Uown Thawp4
Kain hai Abel
1Adam mih amasi Evi hown taphua taiua hanow Evi mih kum nau khai bowt, now ka chapa iüah lowk ia khai. Nami khin khe Evi tek mih, “CHAKRAMANG khowng ang luk kowi ang ka kachakuüa chah lowk ia,” pakhai. Now achapa ming dow Kain pahai rük pe khai.2Nami kung kowi Kain naumow Abel paw uang dia khai. Abel dow ruapur thing mih chekhai, now Kain dow üa lup chang mih chekhai.3Akat khe Kain dow aia üa hownia kowh luprak uang pawla hanow CHAKRAMANG tut-e ap-ah khai.4Now Abel dow aia kowh ruapur hawmh hownia rik pen mih kowi kowh kow lang iung mih ruapur chah uang pawla pre sum pum khai, now naiawngün ngenah hanow asau lang uowi mih nga CHAKRAMANG tut-e ap-ah khai. CHAKRAMANG mih Abel hai aia kowh uanap kowi hawt awmrawm pe khai.5Nachenganchepaw Kain hai aia kowh uanap kowi dow hawt awmrawm pe dowi chekhai. Naiawng rakowi Kain dow kunmarau kowh lumowr akhüp türma uowi khai.6Nami khita hanow Kain kowi CHAKRAMANG tek pe mih, “Tawngplawng kowchow en tuk kunmarau khai? Tawngplawng kowchow lumowr akhüp türma en tuk uowi khai?7En che chang lup iung e dow ang awmrawm en kown taih diah, now en paw naawmrawm kown taih diah. Nachenganchepaw en chang lup ngak khai rakowi angak mih en luk kowi chang alow kownkow hawt pawm en hüah chekhai. Tawkchedow nami angak kowi en nanowngta kown takla,” pakhai.8Akat khe anaumow Abel kowi Kain tek pe mih, “Chu, üa kowi achi kowkowi lah,” pakhai. Now Kain hai Abel iüah dow üa kowi kowkowi khai. Nami khin khe Kain mih anaumow Abel kowi amaisang bawpah now kowngta khai.9Nakhowk khe Kain kowi CHAKRAMANG lüntaah mih, “En naumow Abel tawng kowi chow?” pakhai.Kain klangah mih, “Ang tuk dowi. Ang naumow kowi naming nakhet kown mih kurdik ang luk kowi nadowi,” pape khai.10CHAKRAMANG tek pe mih, “Tawngplawng kowchow naiawng en tuk chang khai? Mü madiah, en naumow kowh vi mih napaw lu klai kownkow krawng hownia ang tut-e uang awr kar khai.11En naumow kowh vi mih krawng kowi en hawkah khai. Naiawng rakowi krawng luk kowi mih en ka piati khai bowt.12Krawng luk kowi en chang üa chang lai mih khin khe krawng mih alai kowh iawng ahuma nape en luprak kown nadowi bowt. En mih naram hanow lusa kowi nacham mang panglang kown,” pakhai.13Nakhowk khe CHAKRAMANG kowi Kain tek pe mih, “Mami ripra dow ang nowng kham dowi mowr chekhai.14Mü madiah, ang kim üa hownia en prütta ang khai bowt, now en hownia alakma kowi ang nauowi bowt kown. Naiawng rakowi lusa kowi ang cham mang panglang mih khin khe lowra maru khi ang mih dow napawta ang asak kown towbowt,” pakhai.15Now Kain kowi CHAKRAMANG tek pe mih, “Naiawng chekhai now paw en asak mih maru kowi ranit dungna ang napaw pe lu klai kown,” pakhai. Now maru krumah chepaw miapaw nasaiah dowi kownkow Kain buk kowi CHAKRAMANG mih tow pe amatra lowk khai.16Naiawng rakowi Kain dow CHAKRAMANG pur hownia powt hanow Eden satlawt pra kowh Nawd pape mih pren kowi kowuowi khai.17Nami kung kowi dow Kain mih amasi hown taphua taiua hanow amasi mih kum nau khai, now ka kachakuüa chah iüah lowk ia khai. Achapa ming dow Enawk pahai rük pe iüah khai. Kain mih thawp marow lowk hanow aming dow achapa ming iawng Enawk pahai rük pe khai.18Enawk kowh chapa dow Irad; Irad kowh chapa dow Mehujael; Mehujael kowh chapa dow Methusael, now Methusael kowh chapa dow Lamek chekhai.19Lamek kowh dow masi uowi pre ma. Lowk mih ming dow Ada, now alowk mih ming dow Zila chekhai.20Ada dow kum nau hanow ka kachakuüa chah lowk ia khai. Achapa ming dow Jabal pahai aia rük pe khai. Jabal krungchakuüa dow tangbung kowi kowh uowi mih hai tawncher tawn miuüa chekhai.21Jabal kowh naumow ming dow Jubal chekhai. Jubal krungchakuüa dow taraw tep mih hai prui tum miuüa chekhai.22Zila paw kum nau hanow ka kachakuüa chah lowk ia khai. Achapa ming dow Tubal-kain pahai rük pe khai. Tubal-kain dow kri hai lawngha hown kowh rutchün khawkleng chap matiow thawp mih chekhai. Tubal-kain kowh tuamow ming dow Naima chekhai.23Akat khe amasi pre ia kowi Lamek tek pe mih,“Ada hai Zila, ang laiklow sünta iüa diah.Lamek masi iüah low, ang laiklow kowi pe ching iüa diah.Klanguüa lowk ia mih pe ang ngarau khai,nami klanguüa kowi mih ang saita khai.24Kain kowi sai mih lu klai che ranit dungna paw pe hanowLamek kowi sai mih lu klai ngam padow ranitkawmkla ranit dungna napaw pe kown,” pakhai.
Set hai Enus
25Nami kung kowi dow Adam mih amasi hown taphua taiua khai iawk. Now amasi mih kum nau hanow plan ka kachakuüa chah lowk ia khai. Nami khin khe Evi tek mih, “Abel kowi Kain saita khai rakowi Thurai mih Abel takcha kowi uang plan pe ang kachakuüa chah lowk ia iawk mih chekhai,” pakhai. Evi mih achapa ming Set pahai rük pe khai.26Nami kung kowi Set mih ka chapa lowk ia khai. Achapa ming dow Enus pahai aia rük pe khai. Nami khin hownia dow maru-uüa mih CHAKRAMANG kowi uown chupiia khai bowt.The Seed Company