Ezekiel6
1Now CHAKRAMANG laiklow dow ang tut-e uang plankut ting khai iawk.2CHAKRAMANG tek ang mih, “Aw maru chapa, Israel kowi kowh hungma mawngma prakowi dangah now pur prakowi nauang ting kown mih laiklow ang takcha kowi tek pe dit.3Israel kowi kowh hungma mawngma kowi tek pe dit. Hungma mawngma, awchawng hai lawngrawi maten kowi ang CHAKRAMANG Thurai tek pe mih laiklow dow pacham ta lah. Amatni kowi kingküara hai tasenra ang nauang pawla pe hanow arah kroma mih kowi kowh chupiiara maten ang napiakta pe kown.4Amatni kowh phuchuara maten ang napiakta pe kown, now amatni kowh maikhük towk müa phuchuara maten paw natimta pe kown. Amatni kowh arup aren pur kowi dow amatni kowh maru-uüa kowi ang nasatah kown.5Israeluüa kowh uak dow amatni kowh arup aren pur kowi ang natowah kown, now amatni kowh phuchuara riaret kowi dow amatni kowh hut ang nauetah kown.6Israeluüa uowi rah marow maten dow natapiak kown. Naiawng rakowi amatni kowh phuchuara hai arup aren maten paw natadi bowk kown. Amatni kowh maikhük towk müa phuchuara paw nataset plawt kown, now amatni thawpah mih chap maten paw natama bowk kown.7Now amatni pungmadawng kowi amatni maru-uüa dow nakowng kown. Naiawng phaw mih kung kowi dow ang chowtaih CHAKRAMANG pami natuk büah bowt kown.8“Nachenganchepaw nami ripra hownia dow ang pe plaiah ne kown. Tawkchedow akeng pren kowi nacham uowi büah kown.9Now akeng pren kowi cham uowi büah khe dow amatni kowh sak ang hownia tala mih hai amatni kowh sak kaah sakowm dowi mih natuk büah kown. Nami klen kowi amatni kowh mik arup aren kowi cham irh rakowi amatni kowh mik hown pe ang arau mih paw natuk büah bowt kown. Amatni kowh angak hai suiiai kaniaima mih lup maten rakowi kowmatia kowi amatni natasui kown.10Nami khin khe dow ang chowtaih CHAKRAMANG pami natuk büah bowt kown, now amatni luk kowi nauang pawla pe phih kown mih laiklow aiawnglowma ang tekah mih nadowi pami natuk büah bowt kown,” pakhai.11Nami kung kowi CHAKRAMANG kutplan tek ang iawk mih, “Ezekiel, Israeluüa kowh angak hai suiiai kaniaima mih lup maten rakowi kunmarau kowh en kowh rut akürma phekla se akür akürma khowi krawng diah. Tawngplawng kowchow panow tasenra, khown hai makowng hawi kowi amatni dow nakowng kown chekhai.12Alakma kowi kowh cham uowi miuüa dow makowng hawi hown nakowng kown, atawnchow kowi kowh uowi miuüa dow tasenra kowi nakowng kown, now ta sing uowi miuüa dow ransu-uüa rumta lut mih lak kowi khown hown nakowng kown. Naiawng hai ang kowh kunmaraura dow amatni luk kowi ang nasunta bowk kown.13Israeluüa dow amatni kowh phuchuara riaret kowi kowh arup aren maten dawng kowi, hungh aiuk aiukma mih maten luk kowi, amia aiuk aklangma kangowh mih singh krüa maten kowi, aram chakma mih karpowng singh krüa maten kowi nacham kowng kown; amatni kowh arup aren vüi cham towk maikhük mih rah maten kowi amatni dow nacham kowng kown. Nami khin khe mih ta sing uowi miuüa dow ang chowtaih CHAKRAMANG pami natuk büah bowt kown.14Amatni cham uowi rah pren maten kowi Israeluüa kowi mih ang nakrawi ripah kown. Tawngphak pra kowh süngrüp süngkangma hownia mrawkphak pra kowh Ribla marow mowr pren mih dow mapaw lat dowi kowi akhaw aklaima ang nachangah kown. Nami khin khe dow ang chowtaih CHAKRAMANG pami natuk büah bowt kown,” pakhai.
The Seed Company