Uown Thawp41
Faraw khi mang mih
1Nami pre ning kung kowi dow Faraw mih khi mang lowk khai. Mang lak kowi aia khi mih dow Nail aw pang kowi aia iowng phülü khai.2Nami khin khe chia aiuk akauma kangowh mih ranit pum tui hownia uang awr towk hanow aw pang ria kowi kowh bawrchak bia kowi awr taw iualua khai.3Nami kung kowi paw nami aw hownia arawngrangma kangowh mih chia uang plan towk ranit pum khai iawk. Naiawngün dow aw pang ria kowi kowh aiuk akauma kangowh mih chia hawmh ria kowi kowtawi iowng khai.4Nakhowk khe arawngrangma kangowh mih chia hawmh dow aiuk akauma kangowh mih ranit pum mih chia hawmh kowi uang chata bowk khai. Now Faraw dow awr thowr khai.5Nami kung kowi paw aia dow kutplan müi hanow plan khi mang lowk iawk. Nami khin khe aia khi mih dow cha akawngchow mih kowi chapüi achakma kangowh mih uang awr lawt ranit püi khai.6Nami kung kowi dow keureuchow hai apli kangowh mih chapüi uang ta lawt ranit püi khai iawk. Naiawngün chapüi dow satlawt li den hown kowh keu mih chekhai.7Naiawngün chapüi dow uang rik lawt mih achakma kangowh mih ranit püi mih chapüi kowi uang iawnta bowk khai. Nami kung kowi dow Faraw mih thowr khai bowt. Now naiawngün dow mang lak kowi kowh aia khi-ah mih chowtaih padow aia tatuk khai.8Nachenganchepaw rau-e khe dow aia kowh saktuak mih lainowmma pusa khai. Naiawng rakowi aia dow kowchin maru hanow Aigupta pren kowi kowh maiaklese sara hai chanlai miuüa maten kowi uang hawla khai. Naiawngün maru-uüa kowi dow mang lak kowi kowh aia khi-ah mih phat pe khai. Tawkchedow nami mang uan mih naiawngünuüa miapaw nowng phuang pe dowi chekhai.9Nami khin khe Faraw kowh grep tui pek mih aluchow tek pe mih, “Mangkri, ani dow ang kowh angak lawnguan ang ka tuak khai.10Akat khe mih ang hai en kowh kawm thawp mih aluchow luk kowi en kunmarauah khai. Nami khin khe kangchawng mih aluchow kim kowi kowh thawngrum lak kowi en tow angching khai.11Nami thawngrum kowi angching uowi khe paiak sang angching khi mang lowk chi khai. Nami mang uan dow alangma kangowh chekhai.12Nami khin khe nakowi mih kangchawng mih aluchow kowh nar klanguüachow mih paw tawi uowi lowk ia, nami klanguüa dow Hebrai maru chekhai. Nami klanguüa kowi angching kowh mang angching phat pe khai, now nami mang uan dow aia phuang angching khai.13Now angching kowh mang uan nami klanguüa phuang angching mih iawng dow uang phaw bowk khai. Ang kowi dow ang changla mih lup en pe chang ang khai iawk. Nachenganchepaw kawm thawp mih aluchow kowi dow singh kowi en tarah khai,” pakhai.14Nahanow Faraw dow Josef kowi nakowhaw kownkow kowchin maru khai. Josef kowi dow alenma thawngrum hownia uang lawtla khai bowt. Josef dow khaita mawmpawi hanow leta tawnguat khai, now Faraw pur kowi kowkowi khai.15Nami khin khe Faraw tek pe Josef mih, “Ang khi mang lowk chowdiah. Tawkchedow nami mang uan miapaw nowng phuang ang dowi. Nachenganchepaw phat en mang now nami auan en nowng phuang pe pami ang ta,” pape khai.16Josef tek pe Faraw mih, “Nami kür dow ang kowh uowi dowi. Nachenganchepaw Thurai mih naphuang en mang uan hanow nape en sakklamra kown taih,” pakhai.17Nakhowk khe Faraw tek pe Josef mih, “Mang lak kowi mih Nail aw pang kowi ang iowng phülü chekhai.18Nakhowk khe chia aiuk akauma kangowh mih ranit pum aw hownia uang awr towk hanow aw pang ria kowi kowh bawrchak bia kowi awr taw iualua khai.19Nami kung kowi paw nami aw hownia arawngrangma hai apowm akrangnangma kangowh mih chia uang plan towk ranit pum khai iawk. Aigupta pren paprenma kowi naiawng khowt mih chia klang ngak dow katpaw ang khi dowi tak.20Nami arawngrangma hai apowm klang ngakma mih chia dow uang rik towk mih aiuk akauma kangowh mih chia ranit pum kowi uang chata bowk khai.21Tawkchedow aiuk akauma mih chia hawmh kowi chata büah khai pami mapaw tuk matah dowi. Tawngplawng kowchow panow naiawngün dow aiuk akauma mih chia hawmh kowi chata büah dowi rawn khe kowh iawng aklang ngakma chowreng reng chekhai. Nami kung kowi dow ang thowr khai.22Nami kung kowi paw ang plan khi mang lowk iawk. Nami khin khe ang khi mih dow cha akawngchow mih kowi chapüi achakma kangowh mih uang awr lawt ranit püi.23Nami kung kowi dow keureuchow hai apli kangowh mih chapüi awr ta lawt ranit püi khai iawk. Naiawngün chapüi dow satlawt li den hown kowh keu mih chekhai.24Nami chapüi akeureuchow hai apli kangowh mih dow achakma kangowh mih chapüi kowi uang iawnta bowk khai. Naiawngün dow maiaklese sarauüa kowi ang tek pe khowk chowdiah. Tawkchedow nami auan miapaw nowng phuang ang büah dowi,” pape khai.25Nakhowk khe Josef tek pe Faraw mih, “Mangkri, nami mang pre chap mih auan dow pachapsang taih. Thurai dow aia nachangah kown mih uang tüng en mih chekhai.26Akauma kangowh mih ranit pum mih chia auan dow ranit ning pami chekhai, now achakma kangowh mih ranit püi mih chapüi uan paw ranit ning pami chekhai. En kowh mang pre chap mih auan dow lowkchow taih.27Now akung kowi kowh uang awr ta towk mih arawngrangma hai aklang ngakma mih ranit pum mih chia auan dow ranit ning khown nakuak kown mih ning chekhai. Satlawt li den hown kowh keu mih ranit püi mih chapüi auan paw ranit ning khown nakuak kown mih ning chekhai.28Thurai dow aia nachangah kown mih auan uang tüng en mih chekhai. Ang tek iawng dow nauang ting ngengche kown.29Aigupta pren paprenma kowi ranit ning mowr mih lainowmma luprak naphaw kown.30Nami kung kowi dow ranit ning mowr khown nakuak kown. Nami khin khe dow alai kowh ka luprak ahuma mih Aigupta maru-uüa natamata kown. Tawngplawng kowchow panow nami khown dow napiakta pren kown chekhai.31Nami khown uang kuak mih khin khe dow maru-uüa mih alai kowh ka luprak ahuma mih naka tuak kown nadowi bowt. Tawngplawng kowchow panow nami khown dow lainowmma kramra nauowi kown chekhai.32Naiawng pre kat en khi-ah mih mang auan dow Thurai mih nami lawnguan kowi kamrütta khai bowt, now nami dow alenma aia nauang pe tingah kown chekhai.33“Naiawng rakowi mangkri mih kawmat hownia chanlaima mih hai prengia uowima mih maru kowi krawi cham lowk ia diah. Nami maru luk kowi dow Aigupta pren nakruitownla kown mih kurdik peah diah.34Nami klen kowi lup chang mih kowi kowh nakruitown kown mih maru iukuüa kowi paw pawah ne diah. Pren kowi ranit ning mowr luprak ahuma ka mih khin khe naiawngün maru iukuüa mih tanga bak kowi pabak mih nakrawi paw kown.35Naiawngün maru-uüa mih naiawng ahuma ka luprak khe kowh ning kowi luprak pacham krawi pawah lah; now pur prakowi nacha nakhamah kownkow mang nimkrüa kowi kowh marow towng kowi pacham krümah lah, now nami naming nakhet kown mih maru paw pacham tow pe lah.36Aigupta pren kowi ranit ning mowr khown kuak khe kowh nacha nakhamah kownkow naiawngün chakkham dow nakrümah kown, nahanow khown kuak mih khin khe pren kowi kowh maru-uüa nakowng kown nadowi bowt,” pape khai.37Josef kowh nami laiklow dow Faraw hai aia kowh maru iukuüa tut-e lainowmma iung khai.38Naiawng rakowi Faraw tek pe aia kowh maru iukuüa mih, “Mami maru tut-e dow Thurai Lümla tawi uowi chekhai. Nami maru iawng mih mia kowi chow a-i cham ka bowt kown?” pakhai.39Now Faraw tek pe Josef mih, “Naiawngün tukra dow en kowh Thurai pe en mih chekhai. Naiawng rakowi en klen kowi dow chanlaira hai prengia uowima mih maru miapaw uowi dowi bowt tham.40Naiawng rakowi ang kim kowi kowh kurdik maten en napaw kown takla. En kowh ana pek iawng ang kowh maru-uüa nachün kown. Ang kowh lang iukra dow ang kowh mang chowm rah kowi krowngchow towbowt,” pakhai.41Nami klen kowi Faraw tek pe Josef mih, “Aigupta pren paprenma kowi kruitown mih arah ang peta en khowk pami sak kowi towah diah,” pape khai.42Nami kung kowi dow Faraw mih aia kowh mur uowi mih rutbüt aia rut hownia klüpah hanow Josef kowi krua pe khai. Now aia dow Josef kowi tawnguat klangiungma mih khup pe hanow ngawng kowi ü pe kuh leng khai.43Now aia pren kowi kowh pre lawmbawr mih aia kowh kawrnga kari kowi Josef kowi pe chowmah khai. Nami kawrnga kari cham krawi lün mih khin khe Josef pur kowi maiawng krawi rik tek khai, “Tua kung büah, tua kung büah,” pakhai. Naiawng hai Faraw mih Aigupta pren kowi nakruitownla kown mih kurdik maten Josef kowi peah khai.44Now Faraw tek pe Josef mih, “Ang mih kawmat paw mang chowreng tak. Nachenganchepaw Aigupta pren paprenma kowi kowh maru maten dow en kowh ana pek nachün kown,” pape khai.45Faraw mih Josef kowi Zefanat Pane pahai rük pe ming lowk khai. Now Pawtifera kowh chama Asenat hown Josef kowi Faraw pe tachawngah khai. Pawtifera dow Awn marow kowi kowh uamow chekhai. Nami kung kowi dow Aigupta pren paprenma kowi Josef cham krawi len kownkow lawt khai.46Aigupta mang ap pe pren kruitown mih rah khe Josef kowh ning dow 30 ning chekhai. Aia dow Faraw chowm rah hownia lawt hanow Aigupta pren paprenma kowi cham krawi len khai.47Now luprak uowi mih ranit ning kowi dow arawn amatma luprak phaw khai bowt.48Josef dow nami ranit ning mih kowi Aigupta pren kowi kowh amaratma mih luprak marow kowi kowh anungra kim maten kowi nungah khai. Aia dow marow riaret kowi kowh üa hai laih hownia kowh luprak ün uang pawla now krümah khai.49Naiawng hai aia dow sata kowi kowh sema iawng luprak ahuma nungah khai. Naiawngün nungah mih luprak dow hu lai bowt rakowi nowng khaiah dowi bowt chekhai. Naiawng rakowi aia dow hing khaiah dowi bowt.50Khown kuak dowi rawn khe Pawtifera kowh chama Asenat hown Josef mih ka chapa pre ia khai. Pawtifera dow Awn marow kowi kowh uamow chekhai.51Josef dow achapa lang ta mih ming Manase pahai rük pe khai. (Manase pami dow “Tamata mih” pami chekhai). Tawngplawng kowchow panow aia tek mih, “Thurai dow ang kowh akrat pusara maten hai apa kimchak lawnguan kowi pe tamata ang khai,” pakhai.52Nami kung kowi kowh chapa kowi dow Efraim pahai Josef rük pe khai. (Efraim pami dow “Pe ka ang chah mih” pami chekhai). Tawngplawng kowchow panow aia tek mih, “Ang kawm kratra pren kowi Thurai mih pe ka ang chah khai,” pakhai.53Nami kung kowi dow Aigupta pren kowi kowh ahuma luprak uowi mih ranit ning chur khai bowt.54Nami kung kowi dow ranit ning mih khown kuak uown tarowng khai bowt. Naiawngün dow Josef tekah iawng uang phaw bowk khai. Aria aret kowi kowh pren maten paw nami khown kuak mih hownia nowngia plai dowi chekhai. Nachenganchepaw Aigupta paprenma kowi dow tawng kowi paw chakkham akhawr uowi dowi.55Aigupta pren kowi khown kuak hanow maru-uüa kowh dow chakkham khowk khai bowt. Naiawng rakowi maru-uüa dow Faraw tut-e kowlü chakkham khai. Nami khin khe Faraw tek pe mih, “Josef tut-e phai kowkowi büa bowt. Aia tek enni mih iawng chang büa diah,” pakhai.56Nami khown dow paprenma kowi krawi kuak khai. Aigupta pren kowi paw nami khown dow arawn amatma chekhai. Nami khin khe Josef dow chakkham nungra kim maten ho pe hanow Aigupta maru-uüa kowi sum pe khai.57Now akeng mih pren kowi paw nami khown dow arawn amatma chekhai. Naiawng rakowi naiawngün prenchak maru-uüa paw Josef tut-e nauang tawi ran chakkham kownkow Aigupta pren kowi uang khai.The Seed Company