Uown Thawp25
1Abraham mih plan paw masi sar lowk tak chekhai. Amasi ming dow Ketura chekhai.2Ketura hown kowh kaah mih dow Zimran, Jawksan, Medan, Midian, Isbak hai Sua büah chekhai.3Jawksan kowh chapa dow Seba hai Dedan iüah chekhai. Dedan krungchakuüa dow Asurimuüa, Letusimuüa hai Leumimuüa chekhai.4Midian kowh chapauüa dow Efa, Efer, Hanawk, Abida hai Elda büah chekhai. Naiawngün bowkbowk dow Ketura kowh chapauüa chekhai.5Abraham mih aia kowh dawngthawnguan maten achapa Isak kowi peah khai.6Abraham mih aia sing uowi reng tak khe aia changla masi mih narma hown kowh chapauüa kowi paw dawngthawnguan ahuma pela pe khai. Tawkche achapa Isak kowi mih aia changla masi mih narma hown kowh chapauüa hown arasang aia towah dowi chekhai. Aia dow nami masi hown kowh chapauüa kowi satlawt pra kowh pren kowi cham chinta khai.7Abraham dow 175 ning mowr singla khai.8Aia dow alawngtangma khe kowng khai. Aia sing uowi mih khin khe aia kowh chownglawng dow thaulangma hai asowrma chekhai. Aia dow kowng hanow aia pipu-uüa tadupra kowi tawi tadup khai bowt.9Now aia uak dow Makpela kowi kowh puk kowi achapa Isak hai Ismael iüah kowdupah khai. Nami puk dow Mamre marow satlawt prakowi kowh Hit chenchap Zohar chapa Efrawn kowh laih le kowi chekhai.10Nami laih dow Hituüa hownia kowh Abraham ranah mih chekhai. Nami dowi rawn khe Abraham mih amasi Sari kowi paw nami re-e dupah khai.11Abraham kowng kung kowi dow achapa Isak kowi Thurai peah prasi khai. Now Isak dow Birlahai-Rawi ria re-e kowuowi khai.12Ismael dow Abraham hai Hagar iüah kowh chapa. Hagar dow Aigupta prenchak, aia dow Sari kowh narma chekhai.13Mami dow Ismael kowh krungchakuüa lawnguan chekhai. Ismael kowh chapa lang ta mih ming dow Nebaiawt, nami kung kowi dow Kedar, Adbel, Mibsam,14Misma, Duma, Masa,15Hadad, Tema, Jetur, Nafis hai Kedema büah chekhai.16Ismael kowh nami laipre ia chapa dow laipre chen kowi kowh aluchow chekhai. Amatni ming iawng hai amatni chowlowkkow kowh kua hai kua uat kowi kowh tangbung khup rah towng kowi amatni kowh ming chap pe khai.17Ismael dow 137 ning mowr singla khai. Nami kung kowi dow aia mih kowng hanow aia pipu-uüa tadupra kowi tawi tadup khai bowt.18Ismael krungchakuüa dow Havila hownia Sur pami arah mowr krawi uowi khai. Nami arah dow Aigupta pren hown atawnchow chekhai. Nami dow Asuria pra kowh mangla mih tiama kowi chekhai. Ismael krungchakuüa dow anaumow Isak krungchakuüa pren ria kowi uowi büah khai.19Mami dow Abraham chapa Isak kowh chownglawng lawnguan chekhai. Isak dow Abraham kowh chapa.20Rebeka hown tachawng mih khin khe Isak dow 40 ning khowk chekhai. Rebeka dow Padan-aram pren kowi kowh Aramean maru Bethuel chama, now arakma dow Aramean maru Laban chekhai.21Isak kowh masi dow atingma rakowi ka chah dowi. Naiawng rakowi Isak dow amasi vüi CHAKRAMANG tut-e awr lü prasi khai. Now CHAKRAMANG dow Isak awr lüah mih hawt sünta pe hanow amasi Rebeka dow uang kum nau khai bowt.22Aia mu lak kowi dow chah phir chekhai, now amatchi dow lowkkowlowk takhüm khai. Naiawng rakowi Rebeka tek mih, “Tawngplawng kowchow maiawng ang tuk own khai?” pakhai. Aia dow nami auan natukla kownkow CHAKRAMANG tut-e awr lü prasi khai.23Now CHAKRAMANG tek pe aia mih,“En mu lak kowi mih chen uowi pre chap chekhai,uang dia hownia amatchi dow krungchak alangma kangowh naown kown.Lowk mih lak-e alowk mih nalang kür kown,Ata mih dow asawi mih kowh nar nachowng kown,” pakhai.24Aia uowi kim mih khin khe aia kowh dow chah phir chekhai.25Now uang rik dia mih kowh dow pik mia aringma. Aia kowh dow pabuk pakowma apawi humma chekhai. Naiawng rakowi aming dow Esau pahai rük pe khai. (Esau pami dow “Apawi kangowh” pami chekhai).26Anaumow dow uang dia mih khin khe Esau klowngcheng kowi asima dowkla khai. Naiawng rakowi aming dow Jakawb pahai rük pe khai. (Jakawb pami dow “Klowngcheng dowk mih” pami chekhai). Esau hai Jakawb iüah uang dia mih khin khe Isak dow 60 ning khowk.27Amatchi tainau pre ia dow awr iuk awr sown khai bowt. Now lang ta mih Esau dow chakmit akiakma mih maru uang phaw khai. Aia dow kaurawng kowi lainowmma chakmit daw. Tawkche Jakawb dow adema mih maru chekhai. Aia dow kim kowi lainowmma kiang khai.28Isak dow achapa Esau kowi lang sakrauah khai. Tawngplawng kowchow panow aia dow Esau kramah mih kaurawng uaramchak nga chak prakowi lang nau khai. Tawkche Rebeka dow Jakawb kowi lang sakrauah rowt chekhai.29Pakat khe Jakawb dow pan daing khai. Nami khin khe Esau dow kaurawng hownia uang mang chakmit khai, now aia dow hawm sakkrai kowh lainowmma kawm khai.30Now Esau tek pe Jakawb mih, “Hawm sakkrai hown ang kowng kown chowbowt. Naiawng rakowi nami en panah mih aringchow mih daing pan pe cha ang ne dit snow,” pakhai. Nami laiklow rakowi Esau kowh aming plan uowi lowk mih dow Edawm chekhai. (Nami auan dow “Aring” pami chekhai).31Jakawb tek pe mih, “Tawkchedow en kowh chapa ta rah ani en sum ang kown takla,” pakhai.32Esau tek pe mih, “Mü madiah, hawm sakkrai hown ang kowng kown chowbowt. Tawng chow ang nachangla chapa ta rah kown chow?” pakhai.33Nachenganchepaw Jakawb tek pe mih, “En nape ang kown mih kowi ang tut-e rik kham sawi diah,” pakhai. Naiawng rakowi Esau dow kham sawi hanow aia kowh chapa ta rah mih Jakawb kowi sumta pe khai.34Nahanow Jakawb mih Esau kowi kawm hai daing pan pe chaah khai bowt. Now Esau dow chala khamla prowng now cham kowi khai. Naiawng hai Esau dow aia kowh chapa ta rah towah sung dowi chekhai.
The Seed Company