Nehemia1
1Ang dow Hakalia chapa Nehemia chekhai. Mami bowih kowi kowh arui uowi mih dow ang kowh lup lawnguan chekhai. Persia pren kowi mang Artazerzes chowm mang mih pirmi ning kowi kowh Kislev la khe ang uowi mih dow Susa marow kri kowi chekhai.2Nakhowk khe ang tainau Hanani mih ang tut-e uang khai, now aia hown Juda pren hownia kowh uang plan miuüa paw uang tawi khai. Amatni kowi dow Babulawn pren kowi takhangra hownia kowplan miuüa lawnguan hai Jerusalem marow lawnguan ang hawt lüntaah khai.3Nami khin khe amatni tek ang mih, “Babulawn pren kowi takhangra hownia Juda pren kowi uang plan miuüa dow nowm nowm krat büah khai, now ka rukrai büah khai. Jerusalem marow tap ün dow takhue khai, now tapplawt ün paw kam khai,” pakhai.4Naiawngün laiklow tata hanow ang khang hawm khai, now chowm se pre sum ni mowr kar hai nguk hown ang uowi khai. Now mukuang Thurai tut-e ang awr lü awr leng khai.5Ang awr chup Thurai mih, “Aw CHAKRAMANG mukuang Thurai, en dow kri kraingma hai kramra uowima mih Thurai chekhai. Sakrau en miuüa hai en kowh ana pek chün miuüa kowi dow en kowh achur uowi dowi mih sakraura laikham en town pe reng chekhai.6En nar Israeluüa vüi ni-ni uar-uar ang awr lü mih sakrauma hown iu sünta ang diah, now pela ang ching diah. Kingküala en mih angak anging Israeluüa changta mih srui dow ang uang taphuang khowk. Ang hai apa krungchakuüa paw changta angak khai nowm.7Lainowmma suiiai kaniai mih lup anging changta khai. En nar Mosi kowi kowh en peah mih ana pek maten, rirow maten hai ari aiang maten anging chün dowi chekhai.8“Sakrauma hai en nar Mosi kowi kowh en peah mih ana tuakah diah. En tek pe mih, ‘Ang kaah sakowm dowi iawng che enni uowi khai hanow akeng chenchapuüa pungmadawng kowi ang nauetta enni plawt kown.9Nachenganchepaw ang tut-e che enni uang plan khai, now ang kowh ana pek che enni chün khai hanow prenchur nammowt kowi enni cham taset plawt chepaw ang nakrawi kua enni hanow ang kowh uowi rah pahai ang lang kloah mih arah kowi ang nauang pawla enni kown,’ pape khai.10“Anging dow en kowh nar hai en kowh maru chowtaih. Anging kowi dow en kowh kri kraingma mih nowng changra hai akürma mih rut hown en uang klanla anging mih chekhai.11Aw CHAKRAMANG, sakrauma hai en kowh nar ang awr lü mih iu sünta ang diah. Now ringkaw en mih kowi anging awmrawm chekhai. Naiawng rakowi en kowh naruüa awr lü mih paw iu sünta pe diah. Ang awr lüah mih iawng iu chang ang diah, now saksing sanala ang kown mih saktuak mang kowi iu peah diah,” pakhai.
Ang dow mang kowh grep tui pek mih chekhai.
Ang dow mang kowh grep tui pek mih chekhai.
The Seed Company