Uown Thawp23
1Sari dow 127 ning singla now Kanan pren kowi kowh Kiriat-Arba marow kowi kowng khai. Nami marow dow kawmat kowh tek pe Hebrawn mih chekhai. Sari kowng khai rakowi Abraham dow lainowmma prüa khai; aia dow Sari vüi kowi lainowmma kar khai.3Nahanow Abraham mih amasi uak towla now Hituüa hown kowtalawp khai.4Aia dow Hituüa kowi tek pe mih, “Ang dow prenlang hownia kowh enni tut-e uang tawi uowi mih maru chekhai. Ang kowh dow dupla masi uak kown mih paw chengrawng uowi dowi. Naiawng rakowi sakrauma hown tadupra krawng pe ang büah parachow dit,” pakhai.5Now Abraham kowi Hituüa tek pe mih, “Chakramang, anging kowh laiklow sünta diah. En dow anging pungmadawng kowi kowh Thurai lang kloah mih aluchow chekhai. Anging kowh tadupra lang iung mih kowi en masi uak mih kowdup diah. En masi uak mih lowra mih re-e en krawi dup chepaw amia iawng mih maru paw hang en dowi tham,” pakhai.7Nahanow Abraham mih awr rüah now nami re-e kowh uowi mih Hituüa kowi tabawk krawm se chupah khai.8Now Hituüa kowi tek pe mih, “Ang masi kowi makowi nadup kown mih enni che nauta bowk hanow sakrauma hown ang laiklow sünta büa diah. Zohar chapa Efrawn tut-e kowkowiah now aia laih le re-e kowh Makpela kowi kowh puk uowi mih tawi hünlü ang büa diah. Aia mih nami puk pacham pe ang lah. Nami dow nachangla chengrawngs kownkow enni pur kowi asung takla iawng pacham sum ang lah,” pakhai.10Nami khin khe Efrawn paw akeng mih Hituüa hown marow tapplawt re-e kowh takuara kowi tawi uowi khai. Now Efrawn mih nami re-e kowh uowi mih maru ta bowk iawng Abraham kowi tek pe mih, “Chakramang, sakrauma hown ang laiklow sünta diah. Ang krungchakuüa pur kowi paimi laih hai nakowi kowh puk mih ang hing peta en mih chowbowt. En masi uak mih paimi re-e kowdup towbowt,” pape khai.12Now Abraham mih tabawk krawm se Hit maru-uüa kowi plan chupah khai.13Nahanow aia dow bowkbowk maru ta iawng Efrawn kowi tek pe mih, “En che nauta hanow sakrauma hown ang laiklow sünta diah. Ang dow nami laih ran kown ang nau, nami laih sung dow sakrauma hown paw ang diah. Ang masi uak mih nakowi ang nadupah kown mih chekhai,” pakhai.14Efrawn tek pe Abraham mih,15“Ang laiklow sünta diah. Nami laih sung dow tai 400 iun chowtaih. Nami dow en hai ang tut-e mün khowt paw nadowi. Nakowi mih en masi uak phai kowdup towbowt,” pakhai.16Now Abraham mih Hituüa pur kowi kowh Efrawn tekah iawng tai 400 iun Efrawn kowi ap pe khai.17Efrawn mih Mamre marow ria re-e kowh Makpela kowi kowh laih hai nakowi kowh puk hown laih kowi kowh singh kau uowi mih maten nachangla dawngthawnguan kownkow Abraham kowi sumta pe khai. Naiawngün dow marow tapplawt ria re-e kowh uowi mih Hituüa pur kowi Efrawn sum pe khai.19Nahanow Abraham dow Kanan pren kowi kowh Mamre marow ria re-e Makpela kowi kowh puk kowi amasi Sari kowi dupah khai. (Mamre pami dow kawmat kowh tek pe Hebrawn mih chekhai).20Naiawng hai Makpela kowi kowh laih hai puk mih nachangla chengrawng kownkow Hituüa hownia Abraham kata khai.
The Seed Company