Uown Thawp15
1Nami kung kowi dow mukmang kowi CHAKRAMANG tek pe Abram mih, “Abram, hangkow kram diah. Ang mih en kowh kawngma chekhai; en kowi dow ang nalawng en reng kown, now en kowh awmrawm sung dow akri akraingma naown kown,” pakhai.2Nachenganchepaw Abram tek pe mih, “Aw CHAKRAMANG, matawng tak chow en nape ang kown? Ang kowh dow chah paw uowi dowi. Ang kowng kung kowi ang kowh dawngthawnguan nata powng kown mih dow Damaska marow hownia kowh Eliezer chowtaih.3Ang kowi dow en pe ka ang chah dowi chekhai. Naiawng rakowi ang kim kowi kowh nar lowk ia mih chowtaih ang kowng kung kowi ang kowh dawngthawnguan nata powng kown,” pape khai.4Nakhowk khe Abram kowi CHAKRAMANG tek pe mih, “Aia mih en kowh dawngthawnguan naka powng kown nadowi. En kowh dawngthawnguan napowng kown mih dow en matia kowh chapa chowtaih,” pakhai.5Nami kung kowi dow prang kowi hawla now Abram kowi CHAKRAMANG tek pe mih, “Kuang prakowi awr mü diah. En che ia now awr mih krek sam rüa madiah. En krungchakuüa paw awr mih krek iawng nowng rüaah dowi mowr nakawm kown,” pakhai.6Abram dow CHAKRAMANG laiklow owm khai. Naiawng rakowi CHAKRAMANG mih Abram kowi achinawmma mih maru padow tuakah khai bowt.7Now Abram kowi CHAKRAMANG tek pe mih, “Nami pren nape en kownkow Kaldaiuüa pren kowi kowh Ur marow hownia uang lawtla en mih CHAKRAMANG ang chowbowt,” pape khai.8Nachenganchepaw Abram klangah mih, “Aw CHAKRAMANG Thurai, mami pren en nape ang ngengche kown pami tawng iawng chow ang natukah kown?” pape khai.9Abram kowi CHAKRAMANG plan tek pe mih, “Achi natatow sangbowk laitawm lowk kown. Naiawng rakowi sum ning mih chia iia apum, sum ning mih rua iia apum hai sum ning mih ruapurla apum ang tut-e uang pawla diah. Nami klen kowi kaurawng uatur hai kimtawn uatur chah paw uang pawla lowk chi diah,” pakhai.10Now Abram dow CHAKRAMANG tek iawng chang khai bowt. Aia dow naiawngün bowkbowk mih uang pawla hanow lowkchow lowkchow dawnglang taliti kowi praah khai. Nami aia praah mih dow pre prakowi akra akrachow towah khai. Tawkche uakling pre buk mih kowi dow aia prala dowi chekhai.11Nakhowk khe naiawngün chak uak luk kowi mih langta hawmh uang chawp khai. Tawkche nami langta hawmh kowi Abram hawt prütta khai.12Now sat kup ngialia mih khin khe dow Abram mih amüi khai. Aia müi dih thüm khe aia luk kowi mih kramra uowima mih uariiu uang takhu khai.13Nakhowk khe Abram kowi CHAKRAMANG tek pe mih, “En krungchakuüa mih akeng pren kowi nacham uowi kown. Nakowi mih prenlang maru iawng hai 400 ning mowr nar kowi nauowi büah kown. Nami khin khe amatni mih lainowmma nangare kown. Mami laiklow dow en mih tukah ngengche diah.14Nachenganchepaw amatni kowi kowh towah nar mih chenchapuüa kowi ang naripah kown. Nami kung kowi dow amatni mih nami pren hownia nauang lawt büah kown, now nakowi kowh dawngthawnguan paw ahuma nauang pawla büah kown.15Nachenganchepaw nami dowi rawn khe ning ahuma en nasing tak kown, now thaulangma en nakowng hanow narik ka tadupra kown. Nahanow en pipu-uüa tut-e en natawi uowi bowt kown.16Now tali chowng mih en krungchak maru-uüa dow mami pren kowi nauang plan büah iawk kown. Tawngplawng kowchow panow nakowi kowh uowi mih Amawruüa mih nami khin khe tak nakala ripra pat mih lup ngak nachang büah kown,” pakhai.17Nami kung kowi sat kup kowh uar aiiuma mih khin khe khü ngawnglawng mih taping hai lün pluplup mih maitawng uang tatüng khai. Naiawngün dow pre prakowi kowh akra akrachow towah mih asadua chaknga takra iawng powt khai.18Nami ni khe Abram vüi CHAKRAMANG tow pe sangbowk laitawm mih, “Aigupta pren kowi kowh aw hownia Iufratis awma mowr mami pren maten mih en krungchakuüa kowi ang peta khowk.19Nami ang pe en mih pren kowi uowi miuüa dow Kenuüa, Kenisuüa, Kadmawnuüa,20Hituüa, Perizuüa, Refaimuüa,21Amawruüa, Kananuüa, Girgasuüa hai Jebusuüa chekhai,” pakhai.
The Seed Company