Uown Thawp18
Abraham kowi Thurai kham pe lai mih
1Mamre kowh sasua singh rüm re-e Abraham uowi mih khin khe CHAKRAMANG mih aia tut-e uang tatüng pe khai. Abraham mih ni ür thüm khe kowh sat den dawng kowi aia tangbung plawt kowi chowm phülü chekhai.2Nami khin khe Abraham mih awr tang mü hanow aia hown atawnchow re-e maru iowng sum ia mih awr khi khai. Nami khita hown akrowksang aia dow kowchupah kownkow tangbung plawt hownia awr iowm khai. Aia dow krawng kowi tabawk krawm now chupah se tek pe mih, “Sünta büa diah, enni che sakraula ang hanow sakrauma hown enni kowh nar kowi hauang riala diah.4Ang kowpaw enni rut sau khawk sau müa tui tak; sau rut sau khawk büah now mami singh klim kowi tanai büa diah.5Enni kowh nar tut-e enni uang khowk chedow ang kowpaw enni chakkham ditchow tak. Chala khamla prowng khe phai mang büah iang,” pakhai.Now nami maru sum ia tek pe mih, “Lainowmma iung, en tek iawng chang diah,” pakhai.6Nahanow Abraham dow alenma tangbung lak kowi kowkup khai. Aia dow Sari kowi tek pe mih, “Sala aiukma mih hownia kawmdi lang iung mih pawah dawnglang now alenma thawpla kawm bowk diah,” pakhai.7Now Abraham dow chia hawmh prakowi kowiowm hanow kow lang iung mih chia chah uang pawla apum khai. Nami chia chah dow anar kowi peah khai. Aia dow anar kowi changah tua hanow alenma engah rowngah kownkow tek pe khai.8Nami kung kowi dow Abraham mih chaknga, iawn tui bawiia hai iawn tui sing uang pawla pe now amatni kowi uang then pe khai. Amatni cha mih khin khe Abraham dow amatni ria-e singh klim kowi tawi iowng khai.9Amatni dow Abraham kowi lüntaah mih, “En masi Sari tawng kowi chow?” pakhai.
Now Abraham tek pe mih, “Tangbung lak kowi iu,” pakhai.10Nakhowk khe maru sum ia mih pungmadawng kowi kowh uowi mih CHAKRAMANG lowk ia tek pe mih, “Ning thowi kowh maiawng khin khe en tut-e ang naplan uang ngengche kown. Nami khin khe dow en masi Sari kowh chah nauowi lowk ia kown,” pakhai. Naiawngün laiklow dow Sari mih Abraham kung kowi kowh tangbung plawt hownia awr tawi ta bowk chekhai.11Nakhowk khe Abraham hai Sari iüah dow lainowmma lawngtang khai bowt. Sari kowh dow kala chah kown mih ning uowi dowi bowt chekhai.12Naiawng rakowi ren se sakdawng kowi Sari tek mih, “Ang lawngtang mih nowm khowk, now ang hua paw le lawngtang mih nowm khowk. Taphua taiua kown mih piawra ang naplan ka iawk kown chekhai bow?” pakhai.13Nahanow CHAKRAMANG tek pe Abraham mih, “Tawngplawng kowchow Sari tuk ren khai? Ang lawngtang khowk pache ang naka chah kown tak bow pami tawngplawng kowchow tuk tek khai?14CHAKRAMANG tut-e nowng changah dowi mih lup tawngpaw uowi dowi chekhai. Ning thowi kowh maiawng khin khe en tut-e ang naplan uang ngengche iawk kown. Nami khin khe dow Sari kowh chah nauowi lowk ia kown,” pakhai.15Now Sari dow kram kowh tada se tek mih, “Ang ren dowi dow,” pakhai.
Nachepaw CHAKRAMANG tek pe mih, “Tawng ren dowi chow, en ren owh!” pakhai.16Nami maru sum ia dow nami hownia awr rü hanow alowngma mih rah prakowi kowkowi khai, now Sawdawm marow pra iu mü khai. Abraham mih amatni kowi tawi saah kownkow amatni hown alak sangrum mowr kowtawi khai.17Now CHAKRAMANG aiamat tatek mih, “Ang nau changah kown mih lup Abraham kowi ang data pe kown bow?18Abraham hai aia krungchakuüa dow akri akraingma mih hai akürma mih chenchap nauang chowng kown mih chekhai. Aia hownia dow lusa kowi kowh chenchap maten naka prasi kown.19Ang CHAKRAMANG, aia kowi dow ang lang kloah mih chekhai. Aia chapauüa hai aia krungchakuüa naringkaw ang kownkow hai nachang lup iung hanow ang naukrang iawng nauowila kown mih natüngsangah kownkow aia kowi dow ang lang kloah mih chekhai. Naiawng che aia chapauüa hai aia krungchakuüa chang khai hanow aia lawnguan kowi kowh ang CHAKRAMANG tekta khowk mih dow ang nachang pe bowk kown,” pakhai.20Nahanow CHAKRAMANG tek pe Abraham mih, “Sawdawm hai Gawmawra marow kowi kingküa miuüa klow lainowmma hu khai bowt, now amatni kowh angak krang paw lainowmma suiiai kaniai khowk chekhai.21Naiawng rakowi ang taah mih iawng amatni ngah nowm chünchü, ngah dowi chünchü ang kowmüah tak; ngah mih ngah dowi mih achima tuk kown ang nau,” pakhai.22Nami khin khe pre ia mih dow kung prakowi plan hanow Sawdawm marow prakowi kowkowi khai. Nachenganchepaw Abraham dow CHAKRAMANG pur kowi ta iowng khai.23Now Abraham mih kowtatawnah now CHAKRAMANG kowi tek pe mih, “CHAKRAMANG, maru ngakuüa hown achinawmma mih maru-uüa kowi paw en piakla bowk kown chekhai bow?24Sawdawm marow kowi achinawmma mih maru 50 ia uowi khai e dow nami 50 ia rakowi nami marow kowi en lawtah dowi tham bow?25Maru ngakuüa hown achinawmma mih maru-uüa kowi mapaw en ia piakla dowi chekhai. Tawngplawng kowchow maru ngakuüa hown achinawmma mih maru-uüa kowi akat sang en piakah kown? Naiawng mapaw en ia piak dowi chekhai. Palusama kowi kowh tara chet miia dow tara nowm chet takla,” pape khai.26Nakhowk khe CHAKRAMANG tek pe mih, “Sawdawm marow kowi che achinawmma mih maru 50 ia ang khi khai hanow nami maru-uüa rakowi marow mih ang piakah dowi tham,” pakhai.27Now Abraham tek pe mih, “Mü diah, ang dow dinchow hown kowh thawpah mih maru chowtaih. Nachenganchepaw sakkraingma hown CHAKRAMANG ang plan tek en iawk tak.28Nakowi che achinawmma mih maru 50 ia kowi 5 ia uowi dowi e dow marow mih en napiakta kown bow?” pakhai.
CHAKRAMANG tek pe mih, “Nakowi che achinawmma mih maru 45 ia ang khi hanow nami marow ang piakta dowi tham,” pakhai.29Now Abraham plan tek pe iawk mih, “Nakowi che achinawmma mih maru 40 iachow e dow nami marow en napiakta kown bow?” pakhai.
CHAKRAMANG tek pe mih, “Nami 40 ia rakowi nami marow ang piakta dowi tham,” pakhai.30Now Abraham plan tek pe iawk mih, “CHAKRAMANG hang kunmarau diah, ang plan tek iawk tak; nakowi che achinawmma mih maru 30 iachow e dow nami marow en piakta kown bow?” pape khai.
CHAKRAMANG tek pe mih, “Nakowi che achinawmma mih maru 30 ia ang khi hanow nami marow ang piakta dowi tham,” pakhai.31Now Abraham plan tek iawk mih, “CHAKRAMANG tut-e sakkraingma hown ang tekta khowk chedow ang plan tek iawk tak. Nakowi che achinawmma mih maru 20 iachow e dow nami marow en napiakta kown bow?” pakhai.
CHAKRAMANG tek pe mih, “Nami 20 ia rakowi nami marow mih ang piakta dowi tham,” pakhai.32Now Abraham plan tek iawk mih, “CHAKRAMANG hang kunmarau diah, ang plan lünta en akatchow tak. Nakowi che achinawmma mih maru hamüt iachow e dow nami marow en napiakta kown bow?” pape khai.
CHAKRAMANG tek pe mih, “Nami hamüt ia rakowi nami marow mih ang piakta dowi tham,” pakhai.33Abraham hown ki taklang hanow CHAKRAMANG dow powt khai, now Abraham paw aia kim prakowi plan khai bowt.
The Seed Company