Uown Thawp42
Aigupta pren kowi Josef tainau-uüa kowkowi mih
1Aigupta pren kowi chakkham uowi pe pami Jakawb tawi ta khai. Naiawng rakowi aia dow achapauüa kowi tek pe mih, “Tawngplawng kowchow naiawng enni tamüla mak reng tak?” pakhai.2Jakawb plan tek pe mih, “Sünta büa diah, Aigupta pren kowi chakkham uowi pe pami ang ta khowk. A-i nakowngla dowi kownkow nakowi kowtawi ran a-i chakkham büah dit snow,” pakhai.3Naiawng rakowi Josef kowh taimowuüa hamüt ia mih kowtawi ran chakkham kownkow Aigupta pren kowi kowkowi khai bowt.4Nachenganchepaw aiung angak nacham own tarawng pami rakowi Josef naumow Benjamin kowi dow ataimowuüa tut-e Jakawb krawi chin pe dowi chekhai.5Aigupta pren kowi kowran chakkham mih akeng maru-uüa thum kowi Israel kowh chapauüa paw tawi uowi khai. Tawngplawng kowchow panow Kanan pren kowi paw nami khown dow kuak khai bowt.6Josef dow Aigupta pren kowi kowh kruitown mih chekhai. Pren maten kowi nasum chakkham kown mih kurdik dow aia luk kowi chekhai. Naiawng rakowi Josef kowh taimowuüa mih Josef pur kowi kowkowiah now krawng kowi tabawkah krawm se kowchupah büah khai.7Josef dow ataimowuüa kowi tuk matah khai. Nachenganchepaw tuk matah dowi mih iawng aia dow lai rangma hown ataimowuüa kowi klangah khai. Aia tek pe mih, “Tawng hownia chow enni uang?” pakhai.Ataimowuüa tek pe Josef mih, “Uang ran chakkham kownkow Kanan pren hownia anging uang mih chekhai,” pabüah khai.8Ataimowuüa kowi Josef tuk matah chepaw ataimowuüa dow Josef kowi tuk matah dowi chekhai.9Nakhowk khe Josef dow ataimowuüa lawnguan kowi kowh aia khi-ah mih mang ka tuak khai. Now aia dow ataimowuüa kowi tek pe mih, “Enni dow uang krawi kumit mih maru chekhai. Tawng mih re-e chow anging pren kowi achawng mih uowi mih uowi dowi mih enni uang krawi kumit mih chekhai,” pakhai.10Ataimowuüa tek pe Josef mih, “Nadowi chakramang, en naruüa uang ran chakkham mih chowtaih.11Anging dow apa sang mih chah chekhai. Anging dow maru ngak nadowi, en naruüa dow uang krawi kumit mih maru nadowi,” pabüah khai.12Nakhowk khe Josef plan tek pe mih, “Nadowi iowh, anging pren kowi tawng mih re-e chow achawng mih uowi mih uowi dowi mih uang mü kownkow enni uang mih chekhai,” pape khai.13Nachenganchepaw ataimowuüa tek pe Josef mih, “En kowh naruüa dow taichow nauchow kangowh, anging taichow nauchow dow laipre ia chekhai. Anging dow Kanan pren kowi kowh maru lowk ia kowh chapauüa chowtaih. Anging laipre ia kowi lang sawi mih dow apa tut-e ta uowi khai, now lowk ia dow kowng khai bowt,” pakhai.14Josef tek pe ataimowuüa mih, “Enni lawnguan kowi ang tek mih na khai nowm. Enni dow dumiow chekhai.15Nachenganchepaw aching chünchü mih ang nachaing enni kown; enni kowh naumow lang sawi mih makowi uang ting dowi mowr mami hownia enni naia lawt kown nadowi. Mami laiklow mih Faraw kowh sak lüklau hown ang tek khowk.16Enni kowh naumow kowi nauang pawla kownkow enni pungmadawng hownia kowchin maru lowk ia diah, now akeng miuüa dow thawngrum kowi nata uowi kown. Nahanow enni kowh laiklow aching chünchü mih ang natuk kown towbowt. Tawkchedow enni kowh naumow kowi che enni uang ia pawla dowi kowh chalow now Faraw kowh sak lüklau hown ang tek khowk, enni dow krawi kumit mih maru chekhai,” pakhai.17Naiawng hai Josef dow ataimowuüa kowi sum ni mowr thawngrum kowi towah khai.18Sum ni kung kowi Josef tek pe ataimowuüa mih, “Ang dow kram Thurai khai. Naiawng rakowi enni kowh asak sing kown nau now ang tek iawng chang büa diah.19Enni che maru iungma na khai kowh chalow now enni taichow nauchow pungmadawng hownia thawngrum kowi pacham ta uowi lowk ia lah; now akeng miuüa dow kim kowi kowh akhawr hown uowi miuüa vüi pawla chakkham now pacham mang lah.20Enni kowh naumow lang sawi mih kowi ang tut-e uang pawla khe chiang enni tekah mih laiklow na khai nowm pami ang natuk kown. Nahanow kowngra hownia enni naplai kown towbowt,” pakhai. Now Josef tek iawng ataimowuüa nauta khai.21Nami kung kowi amatni dow lowkkowlowk tatek mih, “A-i naumow luk kowi a-i chang nowng khai rakowi mami ripra a-i tut-e uang towm mih chekhai. A-i tut-e aia lü lawt mih khin khe aia kowh saktuak krat mih a-i khi pe khowk chepaw a-i pe pe ching dowi chekhai. Naiawng rakowi mami kratra a-i luk kowi uang towm mih chowbowt,” pabüah khai.22Nakhowk khe anaumowuüa kowi Reuben tek pe mih, “Aia luk kowi tawng iawng mih angak paw hangkow chang pami ang tek enni khowk chowdiah. Nachenganchepaw ang laiklow enni sünta ang dowi. Kawmat dow aia kowi saita mih sung a-i ka kown mih khin uang towm khowk,” pakhai.23Ataimowuüa kowh laiklow Josef tukta mih ataimowuüa tuk dowi chekhai. Tawngplawng kowchow panow amatni hown taklang mih khin khe amatni takra kowi lai plan mih tawi uowi lowk ia chekhai.24Josef mih ataimowuüa hownia alak sangrumchow cham powt hanow cham kar khai. Nami kung kowi dow aia mih uang plan hanow ataimowuüa hown uang plan taklang khai iawk. Now Josef mih ataimowuüa pungmadawng hownia Simiawn kowi dowkah now amatni pur kowi natawmah kownkow aia maru-uüa kowi peah ana khai.25Nami kung kowi ataimowuüa kowh sala kowi nachua pe chakkham hanow nami sala lak kowi tangka paw nakrawi plan phang pe kownkow aia maru-uüa kowi Josef peah ana khai. Nami klen kowi tiama rawng kowi kowh ataimowuüa nacha nakhamla kown mih chakkham paw nakrawi peah kownkow peah ana khai. Naiawng hai Josef kowh naruüa dow Josef tekah iawng krawi chang pe khai.26Nami kung kowi dow Josef taimowuüa mih amatni kowh kawrngaramchük luk kowi tangla chakkham sala now mang büah khai.27Now amatni naiakah kown mih arah kowi tanai büah khai. Nami khin khe amatni tainau pungmadawng kowi lowk ia mih pe kawrngaramchük chakkham kownkow kowlat sala hanow sala mowr kowi kowh tangka khita khai.28Nami khin khe aia dow atainau-uüa kowi tek pe mih, “Mü büa diah, ang kowh tangka krawi planta ang khai. Nami tangka dow ang kowh sala mowr kowi uowi,” pakhai. Naiawng amatni khi hanow lainowmma kram büah khai. Amatni dow chür se chür se lowkkowlowk tatek mih, “Tawng iawng chowbowt chow Thurai chang a-i?” pabüah khai.29Amatni dow Kanan pren kowi kowtowm hanow naiawng phaw mih lawnguan a-pa Jakawb kowi kowlawp pe bowk khai.30A-pa kowi amatni tek pe mih, “Aigupta pren kowi kowh kruitown miia lai rangma hown hawt klang anging khai. Aia dow amatni pren kowi kowkrawi kumit mih maru padow ka tuak anging khai.31Nachenganchepaw aia kowi anging tek pe mih, ‘Anging dow maru iung chowtaih, krawi kumit mih maru nadowi.32Anging taichow nauchow laipre ia mih dow apa sang chekhai. Anging laipre ia kowi lowk ia mih dow kowng khai bowt, now lang sawi mih dow Kanan pren kowi apa tut-e ta uowi khai,’ padow anging tek pe khai.33“Nakhowk khe nami pren kruitown mih tek anging mih, ‘Maiawng enni chang ang dowi mowr maru iung pami ang owm enni kown nadowi. Enni pungmadawng hownia ang tut-e ta uowi lowk ia hanow akeng miuüa dow kim kowi kowh akhawr hown uowi miuüa vüi tawng ngai chow lakke mih pawla now mang büa diah.34Now enni kowh naumow kowi ang tut-e uang pawla büa diah. Naiawng enni uang pawla khe chiang enni maru iung, krawi kumit mih maru nadowi pami ang naka tuak kown. Nakhowk khe chiang enni kowh tainau kowi ang lawt enni kown, now mami pren kowi enni ia chang kun kown,’ padow tek anging khai,” pape büah khai.35Nami kung kowi dow amatni mih klaita sala kownkow lat sala khai bowt. Nakhowk khe amatni bowkbowk kowh sala mowr kowi tangka uowi bowk chekhai. Naiawngün khita hanow a-pa Jakawb hai amatni tainau bowkbowk dow lainowmma kram büah khai.36Achapauüa kowi Jakawb tek pe mih, “Enni namata ang chah bowk kown chekhai. Josef kowng khai bowt, now Simiawn paw uowi dowi bowt. Nami klen kowi Benjamin kowi paw pawla kown mih enni nau khai. Enni towk ang kawm lai kowbow!” pape khai.37Nakhowk khe Reuben tek pe a-pa mih, “Benjamin kowi che en tut-e ang uang ia pawla dowi kowh chalow now ang kowh chapa pre ia kowi kowngta now na towbowt. Benjamin kowi mih ang rut kowi krawi ap ang diah. Aia kowi en tut-e ang nauang plan pawla en ngengche sow,” pakhai.38Nachenganchepaw Jakawb tek pe mih, “Benjamin kowi dow enni tut-e ang nape tawiah kown nadowi bowt. Aia kowh taimow sin Josef mih kowng khai bowt, kawmat ta sing uowi mih dow aia lowk iachow towbowt. Tiama rawng kowi aiung angak enni krum khai e dow mami lawngtang kowi akawm akratma hown kowngra kowi enni nasaah kown chekhai,” pape khai.
The Seed Company