Uown Thawp21
1Nami kung kowi dow CHAKRAMANG mih aia tekta khowk iawng Sari kowi peah prasi khai, now aia khamta khowk mih iawng Sari kowi chang pe khai bowt.2Naiawng rakowi Abraham alawngtangma khowk khe Sari mih kum nau hanow pen pe chapa khai. Amatchi kowi Thurai bowk pe mih akhin kowi amatchi kowh chah dow uang dia khai bowt.3Now achapa ming dow Isak pahai Abraham rük pe khai.4Now Abraham mih Thurai ana pek iawng achapa Isak kowi riat ni khe hiah pe khampha uanpik khai.5Achapa Isak uang dia mih khin khe Abraham kowh ning dow 100 khowk chekhai.6Now Sari tek mih, “Thurai mih pe awmrawm ang hai pe ren lawtla ang khai bowt, tawi ta miuüa maten paw natawi awmrawm hai natawi renla ang bowt kown,” pakhai.7Nami klen kowi Sari tek mih, “Ang natawi ka iawn nau kown mih Abraham kowi miapaw nowng tek pe dowi chekhai. Nachenganchepaw lawngtang prakowi ang tawi ka pe chapa khai lowmow,” pakhai.8Now Isak mih awr iuk awr sown rürü khai bowt, now aia kowh iawn kham towng mih ni khe Abraham mih Isak vüi pawi aiukma chang pe khai.9Akat khe achapa Isak kowi anarma Hagar kowh chapa Ismael khareah mih Sari khita khai.10Nami khita hanow Abraham kowi Sari tek pe mih, “Achapa hailawm paimi narma kowi prütta diah. Ang kowh narma chapa mih ang kowh chapa Isak hown tawi ia tahum dawngthawnguan kown nadowi,” pape khai.11Now achapa Ismael lawnguan kowi Abraham dow lainowmma saktuak pusa khai.12Nachenganchepaw Thurai tek pe mih, “Abraham, en kowh narma hai achapa lawnguan kowi hangkow tuak kawm diah. Sari tek en iawng chang diah. Tawngplawng kowchow panow Isak krungchak kowi chowtaih en kowh krungchak pahai nadowkah kown.13Tawkchedow en kowh narma chapa hownia paw aiukma mih chenchap ang nathawpah lowk kown. Tawngplawng kowchow panow aia paw en kowh chapa chekhai,” pakhai.14Naiawng rakowi Abraham mih auai rau murpa awr rü müi hanow chakkham hai tui-iia kowi tui atekma klin pe now Hagar pangkawt kowi bat pe khai. Achapa kowi dow aia rut kowi ap pe hanow cham chinta khai bowt. Now kim hownia lawt hanow Hagar iüah uchow dow Ber-Seba pami süngrüp süngkangma kowi cham mang panglang khai.15Nahanow tui-iia kowi kowh tui khowk khai bowt, now Hagar mih achapa kowi ruih mung krüa kowi cham iüata hüah khai.16Aia dow, “Ang chapa kowng mih ang khi dowi iawng,” padow tatuak khai. Naiawng rakowi aia dow achapa hownia alak sangrum mowr cham powt hanow cham chowm tuai khai, now aia dow atün atünma kar khai. Achapa hown aia tala mih dow ap salangba khe kowh chawn mowr chekhai.17Nachenganchepaw ngeuüa kar klow mih Thurai ta khai bowt. Naiawng kowh mukuang pren hownia Thurai kowh kramamu Hagar kowi hawah now tek pe mih, “Hagar, tawng chow en own? Hangkow kram diah. Ngeuüa kar mih klow Thurai ta khowk.18Rü now ngeuüa kowi kowdepta diah. Tawngplawng kowchow panow nami ngeuüa hownia mih chenchap aiukma ang nathawpah lowk kown,” pape khai.19Now Thurai mih Hagar kowi pe khi-ah tuikuam lowk. Nami tuikuam hownia mih aia kowh tui-iia hown towngla tui hanow achapa kowi pe khamah tui khai bowt.20Thurai mih Ismael kowi mingah khetah reng khai, now Ismael mih awr iuk awr sown rürü khai bowt. Aia dow süngrüp süngkangma kowi uowi khai, now aia dow salangba ap akiakma mih maru uang phaw khai.21Amatchi dow Paran pape mih süngrüp süngkangma kowi uowi iüah khai. Now Ismael nachangla masi kownkow Aigupta pren kowi kowh masiuüa kowi a-u paw pe khai.22Pani khe Abimelek mih aia kowh siphai aluchow Fikawl kowi pawla now Abraham tut-e kowkowi khai. Now Abimelek tek pe Abraham mih, “Ang tuk, en changah mih lup maten kowi Thurai tawi uowila en reng chekhai.23Mü diah, ang kowh pren kowi en uang tawi uowi khai. Nachenganchepaw ang hawt saksing sana en khai. Nami powm iawng en paw ang hai ang prenchakuüa kowi en nasaksing sana kown takla. Naiawng rakowi ang hai ang chauüa hai ang krungchakuüa mia iawng mih luk kowi paw en naling nakuan dowi kownkow Thurai ming hown kawmat kham ang sawi diah,” pape khai.24Now Abraham tek pe mih, “Ang takham khowk,” pape khai.25Now Abimelek kowh naruüa kür hown khünta pe aia kowh tuikuam mih lawnguan kowi Abraham mih Abimelek kowi chawk pe lai khai.26Nakhowk khe Abimelek tek pe mih, “Naiawng mih lup mia chow chang mih ang tuk dowi. Mami dowi rawn en paw tek ang dowi tak chedow ang tuk dowi; kawmat tak ang ta,” pape khai.27Nahanow Abraham mih uang pawla chia hai ruapur sangrum hanow Abimelek kowi peah khai, now amatchi mih tatow sangbowk laitawm khai bowt.28Now Abraham mih aia kowh ruapur hawmh hownia aiia ranit pum mih lang towah khai.29Nami khita hanow Abimelek lüntaah mih, “Nami ruapur iia ranit pum en lang towta mih auan tawng chow?” pape khai.30Abraham tek pe mih, “Maiawngün ruapur iia paw ang diah. Maiawngün ruapur iia dow mami tuikuam ang thaiah mih chowtaih pami maru natukla reng kownkow amat müa chekhai,” pape khai.31Nami re-e amatchi takham sawi khai rakowi nami re-e kowh arah ming dow Ber-Seba pahai chap pe khai. (Ber-Seba pami dow “Sawi khamra tuikuam” pami chekhai).32Naiawng hai Ber-Seba kowi ki tatow sangbowk laitawm kung kowi dow Abimelek mih aia kowh siphai aluchow Fikawl hown amatni Filistinuüa uowi rah kowi mang khai bowt.33Now Abraham mih Ber-Seba kowi chowk painglang singh atut khai, now nakowi mih auown hai achur uowi dowi mih CHAKRAMANG Thurai kowi chupah iiaah khai.34Abraham mih Filistinuüa pren kowi akrama uowila khai.
The Seed Company