Uown Thawp35
1Nami kung kowi Thurai tek pe Jakawb mih, “Kawmat dow Bethel marow kowi kowkowi hanow kowhing uowi towbowt. En taimow Esau hownia en cham powt khe kowh en tut-e uang tatüng mih Thurai vüi nakowi kowthawp pe phuchuara lowk diah,” pape khai.2Naiawng rakowi Jakawb mih aia kimchakuüa hai aia kowh naruüa maten kowi tek pe mih, “Enni tut-e kowh uowi mih arup maten kuakta büa diah, now enni matia paw tachim tasai büa diah. Nami klen kowi enni kowh khupdip tawngklai paw leta büa diah.3Chu, Bethel kowi a-i kowkowi diah sik. Nakowi Thurai vüi ang nathawp phuchuara lowk kown; aia dow akrat pusa mih khin khe khowng ang reng, now ang cham kowi rah towng kowi paw tawi uowila ang reng chekhai,” pakhai.4Naiawng rakowi amatni dow amatni tut-e kowh arup uowi mih maten hai amatni kowh ramseng ün Jakawb rut kowi apta pe bowk khai. Naiawngün dow Sekem marow ria re-e kowh sasua singh tut kowi Jakawb kowdupta khai.5Nami kung kowi dow amatni mih tarü khai bowt. Now tiama rawng kowi mang büah thüm mih khin khe aria aret kowi kowh marowchakuüa maten tut-e kramra ahuma Thurai iu pe pe khai. Naiawng rakowi Jakawb kowh maru-uüa kung kowi miapaw krawi uam krawi dowi chekhai.6Now Jakawb hai aia kowh maru maten mih Kanan pren kowi kowh Luz marow kowi kowtowm khai bowt. Luz marow dow Bethel marow chekhai.7Nakowi dow aia thawp phuchuara lowk khai. Nami arah ming dow El-Bethel pahai chap pe khai. (El-Bethel pami dow “Bethel kowi kowh Thurai” pami chekhai). Tawngplawng kowchow panow ataimow Esau hownia aia cham powt mih khin khe Thurai mih nami arah re-e aia tut-e uang tatüng pe khai.8Nakowi uowi büah mih khin khe Jakawb u Rebeka kowh narma Debawra pami dow kowng khai. Debawra kowi dow Bethel marow ria kowi kowh sasua singh tut ria kowi dupah khai. Naiawng rakowi nami arah ming dow Alawn-Bakut pahai chap pe khai. (Alawn-Bakut pami dow “Kar mih singh” pami chekhai).9Padan-aram hownia uang plan kung kowi paw Thurai mih Jakawb tut-e uang plan tatüng pe hanow peah prasi khai.10Thurai tek pe mih, “En ming dow Jakawb chowdiah. Nachenganchepaw kawmat hownia now Jakawb pahai nahaw en kown nadowi bowt; en ming mih Israel naown bowt kown,” pape khai. Nahanow aia dow Israel pahai rük pe ming khai bowt.11Now Thurai plan tek pe mih, “Ang chowbowt lowra nowngia chang mih Thurai. Ahuma prek chu prek chah diah. En hownia chenchap ahuma nauang uowi kown. En krungchakuüa hownia mang paw akawmma nauang phaw kown.12Abraham hai Isak iüah kowi kowh ang peah mih pren ang nape en kown. Nami pren dow en kung kowi kowh nauang ta uowi kown mih en krungchakuüa kowi paw ang napeah kown,” pakhai.13Now Jakawb hown ki taklang kung kowi dow Thurai mih nami hownia awr pün khai bowt.14Nahanow Jakawb dow Thurai klangah mih arah re-e chowk hua lowk khai. Nami hua chowkia luk kowi dow khamah mih uanap aia awr ap khai. Aia dow nami hua luk kowi klai pe sau hanow Thurai vüi chimsaiah khai.15Now Thurai hown aia taklangla mih arah ming dow Bethel pahai Jakawb chap pe khai.16Nami kung kowi dow Jakawb mih aia kimchakuüa hailawm Bethel hownia plan mang khai bowt. Now Efrat marow kowi kowtowm büah dowi rawnchow tak khe Rahel kowh dow kimuowi mu rau uown tarowng khai, now aia dow lainowmma kawm khai.17Aia kowh arau uang hu ngamlam mih khin khe pen sara tek pe mih, “Hangkow kram diah, khaleng paw kachakuüa chah iawk,” pape khai.18Nachenganchepaw Rahel dow kowng khai. Aia kowng kown chowbowt khe aia dow achapa ming Benawni pahai rükla pe khai. (Benawni pami dow “Ang kawmah mih chapa” pami chekhai). Nachepaw a-pa dow Benjamin pahai rük pe khai. (Benjamin pami dow “Kaucha iukma mih chapa” pami chekhai).19Now Rahel kowng hanow auak dow Efrat marow pra kowh mangla mih tiama ria kowi dupah khai. Efrat marow dow Bethlehem marow chekhai.20Jakawb dow Rahel kowh tadupra kuam luk kowi amat müa chowkla pe hua lowk khai. Nami hua dow Rahel kowh tadupra kuam luk kowi kawmat pat uowi reng tak chekhai.21Nami kung kowi dow nami hownia Israel mih tarowng mang khai iawk. (Israel dow Jakawb chekhai). Aia dow Migdawl Eder pami arah klen kowi kowkhup tangbung khai.22Nakowi uowi büah mih khin khe Reuben mih a-pa Israel changla masi mih narma Bilha hown taphua taiua khai. Nami lawnguan dow Israel paw tawi tuk khai. Jakawb kowh chapauüa
Jakawb kowh dow chapa uowi laipre ia chekhai.23Leah hown kowh Jakawb rik kaah mih chapa dow Reuben. Nami kung kowi kowh dow Simiawn, Levi, Juda, Isakar hai Zebulun büah chekhai.24Rahel hown kowh kaah mih dow Josef hai Benjamin iüah chekhai.25Rahel kowh narma Bilha hown kowh kaah mih dow Dan hai Naptali iüah chekhai.26Leah kowh narma Zilpa hown kowh kaah mih dow Gad hai Aser iüah chekhai. Naiawngün dow Padan-aram pren kowi Jakawb uowi khe kowh kaah mih chekhai.27Akung kowi dow Kiriat-Arba re-e kowh Mamre marow kowi a-pa Isak tut-e Jakawb kowkowi khai. (Kiriat-Arba dow Hebrawn marow chekhai). Nami dow Abraham hai Isak iüah uowila mih arah chekhai.28Isak dow 180 ning mowr singla khai.29Aia dow alawngtangma khe kowng khai. Aia sing uowi mih khin khe aia kowh chownglawng dow thaulangma hai asowrma chekhai. Aia dow kowng hanow aia pipu-uüa tadupra kowi tawi tadup khai bowt. Aia kowi dow aia kowh chapa Esau hai Jakawb iüah mih dupah khai.
Jakawb kowh dow chapa uowi laipre ia chekhai.23Leah hown kowh Jakawb rik kaah mih chapa dow Reuben. Nami kung kowi kowh dow Simiawn, Levi, Juda, Isakar hai Zebulun büah chekhai.24Rahel hown kowh kaah mih dow Josef hai Benjamin iüah chekhai.25Rahel kowh narma Bilha hown kowh kaah mih dow Dan hai Naptali iüah chekhai.26Leah kowh narma Zilpa hown kowh kaah mih dow Gad hai Aser iüah chekhai. Naiawngün dow Padan-aram pren kowi Jakawb uowi khe kowh kaah mih chekhai.27Akung kowi dow Kiriat-Arba re-e kowh Mamre marow kowi a-pa Isak tut-e Jakawb kowkowi khai. (Kiriat-Arba dow Hebrawn marow chekhai). Nami dow Abraham hai Isak iüah uowila mih arah chekhai.28Isak dow 180 ning mowr singla khai.29Aia dow alawngtangma khe kowng khai. Aia sing uowi mih khin khe aia kowh chownglawng dow thaulangma hai asowrma chekhai. Aia dow kowng hanow aia pipu-uüa tadupra kowi tawi tadup khai bowt. Aia kowi dow aia kowh chapa Esau hai Jakawb iüah mih dupah khai.
The Seed Company