Uown Thawp14
1Akat khe mih Elam pren kowi Kedalamer, Sinar pren kowi Amrafel, Ellasar pren kowi Ariuk hai Kawim pren kowi Tidal büah chowm mang mih khin khe maiawng uang own khai.2Nakhowk khe nami mang tali ia mih takrüpah hanow Sawdawm marow mang Bera, Gawmawra marow mang Birsa, Adma marow mang Sinab, Zebawim marow mang Semeber hai Zoar marow mang büah kowi kowsenah khai. (Zoar marow dow Bela marow chekhai).3Naiawng rakowi nami mang tanga ia dow amatni kowh siphaiuüa kowi kuala hanow Sidim lawngrawi kowi kowkowi khai. (Nami lawngrawi dow Sata Ik chekhai).4Nami dowi rawn khe mih naiawngün manguüa dow laipre ning mowr mang Kedalamer nimkrüa kowi uowi büah khai. Nachenganchepaw laisum ning khe dow mang Kedalamer kowi kingküaah büah khai bowt.5Nami paning kung kowi dow mang Kedalamer mih akeng pren mang aia kowh auiuauüa sum ia kowi hawla now cham tasen khai. Amatni cham tarü tasen mih khin khe tiama kowi kowh krumla mih marow maten kowi paw senla büah khai. Amatni dow Astarawt-Karnaim marow kowi kowh Refaimuüa kowi paw senla now nowngta büah khai, Ham marow kowi kowh Zuzimuüa kowi paw nowngta büah khai, now Save Kiriathaim marow kowi kowh Emimuüa kowi paw nowngta büah khai.6Nami klen kowi Seir hungh kowi kowh Hawruüa kowi paw nowngta büah khai. Amatni dow süngrüp süngkangma ria kowi kowh El-Paran marow mowr krawi senla büah khai.7Nami kung kowi dow uang plan büah hanow En-Mispat kowi kowkowi büah khai (En-Mispat dow Kades marow chekhai), now Amalekuüa kowh pren maten dow kowpowngta büah khai. Nami klen kowi Hazazawn-Tamar marow kowi kowh uowi mih Amawruüa kowi paw kownowngta büah khai.8Nami kung kowi dow Sawdawm marow mang, Gawmawra marow mang, Adma marow mang, Zebawim marow mang hai Bela marow mang mih amatni kowh siphaiuüa kowi kuala hanow Sidim lawngrawi kowi kowdowk tasen büah khai. (Bela marow dow Zoar marow chekhai).9Amatni kowh ransu-uüa dow Elam pren kowi kowh mang Kedalamer, Kawim pren kowi kowh mang Tidal, Sinar pren kowi kowh mang Amrafel hai Ellasar pren kowi kowh mang Ariuk büah chekhai. Tanga ia mang mih tali ia mang kowi senah khai.10Sidim lawngrawi kowi dow rinaing kuam ahuma chekhai. Tasen sum kowh amatchi kowh siphaiuüa hailawm Sawdawm hai Gawmawra mang powt mih khin khe nami rinaing kuam kowi mih dowh büah ne khai. Now akeng miuüa dow hungh prakowi cham powt khai.11Tasen kowi awng mih manguüa dow Sawdawm hai Gawmawra marow kowi kowh dawngthawnguan hai chakkham maten pawla pe bowk khai.12Nami khin khe Abram naumow kowh chapa Lawt uowi mih paw Sawdawm marow kowi chekhai. Aia kowh dawngthawnguan maten hailawm Lawt kowi paw nami manguüa khümla now pawla khai.13Akung kowi maru lowk ia mih ku powt hanow Abram kowi nami satang dow kowphowng pe khai. (Abram dow Hebrai maru chekhai). Nami khin khe Abram uowi mih dow Amawr maru Mamre kowh sasua singh rüm ria kowi chekhai. Mamre dow Eskawl hai Aner iüah kowh taimow. Akrat pusa khin khe lowkkowlowk natakhowng kown mih Mamre büah tainau hown Abram kowh laikham uowi chekhai.14Abram dow anaumow chapa Lawt kowi khümla mih satang ta hown akrowksang aia kim kowi kowh dia mih naruüa tasen kiakma miuüa kowi pawla 318 ia now kowkrawi dowk tasen khai. Amatni dow Dan marow mowr ransu-uüa kowi kowkrawi senah khai.15Abram mih aia kowh maru-uüa kowi changah pre sum thum khai, now uar-e khe kowsenah büah hanow ransu-uüa kowi nowngta büah khai. Amatni dow Damaska tawngphak pra kowh Hawba marow mowr ransu-uüa kowi kowkrawi senah khai.16Aia dow ransu-uüa pawla mih uanh maten uang plan pawla khai, now anaumow chapa Lawt kowi paw aia kowh dawngthawnguan hailawm uang plan pawla khai. Nami klen kowi ransu-uüa khümla mih masiuüa hawmh hai akeng miuüa kowi paw uang lawngla khai.17Mang Kedalamer hai akeng pren manguüa hown tasen awng kung kowi dow Abram mih uang plan mang khai bowt. Nami khin khe Abram hown nauang takrum kownkow Sawdawm marow mang mih Save lawngrawi kowi uang khai. (Save Lawngrawi dow Mang Lawngrawi chekhai).18Now Salem marow mang Melkizedek paw kawm hai grep tui uang pawla now Abram kowi uang peah khai. Melkizedek dow lang kri lang kraing mih Thurai kowh uamow chekhai.19Aia dow Abram kowi peah prasi se tek pe mih, “Mukuang hai lusa thawp mih lang kro mih Thurai dow pacham pe en prasi lah.20Ransu-uüa hown tasen mih khin khe pe awng en mih lang kro mih Thurai dow akiow pacham uowi lah,” pakhai. Nahanow Abram dow aia krawi klanah mih uan maten hownia hamüt bak kowi abak mih Melkizedek kowi peah khai.21Nami kung kowi Sawdawm marow mang tek pe Abram mih, “Dawngthawnguan maten dow en paw taih. Nachenganchepaw ang kowh maru-uüa kowi plan peta ang bowk diah,” pape khai.22Nachenganchepaw Sawdawm mang kowi Abram tek pe mih, “Mukuang hai lusa thawp mih lang kro mih Thurai ming hown chawk bawng se ang takham khowk.23En kowh uanh maten, en kowh lasin aiangchow paw, en kowh phanaikhawk leng lowkchow paw tawngpaw ang napaw kown nadowi. ‘Abram kureng mih dow ang kowh dawngthawnguan hown chekhai,’ pami en naia tekla dowi kownkow maiawng ang takham mih chekhai.24Ang kowh maru-uüa chala khamla mih klen kowi tawngpaw ang paw en dowi bowt tham; tawkche ang hown kowh tawi mih Aner, Eskawl hai Mamre büah kowi amatni kowh vüi bak pe pawah diah,” pape khai.
The Seed Company