Uown Thawp31
A-pu Laban hownia Jakawb ku powt mih
1Jakawb mih aia lawnguan kowi Laban kowh chapauüa tatek mih tawi ta khai. Laban kowh chapauüa tatek mih, “Jakawb mih apa kowh uowi mih maten pawta pe bowk khowk. Aia kowh dawngthawnguan maten dow apa hownia kowh kangowh chekhai,” pabüah khai.2Nami klen kowi auown khe kowh khowt Laban iungah dowi bowt mih paw Jakawb tuk khai bowt.3Nakhowk khe CHAKRAMANG tek pe Jakawb mih, “En pipu-uüa pren kowi en maru-uüa tut-e kowplan diah, ang natawi uowila en reng kown taih,” pakhai.4Naiawng rakowi Jakawb mih dowm kowi kowh tawncher hawmh uowi rah re-e nauangla kownkow kowchin maru now Rahel hai Leah iüah kowi uang hawla khai.5Nami kung kowi Rahel hai Leah iüah kowi Jakawb tek pe mih, “Auown khe kowh khowt enchi kowh pa iung ang dowi bowt mih ang tuk. Nachenganchepaw apa kowh Thurai dow tawi uowila ang reng.6Ang kowh kür maten hown enchi kowh pa lup ang chang pe mih enchi tuk.7Nachenganchepaw aia dow kuan ang rengreng tak chekhai. Aia dow atungma klowita ang sukkri kha khai. Nachepaw nachang ang naklak kown mih pat dow Thurai pe changah dowi.8Enchi kowh pa rik tek ang khe dow, ‘Thudit thudatma mih tawncher maten en kowh sukkri kha naown kown,’ pakhai. Nami khin khe dow thudit thudatma mih kangowh uang pen khai. Nakhowk khe dow enchi kowh pa plan tek ang iawk mih, ‘Keiing keiangma mih tawncher maten dow en kowh sukkri kha naown kown,’ pakhai. Nakhowk khe paw keiing keiangma mih kangowh uang pen khai iawk.9Naiawng hai Thurai mih enchi pa kowh tawncher hawmh pe ang khai.10“Tawncher hawmh hau pawk khin khe ang khi mang lowk. Mang lak kowi ang krawi tang mü mih khin khe ang khi mih dow krawi paw hau mih ruala hai ruapurla maten thudit thudatma mih hai keiing keiangma mih kangowh chekhai.11Mang lak kowi Thurai kowh kramamu haw ang mih, ‘Jakawb,’ pakhai. Nakhowk khe ang klangah mih, ‘Mami re-e chaw ang uowi,’ pakhai.12Now aia tek ang mih, ‘Krawi tang mü madiah, krawi paw hau mih ruala hai ruapurla maten thudit thudatma mih hai keiing keiangma mih kangowh chekhai. Naiawngün dow ang changah mih chowbowt. Tawngplawng kowchow panow Laban chang en mih maten ang khi chekhai.13Bethel kowi mih en tut-e ang uang tatüng khai. Nami khin khe nakowi mih en chowkla hua lowk, now nami hua luk kowi en klai pe sau hanow ang tut-e en khamla sawi khai. Ang dow nami Thurai chowbowt. Kawmat dow mami pren hownia lawt hanow en matia dia rah pren kowi plan bowt diah,’ pah ang khai,” pape khai.14Nami laiklow tata hanow Rahel hai Leah iüah tek pe Jakawb mih, “Kawmat mowr kowi apa kowh dawngthawnguan tawngpaw angching tawi ka dowi tak, pur prakowi paw tawi ka kown mih nadowi bowt.15Aia dow prenlang maru iawng hai tuakla angching khai. Aia dow sum angching hanow angching kowh sung srui chata bowk khai.16Naiawng rakowi angching kowh pa hownia kowh Thurai pawah mih dawngthawnguan srui dow a-i hai a-i kowh chauüa vüi towbowt. Naiawng kowh Thurai tek en mih iawng kawmat chang towbowt,” pakhai.17Naiawng rakowi Jakawb mih achauüa hai amasi büah kowi ut luk kowi tangah khai.18Now Padan-aram kowi uowi khe kowh aia kramla mih tawncher hawmh hai dawngthawnguan ün pawla bowk hanow a-pa Isak uowi rah Kanan pren prakowi plan mang khai bowt.19Nami khin khe Laban mih cham kep ruapur pawi kownkow cham kowi khai. Nami takra kowi Rahel mih a-pa kowh arup ün kowkula pe khai.20Jakawb mih a-pu Laban kowi ku powtta pe khai. (Laban dow Aram maru chekhai). Aia powt mih dow Laban kowi aia tekla pe dowi chekhai.21Naiawng hai Jakawb mih aiamat kowh dawngthawnguan maten pawla now ku powt khai. Aia dow Iufratis aw haipown hanow Gilead süng kowi kowh hungh prakowi kowkowi khai.22Nami kung kowi sum ni khe dow Jakawb ku powt mih Laban tukta khai bowt.23Nakhowk khe aia dow aia kowh tasin taken miuüa kowi hawla now kowkawi krawi Jakawb khai, now amatni dow ranit ni mang rawng khe Gilead süng kowi kowh hungh kowi kowkrumta khai.24Nachenganchepaw nami iak-e mang kowi Thurai uangah hanow Laban kowi tek pe mih, “Kaneu ba! Jakawb kowi aiung angak tawngpaw hangkow tek pe ba,” pape khai.25Jakawb dow Gilead süng kowi kowh hungh kowi khup tangbung khai, now nakowi uowi khe Laban mih kowkrumta khai. Now Laban hai aia tasin taken miuüa paw nami hungh kowi tawi khup tangbung khai.26Akung kowi Laban tek pe Jakawb mih, “Tawngplawng kowchow naiawng mih lup en tuk chang khai? Tawngplawng kowchow en tuk kuan ang khai? Tasenra kowi kowh khümla mih iawng ang chamauüa kowi tawng en tuk ku pawla khai?27Tawngplawng kowchow tekla ang dowi kowi en tuk ku powtta ang khai? En tekla ang panü dow apiaw apama hown meng hown lai hown, sawkchow tün hai taraw tün hown tawi sa en kown taih diah.28Ang chamauüa hai ang chu-uüa kowh awm khowm en pe namla ang dowi. Athukma mih iawng pache tawng en tuk chang lup khai.29Napiakla enni kown mih kür ang tut-e uowi dowi mih nadowi. Nachenganchepaw maiak khe enni pipu-uüa kowh Thurai tek ang mih, ‘Kaneu ba! Jakawb kowi aiung angak tawngpaw hangkow tek pe ba,’ pakhai.30En prüa en pa kim lai bowt rakowi en mang pami ang tukta khowk. Nachenganchepaw tawngplawng kowchow ang kowh arup ün dow enni tuk kula khai?” pakhai.31Jakawb tek pe mih, “Ang kram kowh chowbowt. En chamauüa kowi kür hown en nakrawi rupta ang tarawng padow ang ka tuak khai. Naiawng rakowi ang ku powt mih chekhai,” pape khai.32Jakawb dow Rahel uang kula a-pa kowh thurai rup mih tuk dowi chekhai. Naiawng rakowi Jakawb tek mih, “Amia iawng mih tut-e chow en kowh thurai rup en ka khai, nami maru kowi dow nakowngta kown. Naiawng rakowi ang kowh dawngthawnguan pungmadawng kowi en kowh tawng chow uowi mih kawmat achi kowh tasin taken miuüa pur kowi krawi cham diah,” pakhai.33Nahanow Laban dow Jakawb kowh tangbung kowi kowkupah hanow kowkrawi cham khai. Nami kung kowi dow Leah kowh tangbung kowi kowcham khai. Nami kung kowi dow narma pre ia mih tangbung kowi kowcham khai. Nachenganchepaw naiawngün tangbung lak kowi dow tawngpaw ka dowi chekhai. Now akung kowi dow Rahel kowh tangbung kowi kowkup khai.34Rahel dow nami arup mih ut kumlawng kowi dauah mih uan krüa kowi petta khai, now aia dow nami luk kowi chowm khai. Naiawng rakowi Laban mih tangbung lak kowi krawi chamta bowk khowk chepaw nami arup krawi ka dowi chekhai.35Nakhowk khe Rahel tek pe a-pa mih, “Apa, hauang kunmarau ang diah. Ang kowh uisawng uowi khai rakowi en pur kowi ang ia iowng dowi tham,” pape khai. Naiawng rakowi Laban dow krawi chamta bowk khowk chepaw aia kowh thurai rup ka dowi chekhai.36Nami khin khe Jakawb mih lainowmma kunmarau khai. Naiawng rakowi aia dow nangah se tek pe Laban mih, “Tawng angak chow ang changta khai? Tawng rirow chow ang piakta en khai kowh en uang tuk krawi ang khai?37Ang kowh uanh maten en krawi phuita bowk khowk; naiawngün kowi en matia kowh uanh en ka ne tak bow? Ka khai hanow achi kowh tasin taken miuüa pur kowi uang haitow diah; amatni dow pacham chet achi tara lah.38En tut-e ang tawi uowi mih pirmi ning khowk. Nami takra kowi en kowh ruama hai ruapurma pawm kowh iut khai pami paw uowi dowi tak, now en kowh rua hai ruapur hawmh hownia ang ngenah now ang chata khai mih paw uowi dowi tak chekhai.39Nami klen kowi kaurawng uaramchak makta en tawncher mih khin khe paw ang pe tukla en dowi; nami piak mih klai ang takcha en reng chekhai. Ni-e kowh tama mih lah, iak-e kowh tama mih lah, tama mih klai dow en paw ang reng.40Ni-e dow ni chut chi ang kawng sat den, uar-e dow uar prowt chi ang kawng arua khai; tawngbak khe müi khowm ang nowng müi dowi chekhai.41En kim kowi ang uowi mih pirmi ning kowi laitali ning mih dow en kowh chama pre ia kowi ang nakala kownkow chekhai, now taruk ning mih dow en kowh tawncher hawmh ang nakala ne kownkow chekhai. Nami takra kowi atungma en klowi ang sukkri kha khai.42Apa kowh Thurai, Abraham kowh Thurai hai Isak ringkawah reng mih Thurai che tawi uowila ang dowi e dow rut khawma hai en nape mang ang ngengche kown chekhai. Thurai dow ang kawm mih hai ang chang lup mih krang khi ang reng. Naiawng rakowi aia dow maiak khe uang chet ang tara nowm mih chekhai,” pakhai.43Now Laban tek pe Jakawb mih, “Mami masiuüa hawmh dow ang kowh chama taih, mami ngeuüa hawmh paw ang kowh chu-uüa taih, now mami tawncher hawmh paw ang kowh taih. Mami re-e kowh en khi-ah mih maten dow ang kowh kangowh chekhai. Nachenganchepaw kawmat dow mami chamauüa hai amatni kowh chauüa kowi ang krawi ia paw dowi bowt.44Naiawng rakowi chu, achi tatow sangbowk laitawm lowk diah sik. Nami sangbowk laitawm saksi dow achi chowk hua lowk diah sik,” pakhai.45Naiawng rakowi Jakawb dow uang pawla huaklu lowk hanow chowkah khai.46Now aia maru-uüa kowi paw krawi pe pawah huaklu hanow nami huaklu ria kowi uang pe chunah khai. Nahanow Jakawb hai Laban iüah dow amatchi kowh maru-uüa hown nami hua chun ria kowi cha büah kham büah khai.47Laban dow nami hua chun kowi amatni Aramean lai hown Jegar-Sahadutha padow chap pe ming khai. (Nami auan dow “Saksi Hua Chun” pami chekhai). Now Jakawb paw amatni Hebrai lai hown Galed padow chap pe ming khai. (Nami auan paw “Saksi Hua Chun” pami chekhai).48Now Laban tek mih, “Ani hownia now mami hua chun mih achi kowh sangbowk laitawm saksi chekhai,” pakhai. Naiawng rakowi nami hua chun ming dow Galed pahai chap pe mih chekhai.49Nami klen kowi nami arah ming dow Mizpa pahai plan chap pe lowk khai. (Nami auan dow “Kangchawng rah” pami chekhai). Tawngplawng kowchow panow Laban tek mih, “Lowkkowlowk achi takhi dowi bowt mih khin paw CHAKRAMANG dow pacham krawi mü achi reng lah.50En che ang chamauüa luk kowi chang naklak khai, nami klen kowi ang chamauüa uowi reng tak khe akeng mih masiuüa kowi en cham paw khai hanow achi pur kowi miapaw uowi dowi chepaw Thurai dow achi kowh saksi uowi reng pami tukah reng diah,” pakhai.51Laban plan tek pe Jakawb mih, “Mami hua chun prakowi mü diah. Now achi takra kowi kowh achi chowkah mih hua pra paw mü diah.52Mami huaklu chowkia hai huaklu chunia dow achi kowh saksi chekhai. Mami huaklu klen hownia now napiak en kownkow ang uang krawi uang dowi bowt tham. En paw mami huaklu chowkia hai mami huaklu chunia klen hownia now napiak ang kownkow hauang krawi uang tham bowt.53Naiawng chepaw krawi chang reng tak hanow Abraham kowh Thurai hai Nahawr hai amatchi pa kowh thuraiuüa mih pacham chet achi tara lah,” pakhai. Now Jakawb dow a-pa Isak ringkawah mih Thurai ming hown amatchi kowh sangbowk laitawm nachün kownkow kham sawi khai bowt.54Nami kung kowi dow Jakawb mih nami hungh kowi tawncher hown chang phuchua pawi khai; aia dow aia kowh tasin taken miuüa kowi paw tawi cha tawi kham kownkow hawla khai. Amatni dow ki cha ki kham hanow nami hungh kowi iak khai.55Laban dow auai rau murpa awr rü hanow achamauüa hai achu-uüa kowi nam pe awm khai, now peah prasi khai. Nami kung kowi dow Laban mih aia kim prakowi plan khai bowt.The Seed Company