Uown Thawp17
Thurai kowh sangbowk laitawm matra
1Abram 99 ning khe mukmang kowi CHAKRAMANG uang tatüng pe now tek pe mih, “Abram, ang dow lowra nowngia chang mih Thurai chekhai. Ang hown taklawp taiua reng diah, now ang low iawng uowi diah.2Nahanow en hown ang natow sangbowk laitawm kown, now en krungchak kowi ahuma ang nape prungah kown,” pape khai.3Nakhowk khe Abram mih krawng kowi tabawkah krawm hanow Thurai kowi chupah khai, now Thurai mih aia hown taklowp taklang khai bowt.4Thurai tek pe mih, “Achi kowh sangbowk laitawm kowi ang nachang en kown mih dow maiawng: Chenchap ahuma kowh pa ang nathawp en kown.5Abram (akri akraingma mih pa) padow nahaw en kown nadowi bowt; kawmat hownia now Abraham (maru kawmma kowh pa) padow nahaw en bowt kown. Tawngplawng kowchow panow chenchap ahuma kowi prekche miia ang thawpta en khowk.6En krungchak kowi ahuma ang nape prungah kown. En hownia mih chenchap ahuma ang nauang pe phawah kown. Nami klen kowi en hownia mih mang paw ahuma nauang phaw kown.7Mami sangbowk laitawm dow en hai ang vüi krowngchow nadowi; mami dow en kung kowi kowh nauang ta uowi kown mih en krungchakuüa vüi paw na chekhai. Mami sangbowk laitawm dow chowngchowng saksakma vüi naown kown. Ang dow en hai en kung kowi kowh nauang ta uowi kown mih en krungchakuüa kowh Thurai naown kown.8Prenlang maru iawng kawmat kowh en uowiah mih Kanan pren srui dow en hai en krungchakuüa kowi ang nape enni kown; nami dow chowngchowng saksakma nachangla dawngthawnguan kownkow ang nape enni kown. Ang dow enni bowkbowk kowh Thurai nachowng kown,” pape khai.9Nami klen kowi Thurai plan tek pe mih, “Abraham, ang kowh sangbowk laitawm mih en nachün kown takla; en hai en kung kowi kowh nauang ta uowi kown mih en kowh krungchakuüa maten paw nachün reng kown takla.10En hai en kung kowi kowh nauang ta uowi kown mih en krungchakuüa nachünah kown mih sangbowk laitawm dow maiawng: Enni kachakuüa maten mih nahiahta khampha uanpik kown takla.11Enni kowh khampha uanpik mih enni nahiahta kown; nami dow enni hown ang towta sangbowk laitawm khowk pami amat müa naown kown.12Kawmat hownia now kachakuüa chah maten kowi dow uang dia kung kowi raiat ni khe en nahiahta pe khampha uanpik kown. En krungchak nadowi chepaw en kim kowi kowh dia mih srui kowi dow khampha uanpik en nahiahta pe kown; prenlang maru hownia kowh en hawt ranah mih nar chepaw, en kim kowi kowh dia mih nar chepaw naiawng en nachang pe kown takla.13Enni bowkbowk nahiahta khampha uanpik ngengche kown takla. Nami dow chowngchowng saksakma enni buk kowi ang kowh sangbowk laitawm nauowila kown mih amat müa chekhai.14Hiah khampha uanpik dowi mih kachakuüa dow ang kowh sangbowk laitawm chün dowi mih chekhai. Naiawng rakowi naiawng mih kachakuüa kowi dow aia maru-uüa hownia nabatta kown,” pape khai.15Abraham kowi Thurai plan tek pe mih, “Abraham, en masi kowi Sara pahai nahawah kown nadowi bowt; Sari padow nahawah bowt kown.16Aia kowi dow ang napeah prasi hanow aia hownia ang nape ka en chapa lowk ia kown. Aia kowi dow ang napeah prasi kown; aia dow chenchapuüa kowh u nauang chowng kown, now nami chenchapuüa hownia dow manguüa paw ahuma nauang uowi kown,” pape khai.17Now Abraham mih krawng kowi tabawkah krawm hanow Thurai kowi chupah khai. Tawkchedow ren se sakdawng hownia aia tek mih, “Ang dow ning 100 khowk. Tawng iawng chow ang nowng ka chah bowt kown chow? Sari paw ning 90 khowk. Tawng iawng chow nowng pen chah bowt kown chow?” pakhai.18Abraham tek pe Thurai mih, “En kowh prasira hai en kham ang mih maten Ismael pacham powngla towbowt,” pakhai.19Nakhowk khe Thurai tek pe mih, “Tawng na chow! En masi Sari napen en chapa ngengche kown, now aming dow Isak en narük pe kown. (Isak pami dow ‘Ren’ pami chekhai). Ang kowh sangbowk laitawm mih Isak hown nauowi reng kown, nami sangbowk laitawm dow aia krungchakuüa hown paw chowngchowng saksakma vüi nauowi reng kown.20Now Ismael vüi en lü mih paw ang ta chekhai. Ismael kowi paw ang napeah prasi kown, now aia krungchakuüa kowi paw ahuma ang nape prungah kown. Aia paw laipre chen kowi kowh prekche miia naown kown, now aia hownia paw chenchap aiukma ang nathawpah kown.21Nachenganchepaw ang kowh sangbowk laitawm dow Isak hown chowtaih nauowi reng kown. Aia kowi dow ning thowi kowh maiawng khin khe Sari napenah kown,” pape khai.22Abraham hown ki taklang kung kowi dow Thurai mih kuang prakowi awr pün khai bowt.23Now Abraham dow Thurai tek pe mih powm iawng nami ni khe Ismael kowi hiah pe khampha uanpik khai. Nami klen kowi aia ranah mih nar aia kim kowi kowh dia mih hai aia kim kowi kowh uowi mih kachakuüa maten kowi hiah pe khampha uanpik khai.24Aia kowh khampha uanpik hiah mih khin khe Abraham mih 99 ning khowk chekhai.25Now aia kowh chapa Ismael dow laisum ning khowk chekhai.26Amatchi pachowh hiah khampha uanpik mih dow pani sang chekhai.27Nami klen kowi aia kim kowi kowh dia miuüa hai prenlang maru hownia kowh hawt ranah mih hailawm, aia kim kowi kowh uowi mih kachakuüa maten kowi paw aia hiah pe khampha uanpik khai bowt.The Seed Company