngünuüa dow ang kowh dawngthawnguan natawi ka powng kown nadowi. Tawkchedow amatni kowh taimow Efraim hai Manase iüah kowh dawngthawnguan bak hownia natawi ka powng büah kown taih.7Naiawng ang chang mih dow en u Rahel rakowi chekhai. Aia dow Padan-aram hownia ang uang lawt mih khin khe Kanan pren kowi kowh Efrat marow tiama rawng kowi kowng khai. Naiawng rakowi lainowmma ang sak nga khai. Aia kowi dow Efrat tia keng kowi ang dupla khai,” pakhai. Efrat dow Bethlehem pami chekhai.8Nami kung kowi Josef kowh chapa pre ia prakowi haimü hanow Josef kowi Jakawb lüntaah mih, “Kowiüah dow mia chow?” pakhai.9Josef tek pe a-pa mih, “Kowiüah dow ang kowh chapa chowbowt. Kowiüah kowi mami pren kowi Thurai pe ang mih chowbowt,” pape khai.Jakawb tek pe mih, “Kowiüah kowi ang tut-e uang pawla diah. Kowiüah kowi ang peah prasi tak,” pakhai.10Jakawb mih lawngtang lai bowt rakowi khi mik kaneu dowi bowt. Naiawng rakowi Josef mih achapa pre ia kowi a-pa tut-e kowpawla pe khai. Nahanow Jakawb mih amatchi kowi hawt dawiah now namah khai.11Now Jakawb tek pe Josef mih, “En kowi ang plan khi iawk kown mih mapaw ang ming dowi bowt chowdiah. Nachenganchepaw Thurai dow en kowi krowngchow nadowi kowi en kowh chapa pre ia kowi paw pe khila ang khai,” pakhai.12Nakhowk khe Josef dow a-pa thung hownia achapa pre ia kowi pawta now krawng kowi tabawk krawm se a-pa kowi chupah khai.13Nami kung kowi dow Josef mih achapa pre ia kowi a-pa Jakawb tut-e uang plan pawla pe khai iawk. Josef dow Efraim kowi hawmlawm rut hown dowkah now Israel lakuai prakowi towah khai, now Manase kowi dow lakuai rut hown dowkah now Israel hawmlawm prakowi towah khai.14Nachenganchepaw Jakawb dow aia kowh bawng kingkaiah now Josef kowh chapa sawi mih Efraim lu kowi aia kowh hawmlawm rut tang pe khai, now aia kowh lakuai rut dow Josef kowh chapa ta mih Manase lu kowi tang pe khai.15Nakhowk khe Josef hai Josef chapauüa kowi Jakawb peah prasi mih,“Ang kowh pipu Abraham hai Isak iüah dow Thurai hown taklawp taiua reng chekhai,nami Thurai dow ang chownglawng kowi auown hownia kawmat mowr pat mingkhet ang reng chekhai.16Thurai dow angak maten hownia uang lawng ang khai,aia dow kowiüah kowi pacham peah prasi lah.Kowiüah hownia dow ang hai Abraham hown Isak kowh ming pacham ka tuak reng lah.Palusama kowi kowiüah kowh krungchakuüa mih aiun akawmma pacham prung lah,” pakhai.17Tawkchedow Efraim lu kowi a-pa tang pe hawmlawm rut mih khita hanow Josef mih sak-ih dowi chekhai. Naiawng rakowi a-pa kowh rut Efraim lu hownia pawta pe hanow Manase lu kowi Josef tang pe kownkow krowngta pe khai.18Josef tek pe a-pa mih, “Apa, naiawng nadowi. Ang kowh chapa ta dow mami chekhai, en kowh hawmlawm rut aia lu kowi tang pe diah,” pakhai.19Nachenganchepaw a-pa dow nauta pe dowi kowh tek pe mih, “Ang tuk chow le pa, ang tuk chow. Aia paw akri akraingma naphaw kown taih, now aia kowh krungchak maru-uüa hownia mih chenchap nauang phaw lowk kown. Nachenganchepaw aia kowh naumow mih aia lak-e nalang kri kraing kown, now aia krungchak maru-uüa hownia mih chenchap ahuma nauang phaw kown,” pape khai.20Naiawng rakowi Israel dow nami ni khe amatchi kowi peah prasi mih, “Israeluüa tape prasi mih khin khe enchi ming rükla se natek kown mih, ‘Thurai dow Efraim hai Manase iüah kowi iawng pacham chang en lah,’ napa kown,” pape khai. Naiawng hai Jakawb dow Manase kowi lak-e Efraim kowi lang peah iukra khai.21Nami kung kowi Israel tek pe Josef mih, “Sünta diah, ang kowh dow kowng khin uang na iawlaw khowk. Nachenganchepaw Thurai mih natawi uowila enni reng kown taih, aia dow enni pipu-uüa pren kowi naplan pawla enni iawk kown.22En tainau-uüa kowi lak-e ang lang pe en dawngthawnguan hu mih chowbowt. Sekem kowi kowh arah lang iung mih ang peta en mih chowbowt. Nami arah dow Amawruüa kowi saidawng hai salangba hown ang senah kowh ang awngah mih chekhai,” pakhai.
The Seed Company