Ezekiel4
1Thurai plan tek ang mih, “Aw maru chapa, kawmat mih cham paw ipbawn lowk diah, now nami ipbawn mih en pur kowi towah diah. Nami ipbawn luk kowi Jerusalem marow rup thawpah diah.2Nami ipbawn tavir lut ransu-uüa uang rum Jerusalem marow mih powm iawng thawpah diah. Nami marow kowi tap hownia dow ransu-uüa nowng kupla kown mih powm iawng marow tapat lut plu pe bawn diah. Now marow ria kowi dow marow tapat lut siphaiuüa tanungra thawpah diah. Nami klen kowi khuela tap kown mih uanh paw marow tapat lut towah diah.3Nami kung kowi cham paw pe lawngha pher lowk hanow en hown marow takra kowi tap iawng towah diah, now en kowh lumowr mih nami marow prakowi dangah diah. Naiawng hai marow dow umta lut khowk pami en natüngah kown. Nami dow Israel chenchap vüi amatra chekhai.4“Nami kung kowi dow lakuai prakowi rengkeng pah en namawk kown, now Israeluüa kowh angak ripra mih en kowi ang nape en kown. Rengkeng pah en mawk mih ni mowr dow amatni kowh ripra en nakur kown.5Amatni nakaah kown mih ripra dow paning paning kowi pani pani chi ang nape kur en kown. Naiawng rakowi sumkawmkla takukawm ni mowr Israeluüa kowh ripra dow en nakur kown.6“Nami chur hanow en naplan mawk iawk kown. Nami khin khe dow hawmlawm prakowi rengkeng pah en namawk lai kown, now Judauüa kowh angak ripra dow en nakur kown. Amatni naka ripra kown mih paning paning kowi pani pani chi ang pe kur en kown. Naiawng rakowi likawm ni mowr ang nape mawk en iawk kown.7Now rumta lut mih Jerusalem marow prakowi en nadang kown, now dowk takhüm kown khe kowh iawng lownta pe kowrmow bawng khükhü nami marow napiak kown mih lai en natek kown.8Now naiawng en chang mih ni chur dowi mowr dow mapra paipra en ia rengkengla dowi kownkow leng hown ang natawmta en hüah kown,” pakhai.9Now Thurai plan tek ang mih, “Püm, iakmow, daing, be nuk, prenbawng nuk hai chowtui mi ün dow pawah now puh aiukma mih kowi arasang towah diah, now thawpla kawmdi diah. Sumkawmkla takukawm ni rengkeng pah en mawk mih khin khe nami dow en nachaah kown.10Nami kawmdi dow ni towng apuachowchi khaiah hanow en nathawpla kawm kown, now nami kawm dow ni chut kowi en nau mih khin khe ditchowchi en nachaah kown.11Nami klen kowi tui paw akhuai kowi chüt ditchow ni towng lowra mih khin khe en nakhamah kown.12Iakmow hown kowh thawpah mih kawm iawng dow nami chakkham en nachaah kown. Maru pur kowi lusa maru kih keu hown kowh maih kowi nami kawm dow en naheuah kown.13Nami dow akeng pren kowi ang cham uetah mih khin khe asür alawkma mih chakkham Israeluüa nacham cha kown mih amatra chekhai,” padow CHAKRAMANG tek ang khai.14Nami khin khe ang tek pe mih, “Uh! CHAKRAMANG Thurai, sakrauma hown naiawng pat dow hauang pe chang ang diah. Tawng khe paw ang tasür talawk dowi tak. Asowmchow hownia kawmat mowr pat kowng mih hai kaurawng uaramchak hawmh makah mih tawng chap paw ang cha dowi tak. Asür alawkma mih chaknga tawng chap paw ang nawr kowi ang phang dowi tak,” pakhai.15Now aia tek ang mih, “Naiawng chekhai hanow lusa maru kih keu takcha chia kih keu hown kowh maih kowi en kowh kawm mih naheuah kownkow ang pe en alow khowk,” pakhai.16Nami kung kowi aia tek ang mih, “Aw maru chapa, Jerusalem marow kowh chakkham kramra dow ang napitta pe kown. Marow kowi kowh maru-uüa mih chakkham lawk dowi mih rakowi natuak krat kown. Naiawng rakowi amatni dow khaiah hanow nacha chakkham büah kown.17Chakkham hai tui mih lainowmma nakhawr büah kown. Amatni dow amawlawma natamüla mak büah kown, now amatni kowh angak rakowi amatni kowh chownglawng dow naura naurachow nachur kown,” pakhai.
The Seed Company