Uown Thawp20
Abraham hai mang Abimelek
1Abraham dow Mamre hownia mrawkphak pra kowh Negeb pape mih süngrüp süngkangma prakowi kowpowt khai. Aia dow nakowi kowh Kades marow hai Sur pami arah takra kowi kowuowi khai. Nami kung kowi dow aia mih Gerar marow kowi kowuowi khai.2Gerar marow kowi uowi mih khin khe amasi Sari kowi atuamow padow Abraham mih plan khamah khai iawk. Naiawng rakowi Gerar marow kowi kowh mang Abimelek dow kowchin maru pre sum ia now Sari kowi aia tut-e uang pawla khai.3Nachenganchepaw Thurai mih iak-e Abimelek mang lak kowi uang tatüng pe khai, now tek pe mih, “Nami masiuüa kowi en uang pawla khai rakowi en nakowng kown mih tawn khowk. Tawngplawng kowchow panow en uang pawla mih masiuüa kowh dow ahua uowi chekhai,” pakhai.4Nachenganchepaw mang Abimelek mih Sari hown taphua taiua dowi tak chekhai. Naiawng rakowi aia tek pe mih, “CHAKRAMANG, ang chang ngak dowi diah. Nachenganchepaw ang hai ang maru-uüa kowi en napiakta kown chekhai bow?5Abraham matia ngengche chowbowt tek ang mih, ‘Mami masiuüa dow ang tuamow taih,’ pakhai. Now masiuüa paw tek ang mih, ‘Mami kachakuüa dow ang rakma taih,’ pakhai. Mami lup dow saktuak iungma hown kowh ang chang mih chekhai. Ang dow tawngpaw angakma mih lup chang dowi chekhai,” pakhai.6Now mang lak kowi Thurai tek pe Abimelek mih, “Ang tuk, nami lup mih saktuak iungma hown kowh en chang mih chekhai. Nakingküala ang kown mih lup ngak dow ang pe chang en dowi; naiawng rakowi aia hown ang pe taphua taiua en dowi mih chekhai.7Naiawng kowh kawmat aia kowi mih ahua tut-e kowsata diah. Ahua dow risi chekhai. Aia dow en vüi kowi nachup en Thurai hanow en kowh asak mih naplai kown taih. Tawkchedow en che kowsa pe dowi kowh chalow now en hai en maru-uüa lowk iachow paw kowngra hownia naia plai kown nadowi; mami laiklow sak kowi towah reng diah,” pakhai.8Nahanow mang Abimelek mih murpa awr rü now mang lak kowi kowh aia khi-ah mih maten aia naruüa kowi hawah now lawp pe khai. Nami ta hanow aia naruüa mih lainowmma kram khai.9Abraham kowi Abimelek hawah now tek pe mih, “Anging hown maiawng mih lup tawngplawng kowchow en tuk chang khai? Tawng angak chow ang changta khai kowh ang hai ang pren luk kowi naiawng khowt mih aprek iuk pache en uang pe klaah khai? Naiawng mih lup en nachang kown mih mapaw taka dowi chekhai,” pakhai.10Mang Abimelek plan tek pe mih, “Tawng chow en ka tuak kowh naiawng mih lup en tuk chang khai?” pakhai.11Nakhowk khe Abraham tek pe mih, “Mami re-e kowh maru-uüa Thurai kowi mapaw kram dowi tham padow ang ka tuak khai; amatni mih ang masi kowi napawta ang now ang kowi dow nasaita ang kown chekhai padow ang ka tuak khai.12Sari dow ang masi chepaw ang tuamow tawng chekhai. Tawngplawng kowchow panow angching kowh u lang chepaw pa dow katsang chekhai.13Thurai mih apa kim hownia uang lawtla ang hanow akeng pren kowi cham chin ang khai. Nami khin khe ang masi kowi ang tek pe mih, ‘En sakrau ang mih krang maiawng tüng ang diah. Lowra kowi achi cham kowi mih khin khe ang kowi mih en rak pahai kham ang reng diah,’ pakhai,” pape khai.14Nahanow Abimelek mih Abraham kowi ruapur ün, chia ün hai narma narla ün ahuma peah khai. Now amasi Sari kowi paw planta pe khai.15Abraham kowi aia tek pe mih, “Mü diah, ang kowh paprenma dow en pur kowi uowi hüah khowk. En nau mih re-e krawi uowi diah,” pape khai.16Now Sari kowi Abimelek tek pe mih, “Sünta diah, en rakma kowi ang peta tai 1,000 iun khowk. Nami dow en luk kowi kowh phaw mih lawnguan kowi en maru-uüa mih hangkow pacham tuak naklak lah pakowh chekhai. Nahanow en kowh dow tawngpaw atawi uowi dowi pami maru bowkbowk natuk en kown towbowt,” pakhai.17Abraham masi Sari kowi Abimelek pawta pe khai rakowi CHAKRAMANG mih Abimelek kimchak masiuüa maten kowi pe hing kaah chah dowi chekhai. Naiawng rakowi Abraham mih Abimelek vüi chup pe Thurai khai. Nahanow Thurai mih Abimelek, amasi hai aia narmauüa kowi pe iungah khai. Now amatni dow plan nowng ka chah khai bowt.The Seed Company