Ezekiel5
1CHAKRAMANG tek ang mih, “Aw maru chapa, kawmat mih en kowh saichow hown en nachangla sam khai müa kown, now en kowh sam hai mawmpawi mih en nakhaiah kown. Nami kung kowi dow set hown en nakhaiah hanow nami sam mih sum bak en nachangah kown.2Jerusalem marow pung en thawpah mih kowi kowh rumah mih ni chur khe dow nami sam sum bak kowi pabak mih marow lak kowi en natikah kown, pabak mih dow marow ria kowi tapat lut atown atownchow en nakrawi tawpah kown, now pabak mih dow li hown en narownah kown. Nami kung kowi maru-uüa kowi dow saidawng hown ang nakrawiah kown.3Tawkchedow sam mih en napawah ne hanow en tawnguat kowi en naduaah kown.4Nami kung kowi dow nami sam mih tawnguat hownia en nalaiah ne hanow maih kowi en natikah kown. Nami hownia dow Israel chenchapuüa maten tut-e maih mih nakrawi tauet kown,” pakhai.5Nami kung kowi CHAKRAMANG Thurai plan tek ang mih, “Mami pung dow Jerusalem kowh amatra chekhai. Jerusalem marow kowi dow akeng chenchapuüa takra kowi ang towah khai; aia riaret kowi dow akeng chenchapuüa pren tapat lut chekhai.6Nachenganchepaw aia dow aia ngak rakowi ang kowh ari aiang hai ang kowh ana pek chün dowi chekhai. Aia dow akeng pren hai akeng chenchapuüa lak-e kingküa hai lang sen ang khai. Aia dow ang kowh ari aiang nuata khai, ang kowh ana pek paw chün dowi chekhai.7“Naiawng rakowi ang CHAKRAMANG Thurai tek khowk, aw Jerusalem, en riaret kowi kowh pren maten lak-e paw en lang ngah khai. Ang kowh ana pek iawng en mang dowi, now ang kowh ari aiang paw en chün dowi chekhai. Nami klen kowi en riaret kowi kowh akeng chenchapuüa kowh ari aiang khowm padow en chün dowi chekhai.8Naiawng rakowi ang CHAKRAMANG, ang matia ngengche kingküa en kown, now akeng chenchapuüa pur kowi ang narip en kown.9Suiiai kaniaima mih lup maten en chang rakowi ang narip en kown; naiawng mih ripra dow nami dowi rawn khe katpaw ang chang dowi tak, nami kung kowi paw katpaw ang nachang kown nadowi bowt.10En maru-uüa dow lainowmma sakkrai hown nauowi kown. Naiawng rakowi upa-uüa dow amatni chauüa nga nacha kown, amatni kowh chauüa dow u-pa nga nacha kown. Aw Jerusalem, ang narip en kown, now en maru ta sing uowi miuüa kowi dow pren tali nui kowi ang nacham uetah kown.11En kowh asürlawkma mih arup maten hai suiiai kaniaima mih lup srui hown ang kowh chup kim dow en sürlawkah khai. Naiawng rakowi ang matia ngengche ang kowh sanara dow en hownia ang napawta kown. Ang CHAKRAMANG masing Thurai tek khowk, ang nasana en kown nadowi, ripra hownia mapaw ang nape powt en kown nadowi bowt.12En kowh maru sum bak kowi pabak mih dow makowng hawi hown nadowi now khown hown marow kowi nakowng kown, pabak mih maru dow tasenra kowi nacham kowng kown, now pabak mih maru kowi dow pren tali nui kowi ang nacham uetah hanow saidawng hown ang nakrawiah kown.13“Naiawng ang ki changta bowk kung kowi chiang mapaw ang sak-ih dowi mih dow nachur kown. Ang kowh kunmaraura maten amatni luk kowi ang ki sunta khü chiang ang kowh kunmaraura dow naprowng kown. Nami khin khe dow ang CHAKRAMANG amatni kowi khowrbownah mih kunmarau rakowi ang tek pe mih chekhai pami natuk büah kown.14“Aw Jerusalem, ang napiakta en kown. En ria iawng mang miuüa pur kowi dow tapiak khowk mih rah ang nachangla en kown, now chenchapuüa pungmadawng kowi dow rensi kau ang nachangla en kown.15Kunmarauma hai sak-hiama hown ang rip en mih khin khe dow en riaret kowi kowh chenchapuüa khi en hanow takrow kowh amawlawma naown kown. Amatni dow khi en hanow nasui en kown, now nachangla en rensi kau kown. Now amatni vüi dow tarip müa en nachowng kown. Ang CHAKRAMANG mami laiklow ang tek khowk.16Napiakta en kownkow khown kri ang nauang kuak en kown, now en kowh chakkham kramra tiama dow ang napitta en kown; nami khin khe mih leba sek hown kowh ap-ah mih iawng dow sakkrai hown en nakawm kown.17Khown hai langpranma mih kaurawng uaramchak dow ang nauang chin en kown. Naiawngün dow nakowngta en chauüa bowk kown. Makowng hawi hai tatu tasawtra en tut-e nauang ting kown, now ang nauang pawla en tasenra kown. Ang dow CHAKRAMANG chekhai. Mami laiklow dow ang tek khowk,” pakhai.
The Seed Company