Ezra8
1Persia pren kowi Artazerzes chowm mang mih khin khe Babulawn pren hownia ang hown kowh Jerusalem marow kowi tawi plan mih machak aluchowuüa dow maiawngünuüa chekhai.2Finehas machak hownia Gersawm, Ithamar machak hownia Daniel, David machak hownia Hatus.3Paraws machak hownia Zekaria hai machak ming tang bowih kowi kowh ming rui uowi mih 150 ia.4Pahat-Moab krungchak hownia Zerahia kowh chapa Eliehoenai hai aia hown kowh uang tawi mih 200 ia.5Zatu krungchak hownia Jahaziel kowh chapa Sekania hai aia hown kowh uang tawi mih 300 ia.6Adin krungchak hownia Jonathan kowh chapa Ebed hai aia hown kowh uang tawi mih 50 ia.7Elam krungchakuüa pungmadawng hownia Athalia kowh chapa Jesaia hai aia hown kowh uang tawi mih 70 ia.8Sefatia krungchak hownia Mikhael kowh chapa Zebadia hai aia hown kowh uang tawi mih 80 ia.9Joab krungchak hownia Jehiel kowh chapa Obadia hai aia hown kowh uang tawi mih 218 ia.10Bani krungchak hownia Josifia kowh chapa Selomit hai aia hown kowh uang tawi mih 160 ia.11Bebai krungchak hownia Bebai kowh chapa Zekaria hai aia hown kowh uang tawi mih 28 ia.12Azgad krungchak hownia Hakatan kowh chapa Johanan hai aia hown kowh uang tawi mih 110 ia.13Adonikam krungchak hownia uang ta plan miuüa dow Elifelet, Jeuel, Semaia hai amatni hown kowh uang tawi mih 60 ia.14Bigvai krungchak hownia Uthai, Zakur hai amatchi hown kowh uang tawi mih 70 ia chekhai.15Now Ahava marow pra kowh hawr mih aw re-e naiawngün maru-uüa kowi dow arasang ang kuaah khai, now nami re-e mih khup tangbung hanow anging uowila sum ni khai. Nakhowk khe naiawngün maru-uüa pungmadawng kowi ang krawi mü pache iawngpa mih maru-uüa hai uamowuüa dow uowi chowdiah. Tawkche Leviuüa dow lowk ia paw uowi dowi chekhai.16Naiawng rakowi nakhowk khe chanlaira uowima mih Joiarib hai Elnathan iüah hailawm aluchow Eliezer, Ariel, Semaia, Elnathan, Jarib, Elnathan, Nathan, Zekaria hai Mesulam büah kowi ang hawah khai.17Amatni kowi dow Kasifia marow kowi kowh Leviuüa kowh aluchow Ido tut-e ang kowchinah khai. Now anging kowh Thurai chup kim kowi nachang lup kown mih maru nauang krawi chin ne kownkow Ido hai Thurai chup kim kowi kowh lup chang mih aia tainau-uüa kowi ang krawi tek pe khai.18Nakhowk khe anging kowh Thurai dow tawi uowila anging reng chekhai. Naiawng rakowi Ido hai aia tainau-uüa mih Serebia hai aia chapauüa hown tainau-uüa kowi uang krawi chin anging lairaiat ia khai. Serebia dow chanlaima mih maru chekhai. Aia dow Levi chenchap Mahli kowh krungchak chekhai.19Nami klen kowi amatni dow Merari kowh krungchak Hasabia hai Jesaia, Jesaia kowh tainau-uüa hai chapauüa hailawm uang krawi chin anging pirmi ia khai, now Thurai chup kim kowi kowh lup chang miuüa kowi paw uang krawi chin anging 220 ia khai. Naiawngün lup chang miuüa dow Leviuüa kowi natawi khowngah Thurai chup kim lup kownkow amatni pipu-uüa kowi David hai aia kowh maru iukuüa khowm bowkla mih chekhai. Naiawngün maru-uüa ming dow ming tang bowih kowi ruiah khai.21Nami kung kowi dow Ahava aw re-e uowi reng tak khe anging kowh Thurai pur kowi khamsum khamdawma nauowi kownkow hai nakhang hawm kownkow ang phuang khai. Naiawng ang phuang mih dow anging kowh chauüa hai dawngthawnguan maten aiungma anging naia mangla kownkow chekhai.22Tiama rawng kowi ransu-uüa rut hownia nakala anging kownkow khawk hown kowh mang mih siphaiuüa hai kawrnga kowi kowh chowm mih siphaiuüa kowi mang hownia nalüla ne kown ang nau chowdiah. Tawkche ang rukrai khai. Tawngplawng kowchow panow, “Thurai nau iawng chang miuüa kowi dow Thurai towkala reng. Tawkche aia kowi nuata miuüa luk kowi dow aia kowh kunmaraura uang kla reng chekhai,” pami mang kowi anging tekta pe khai bowt.23Naiawng rakowi khang pe hawm khükhü Thurai tut-e anging awr lü awr leng khai, now aia dow anging awr lü mih iawng uang chang anging khai.24Nami kung kowi dow uamowuüa pungmadawng hownia aluchow laipre ia kowi ang kloah khai. Naiawngün aluchowuüa dow Serebia, Hasabia hai amatchi hown akeng mih uamow hamüt ia chekhai.25Now amatni kowi mih Thurai chup kim vüi mang hai aia kowh prengia pek miuüa, maru iukuüa hai nakowi kowh uowi mih Israeluüa pe mih kuh hai tai hown akeng mih uanh pek maten khaiah now ang peah khai.26Amatni kowi ang peah mih dow tai 24,300 set, tai hown kowh bia 3,400 set hai kuh 3,400 set chekhai.27Nami klen kowi kuh hown kowh bia paw ang peah pirmi klüng khai; naiawngün dow bowkbowk kowi adik raiat set chekhai. Now kuh iawng asung khakma mih kri hown kowh bia klangiungma mih paw ang peah pre buk khai.28Amatni kowi ang tek pe mih, “Enni hai mami puh bia aikam maten dow CHAKRAMANG vüi chimsaita mih chowbowt. Maiawngün kuh hai tai maten dow CHAKRAMANG enni pipu-uüa kowh Thurai vüi kowmatia sak nau hown kowh maru uang pe mih chekhai.29Maiawngün uanh dow Jerusalem kowi Thurai chup kim kowi kowh dawngthawnguan towk rah towklak kowi kowtowm dowi mowr kaneuma khetah büa diah. Maiawngün uanh dow uamow lang kri miuüa, Leviuüa hai Israeluüa kowh chowlowkkow machak aluchowuüa kowi enni napeah kown, now naiawngün uanh maten dow amatni mih nakhaiah kown,” pakhai.30Nami kung kowi dow uamowuüa hai Leviuüa mih naiawngün khaiah mih kuh, tai hai puh bia aikam mih Jerusalem kowi kowh Thurai chup kim kowi nakowpawla kownkow paw büah khai.31Now la uown kowi kowh laipre ni mih ni khe dow Ahava aw re-e kowh tangbung khupra hownia Jerusalem prakowi anging tarü khai bowt. Nakhowk khe Thurai dow tawi uowila anging reng chekhai, now aia dow tiama kowi ransu-uüa hai damrauüa rut hownia hen anging khai.32Naiawng hai Jerusalem kowi kowting now sum ni mowr nakowi anging tanai khai.33Now tali ni mih ni khe dow naiawngün kuh, tai hai puh bia aikam mih khaiah now Thurai chup kim kowi uamow Uria kowh chapa Meremawt rut kowi anging appe khai. Nakhowk khe Meremawt hown tawi uowi miuüa dow Finehas kowh chapa Eleazar, Jesua kowh chapa Jozabad hai Binui kowh chapa Noadia büah chekhai. Amatni dow Leviuüa kangowh chekhai.34Nakhowk khe naiawngün uanh maten dow rüaah hai khaiah now mün khowt chow uowi mih chabowih kowi ruiah khai.35Now cham takhangra hownia uang plan mih maru-uüa dow Israeluüa kowh Thurai vüi chang tikah mih uanap pawi khai. Amatni dow Israel chen pachenma vüi chiala laipre pum, ruapurla 96 pum, ruapur chah 77 pum hai angak lawt lük müa ruala laipre pum pe büah khai. Naiawngün uanh maten dow CHAKRAMANG vüi changla tikah mih uanap kownkow pe mih kangowh chekhai.36Amatni dow Iufratis aw satkup pra kowh pren kruitown miuüa kowi Babulawn pren mang kowh ana pek krawi phowk pe khai. Nami ana pek tata hanow amatni dow maru-uüa kowi hai Thurai chup kim lup kowi tawi khowngah khai.
The Seed Company