Uown Thawp13
1Abram mih amasi hai aia kowh uowi mih dawngthawnguan srui pawla now Aigupta pren hownia lawt khai, now Kanan pren mrawkphak pra kowh Negeb pami süngrüp süngkangma prakowi awr powt khai. Lawt paw aia hown katsang tawi powt khai.2Abram dow kurengma. Aia kowh dow tawncher hai kuh hown tai ün ahuma chekhai.3Aia dow Negeb hownia mang mang now Bethel hai Ai marow takra kowi aia rik khupla tangbung hai rik thawp phuchuara mih re-e kowtowm khai. Nakowi aia mih CHAKRAMANG kowi chupah iiaah khai.5Abram hown kowh tawi powt mih Lawt kowh paw chia ün, ruaün, ruapur hai tangbung ün ahuma chekhai.6Amatchi kowh dow tawncher hai dawngthawnguan hu lai rakowi arasang nataiua uowila kown mih süng talawk iüah dowi bowt.7Naiawng rakowi Abram kowh tawncher thing mih hown Lawt kowh tawncher thing mih taran khai. Nami khin khe Kananuüa hai Perizuüa paw nami pren kowi uowi chekhai.8Nakhowk khe Lawt kowi Abram tek pe mih, “Sünta diah, achi dow pama pachowh asinma chekhai. Naiawng rakowi en hai ang hown taran kown mih mapaw iung dowi. En kowh tawncher thing mih hown ang kowh tawncher thing mih paw taran kown mih iung dowi.9Paprenma dow achi pur kowi uowi hüah towbowt. Naiawng rakowi achi talang mih nalang iung kown; lakuai pra che en mang now hawmlawm pra ang mang sow, now hawmlawm pra che en mang now lakuai pra ang mang sow,” pape khai.10Nakhowk khe Lawt dow krawi tang mü hanow Jawrdan aw mrawkphak pra kowh lawngrawi haikhi khai. Nami lawngrawi kowi dow tui ahuma uowi mih aia khi khai. Nami lawngrawi dow Jawrdan aw hownia Zoar marow mowr mih CHAKRAMANG kowh krum iawng chekhai. Krawng dow Aigupta pren kowi kowh krawng iawng aiungma chekhai. (Nami khin khe Sawdawm hai Gawmawra marow mih CHAKRAMANG piakta dowi tak chekhai).11Naiawng rakowi Lawt dow Jawrdan aw mrawkphak pra kowh lawngrawi kowi nauowi kownkow tatuak khai, now aia dow satlawt prakowi awr powt khai bowt; naiawng hai amatchi dow taprai khai bowt.12Abram dow Kanan pren kowi ta uowi khai, now Lawt dow nami lawngrawi kowi kowh marow takra kowi kowuowi khai. Aia dow Sawdawm marow ria mowr krawi khup tangbung khai.13Sawdawm marow chakuüa dow angakma chekhai. Amatni dow CHAKRAMANG kowi kingküa hai lainowmma chang angak khai.14Lawt lang talang kung kowi Abram kowi CHAKRAMANG tek pe mih, “En iowngra hownia tawngphak, mrawkphak hai satlawt, satkup tapat lut krawi sam mü akat madiah.15Nami en khi-ah mih srui dow en hai en krungchakuüa kowi chowngchowng saksakma vüi ang nape enni kown.16En krungchakuüa kowi mih lusa kowi kowh dinchow iawng ang nachangah kown. Lusa kowi kowh dinchow che nowng rüa now en krungchakuüa kowi paw nanowng rüa kown.17Mami paprenma kowi krawi len akat diah. Tawngplawng kowchow panow mami pren mih ang nape en kown chekhai,” pakhai.18Nakhowk khe Abram dow aia kowh tangbung lutla now Hebrawn marow kowi kowkowi khai, now nakowi kowh Mamre kowh sasua singh rüm kowi kowkhup tangbung khai. Nakowi paw aia dow CHAKRAMANG vüi thawp phuchuara lowk chekhai.
The Seed Company