Ezra10
1Ezra dow Thurai chup kim pur kowi tabawk krawm now chup Thurai se amatni kowh angak taphuang hanow kar khai. Nakhowk khe Israeluüa maten dow masiuüa, kachakuüa, aiuk, asowm akawmma Ezra re-e uang takua talawm khai, now naiawngün maru kawmuüa paw lainowmma tawi kar khai.2Nakhowk khe Elam machak hownia Jehiel chapa Sekania tek pe Ezra mih, “A-i pungmadawng kowi akeng chenchap masiuüa kowi chawng mih uowi ne chekhai. Thurai kaah sakowm dowi iawng a-i uowi khai. Nachenganchepaw kawmat paw CHAKRAMANG kowh sakraura naka kown mih Israeluüa kowh sakowmra uowi tak.3Naiawng rakowi chu, a-i kowh Thurai pur kowi a-i takham diah sik. En kowh prengia pek iawng hai Thurai kowh ana pek kowi chün miuüa kowh prengia pek iawng a-i chang diah sik. A-i chawngah mih akeng chenchap masiuüa kowi hai chauüa kowi ari aiang kowi arui uowi iawng a-i khuata diah sik.4Aw Ezra, naiawngün lup nachang kown mih dow en kowh kurdik chekhai. Naiawng rakowi sakkraingma hown chang diah; anging tawi khowng en kown taih,” pape khai.5Nakhowk khe Ezra dow awr rü hanow Sekania kowh laiklow iawng nachang kownkow uamowuüa, Leviuüa hai Thurai chup kim pur kowi kowh takua talawm mih Israeluüa maten kowi pe takhamah khai. Nahanow amatni dow saktuak akhawtma hown takham büah bowk khai.6Nami kung kowi dow Ezra mih Thurai chup kim pur hownia powt hanow Eliasib kowh chapa Jehohanan kowh towklak kowi kowkowi khai. Now cham takhangra hownia kowh uang plan miuüa Thurai kaah sakowm dowi iawng uowi rakowi aia dow nami towklak kowi tawngpaw cha dowi kham dowi kowi kar hai nguk hown uowi khai.7Now cham takhangra hownia kowh uang plan mih maten Jerusalem marow kowi nauang takua talawm kownkow Jerusalem marow hai Judauüa süng kowi kowh uowi mih maten kowi krawi phowng pe satang khai. Amatni dow sum ni mowr kowi Jerusalem kowi uang ia ting dowi mih maten kowi napawta pe dawngthawnguan bowk hanow cham takhangra hownia uang plan miuüa pungmadawng hownia nabatta kown mih krawi phuangla khai.9Naiawng rakowi sum ni lak kowi Juda hai Benjamin süng kowi kowh maru maten mih Jerusalem marow kowi uang takua talawm khai. Naiawng amatni takua talawm mih dow taku la kowi kowh lacher pirmi ni khe chekhai. Nakhowk khe amatni dow Thurai chup kim pur kowi kowh viadawng kowi chowmla rim se nami lawnguan pankrima rakowi hai uangchak rakowi chürla kluk khai.10Nakhowk khe uamow Ezra awr iowngah hanow maru kawmuüa kowi tek pe mih, “Thurai kaah sakowm dowi iawng enni uowi khai. Israeluüa kowh akeng mih angak hown akeng chenchap masiuüa kowi enni paw mih angak paw enni uang bawngla khai.11Naiawng rakowi kawmat mih CHAKRAMANG enni pipu-uüa kowh Thurai tut-e taphuang angak büah hanow Thurai naukrang iawng chang büa diah. Enni pren kowi kowh uowi mih akeng chenchapuüa hai akeng chenchap masiuüa hawmh hownia lang takra büa diah,” pakhai.12Nakhowk khe Ezra kowi atün atünma maru kawmuüa tek pe mih, “En tekah mih lainowmma iung; en tek iawng a-i nachang kown takla.13Nachenganchepaw nami lup dow ani pre ni sang ia chur mih lup nadowi. Tawngplawng kowchow panow naiawng mih lup ngak chang mih dow anging akawmma chekhai. Nami klen kowi kawmat dow uang paw chak mih nowm tak. Naiawng rakowi uat kowi anging nowng iowng dowi bowt.14Nami lawnguan kowi tawng ngai chow achang takla mih anging kowh aluchowuüa pacham paw kurdik lah. Now anging chowlowkkow kua hai marow towng kowi kowh akeng chenchap masiuüa kowi chawng mih maten amatni kowh lawngtang aluchowuüa hai tara chet miuüa kowi pawla now khowm bowkta mih akhin khe Jerusalem marow kowi pauang lah. Nahanow nami angak rakowi kramra uowima mih Thurai kowh kunmaraura dow a-i hownia naprowng kown taih,” pakhai.15Nakhowk khe nami laiklow kowi üa mih dow Asahel kowh chapa Jonathan hai Tikva kowh chapa Jazeia iüah chekhai. Now amatchi kowi tawi tangila mih dow Mesulam hai Levi krungchak Sabethai iüah chekhai.16Now cham takhangra hownia kowh uang plan miuüa dow nami laiklow iawng chang khai bowt. Uamow Ezra mih krungchak towng hownia rui pe aluchow lowk ia chi khai. Now hamüt la kowi kowh lacher pani khe amatni dow nami akeng chenchap masiuüa kowi chawng miuüa kowh lawnguan kowi nachichet kownkow chowm khai bowt.17Nami chichetra lup maten churta büah mih dow auai ning kowi kowh la uown kowi lacher pani khe chekhai.18Uamowuüa hownia akeng chenchap masiuüa kowi paw miuüa dow Jozadawk kowh chapa Jesua hai atainau-uüa kowh krungchak hownia Maseia, Eliezer, Jarib hai Gedalia büah chekhai.19Amatni dow kowmatia masi kowi nakhuata kown pami takham büah bowk khai, now amatni changta angak mih rakowi lowk ia e apum chi uang pawla ruapurla büah hanow chang angak lawt lük müa uanap pawi büah khai.20Akeng mih uamowuüa Imer krungchak hownia Hanani hai Zebadia iüah,21Harim krungchak hownia Maseia, Elija, Semaia, Jehiel hai Uzia büah,22Pasur krungchak hownia Eliawenai, Maseia, Ismael, Nethanel, Jozabad hai Elasa büah chekhai.23Levi krungchak hownia akeng chenchap masiuüa kowi paw miuüa dow Jozabad, Simei, Kelaia (Kelita), Pethahia, Juda hai Eliezer büah.24Meng sarauüa hownia dow Eliasib, now Kangchawng miuüa hownia dow Salum, Telem hai Uri büah chekhai.25Israeluüa hownia akeng chenchap masiuüa kowi paw miuüa dow Paraws krungchak Ramia, Izia, Malkija, Mijamin, Eleazar, Hasabia hai Benaia büah.26Elam krungchak hownia Matania, Zekaria, Jehiel, Abdi, Jeremawt hai Elija büah.27Zatu krungchak hownia Eliawenai, Eliasib, Matania, Jeremawt, Zabad hai Aziza büah.28Bebai krungchak hownia Jehohanan, Hanani, Zabai hai Atlai büah.29Bani krungchak hownia Mesulam, Maluk, Adaia, Jasub, Seal hai Jeremawt büah.30Pahat-Moab krungchak hownia Adna, Kelal, Benaia, Maseia, Matania, Bezalel, Binui hai Manase büah.31Harim krungchak hownia Eliezer, Isija, Malkija, Semaia, Simiawn, Benjamin, Maluk hai Semaria büah.33Hasum krungchak hownia Matenai, Matata, Zabad, Elifelet, Jeremai, Manase hai Simei büah.34Bani krungchak hownia Madai, Amram, Uel, Benaia, Bedeia, Keluhi, Vania, Meremawt, Eliasib, Matania, Matenai hai Jasu büah.38Binui krungchak hownia Simei, Selemia, Nathan, Adaia, Maknadebai, Sasai, Sarai, Azarel, Selemia, Semaria, Salum, Amaria hai Josef büah.43Nebo krungchak hownia Jeiel, Matithia, Zabad, Zebina, Jadai, Joel hai Benaia büah.44Amatni dow akeng chenchap masiuüa kowi chawng mih kangowh chekhai, now tawngbak mih kowh masi dow chauüa paw uowi ne chekhai.
The Seed Company