Ezra7
1Naiawngün phaw mih khin akrama kung kowi Persia pren mang Artazerzes chowm mang mih khin khe Ezra dow Babulawn pren hownia Jerusalem marow kowi uang khai. Ezra kowh pa dow Seraia, Seraia kowh pa dow Azaria, Azaria kowh pa dow Hilkia,2Hilkia kowh pa dow Salum, Salum kowh pa dow Zadawk, Zadawk kowh pa dow Ahitub,3Ahitub kowh pa dow Amaria, Amaria kowh pa dow Azaria, Azaria kowh pa dow Meraiawt,4Meraiawt kowh pa dow Zerahia, Zerahia kowh pa dow Uzi, Uzi kowh pa dow Buki,5Buki kowh pa dow Abisua, Abisua kowh pa dow Finehas, Finehas kowh pa dow Eleazar, now Eleazar kowh pa dow uamow lang kri mih Arawn chekhai.6Ezra dow Mosi kowi kowh CHAKRAMANG Israeluüa kowh Thurai peah mih ari aiang atukma mih kawngmu sara chekhai. Aia luk kowi dow CHAKRAMANG aia kowh Thurai prasira uowi reng chekhai. Naiawng rakowi aia kowi dow aia lü mih srui mang peah khai. Babulawn pren hownia uang lawt hanow Jerusalem marow kowi aia uang uowi mih dow mang Artazerzes chowm mang mih ranit ning khe chekhai.7Now aia hown dow Israeluüa, uamowuüa, Leviuüa, meng sarauüa, Thurai chup kim chawng miuüa hai Thurai chup kim kowi kowh lup chang miuüa mih uang tawi khai.8Ezra luk kowi dow Thurai kowh saksing sanara tawi uowi reng chekhai. Naiawng rakowi aia dow la uown kowi kowh lacher pani khe Babulawn pren hownia lawt hanow tanga la kowi kowh lacher pani khe Jerusalem marow kowi uang ting khai.10Ezra dow CHAKRAMANG kowh ari aiang nasang kown mih, nami ari aiang nachün kown mih, ari arow hai ana pek Israeluüa kowi natüngsang kown mih kowi hing tape khai.11Ezra dow uamow hai kawngmu sara chekhai. Aia dow Israel kowi kowh CHAKRAMANG peah mih ana pek hai rirow atukma chekhai. Akat khe mang Artazerzes dow Ezra kowi maiawng hai sak pe cha khai:12“Ang manguüa kowh lang kri mih Artazerzes chekhai. Mami chasak dow uamow hai mukuang Thurai kowh ari aiang tüngsang mih Ezra kowi ang krawi sak pe mih chekhai.13“Jerusalem marow kowi en plan mih khin khe ang pren kowi kowh uowi mih Israeluüa, uamowuüa hai Leviuüa tawi plan kown nau mih uowi khai ne hanow natawi ia plan kownkow kawmat ang peta ana khowk.14Juda pren hai Jerusalem marow kowi Thurai kowh ari aiang chün tak chünchü mih en natukla kownkow ang hai ang kowh prengia pek mih ranit ia Jerusalem kowi kowchin en mih chowbowt.15Now Jerusalem marow kowi kowh uowi mih Israel kowh Thurai vüi sak nau hown kowh anging peah mih kuh hai tai maten paw pawla diah.16“Nami klen kowi Babulawn pren hownia kowh en kala mih kuh maten hai tai maten pawla diah, now Jerusalem marow kowi kowh Thurai chup kim thawp müa vüi sak nau hown kowh Israeluüa hai uamowuüa krawi pe en mih srui paw pawla diah.17Naiawngün kuh hai tai hown dow chiala, ruapurla hai ruapur chah, kawmdi uanap hai hüngah mih uanap chang müa uanh ün ranla diah, now naiawngün dow Jerusalem marow kowi kowh enni kowh Thurai kim kowi kowh phuchuara luk kowi changla phuchua diah.18Now ta marat mih kuh hai tai hown dow en hai en tainau-uüa hown Thurai tut-e iung iawng changla büa diah.19“Enni kowh Thurai chup kim kowi natawngah kownkow pe en mih puh bia aikam maten dow Jerusalem marow kowi kowh Thurai tut-e en nakowpawla kown.20Nami klen kowi enni kowh Thurai chup kim vüi lakke tak mih srui ang matia kowh dawngthawnguan towk rah hownia en napawla kown.21“Ang Artazerzes mih Iufratis aw pang satkup pra kowh dawngthawnguan chawng miuüa kowi ang peta ana khowk. Mukuang Thurai kowh rirow tüngsang mih uamow Ezra, en lü mih srui nape en kownkow amatni kowi ang tek pe khowk.22Amatni mih tai 3,400 set mowr, püm 18,000 set mowr, grep tui 2,200 set mowr, kanrawn sau 2,200 set mowr nape en kown, now awisa dow lakke takla mowr nape en kown.23Mukuang Thurai kowh ana pek iawng rowprowp Thurai chup kim vüi achang takla mih maten kaneuma en nachangah kown takla. Tawngplawng kowchow panow ang hai ang chapauüa luk kowi CHAKRAMANG kowh kunmaraura nauang ting kown mih ang nau dowi chekhai.24Nami klen kowi Thurai chup kim kowi kowh uamowuüa, Leviuüa, meng sarauüa, kangchawng miuüa hai Thurai chup kim kowi kowh lup chang miuüa maten hownia tawng iawng mih mangmu paw napaw dowi kown mih amatni kowi ang tek pe khowk.25“Ezra, en kowi dow Thurai pe en chanlaira khai. Nami chanlaira hown dow Iufratis aw satkup pra kowh uowi mih maru maten kowi nachet pe tara kownkow maru iukuüa hai tara chet miuüa kowi en natow pe kown. Tawkche naiawngün maru-uüa mih en kowh Thurai ari aiang natuk kown takla. Now Thurai ari aiang tuk dowi miuüa kowi dow en natüngsangah kown takla.26En kowh Thurai ari aiang hai mang kowh ari aiang chün dowi miuüa kowi dow naripah ngengche kown takla. Nami ripra dow kowngta takla mih chepaw naia, pren hownia prütta takla mih chepaw naia, dawngthawnguan pawta pe takla mih chepaw naia, now thawngklak takla mih chepaw naia kown,” pakhai.27CHAKRAMANG a-i pipu-uüa kowh Thurai dow akiow pacham uowi lah. Jerusalem marow kowi kowh CHAKRAMANG kim kowi naiawng mang ringkaw mih dow Thurai peah saktuak kowh chekhai.28Thurai mih aia kowh achur uowi dowi mih sakraura tüng ang rakowi mang, mang kowh prengia pek miuüa hai mang kowh maru iukuüa pe ang ringkawra khai. CHAKRAMANG ang kowh Thurai tawi uowila ang rakowi ang ka sakkraingra khai, now Israel aluchowuüa kowi dow Jerusalem marow kowi ang uang nowng pawla khai.
The Seed Company