Ezekiel46
1“‘Ang CHAKRAMANG tek khowk, viadawng lak kowi kowh satlawt pra kowh tapplawt dow asapta kowi taruk ni mowr natabüng kown. Tawkche nami dow Tanai Ni hai lasi lakra ni khe naia uow kown.2Nami khin khe kruitown mih dow prang hownia tapplawt chur kowi kowh towklak iawng nauang kup kown, now aia dow tapplawt mawm re-e naiowng kown. Nakhowk khe uamowuüa dow aia kowh tikah mih uanap hai taking tasangra uanap nachang pe kown. Now aia dow nami tapplawt mowr kowi chupiiala Thurai kung kowi prang kowi nalawt iawk kown. Tapplawt dow satkup dowi mowr nata ho hüah kown.3Iawngpa mih maru-uüa dow Tanai Ni hai Lacher Pawi khe nami tapplawt uat kowi CHAKRAMANG kowi nachupiia kown.4Tanai Ni khe kruitown mih maru dow CHAKRAMANG vüi nachangla tikah mih uanap kownkow ruapur chah taruk pum hai ruapurla apum nauang pawla kown takla. Naiawngün dow aser auowk naia uowi kown nadowi.5Now ruapurla hown dow kawmdi uanap chang müa kawmdi lairiat set aia nathe kown takla, now ruapur chah hawmh hown paw kawmdi mih sak nau mowr aia nathe kown takla. Kawmdi lairiat set vüi kowi kanrawn sau sum set hown sum pua chi nathe kown takla.6Aia dow lasi lakra ni khe chiala powr apum, ruapur chah taruk pum hai ruapur papum nauang phuchua kown takla. Naiawngün dow aser auowk naia uowi kown nadowi.7Now chiala hown dow kawmdi lairiat set aia nathe kown takla, now ruapurla hown paw kawmdi lairiat set aia nathe kown takla. Now ruapur chah hown dow kawmdi mih sak nau mowr aia nathe kown takla. Kawmdi lairiat set vüi kanrawn sau tali set hown apua chi aia nathe kown takla.8Kruitown mih maru dow tapplawt chur kowi kowh towklak iawng alak kowi nauang kup kown takla, now nami tiama iawng aia nauang lawt iawk kown takla.9“‘Khowm bowkta mih pawi khin kowi nauang chupiia CHAKRAMANG kownkow prenchakuüa dow CHAKRAMANG pur kowi nauang kown. Nami khin khe tawngphak pra kowh tapplawt hownia uang kup miuüa dow mrawkphak pra kowh tapplawt iawng nalawt kown. Now mrawkphak pra kowh tapplawt hownia kowh uang kup miuüa dow tawngphak pra kowh tapplawt iawng nalawt kown. Uang kupla mih tiama hownia dow amiapaw nalawt kown nadowi. Tawkche uang kupla mih tapplawt hown kowh tatang mih paipra kowi kowh tapplawt iawng nalawt kown takla.10Kruitown mih maru dow alak kowi uang kup mih khin khe maru kawmuüa hown akrowksang nauang kup kown takla, now prang kowi lawt mih khin khe paw maru kawmuüa hown akrowksang nalawt kown takla.11“‘Pawi khin hai khowm bowkta mih takua talawm khin kowi chiala apum vüi kawmdi lairiat set, now ruapurla vüi kawmdi lairiat set aia nathe kown takla. Now ruapur chah vüi dow kawmdi mih sak nau mowr aia naia the kown. Kawmdi lairiat set vüi kowi kanrawn sau tali set hown apua chi aia nathe kown takla.12Kruitown mih maru che CHAKRAMANG vüi kowi kowmatia sak nau hown chang phuchua kown nau khai—nami dow tikah mih uanap pana lah, taking tasangra uanap pana lah—nami phuchua vüi kowi satlawt pra kowh tapplawt mih nauowta kown takla. Nami tikah mih uanap hai taking tasangra uanap dow Tanai Ni khe kowh iawng nasunah kown. Nami kung kowi prang kowi aia lawt khe dow tapplawt mih nabüngta kown.13“‘CHAKRAMANG vüi tikah mih uanap chang müa aser auowk uowi dowi mih paningchow mih ruapur chah rau towng apum chi pren kruitown mih nakram kown takla.14Nami klen kowi nami ruapur chah hown dow rau towng kawmdi uanap paw kruitown mih natowla kown takla. Nami kowi nauowi kown mih dow kawmdi sum set hai kawm ngai müa kanrawn sau aset hown apua chekhai. CHAKRAMANG vüi kowi nami kawmdi uanap pawi dow anikma mih ari aiang chekhai.15Naiawng hai rau towng tikah mih uanap chang müa ruapur chah, kawmdi hai kanrawn sau mih nahing apta hüah kown takla.16“‘Ang CHAKRAMANG tek khowk, kruitown mih maru che aia kowh krawng bawn hownia aia chapa kowi aia peah parah hanow nami dow aia kowh chapa hai aia kowh chuprek chaprekuüa naka powng kown.17Tawkche kruitown mih maru che aia kowh krawng bawn hownia aia kowh nar kowi peah krawng bawn parah hanow nami krawng bawn dow Jubili ning uang talen dowi mowr aia kowh nar naia towla kown. Nami kung kowi dow nami krawng bawn mih kruitown mih kowh naplan chowng iawk kown. Nami dow aia hai aia kowh chuprek chaprekuüa chowtaih anikma naka powng kown. Nami dow amatni kowh chowtaih naphaw kown.18Kruitown mih maru dow maru kowi krawi prüt hanow amatni kowh krawng bawn ia powng kown nadowi. Aia kowh chapauüa kowi dow aia kowh krawng bawn hownia chowtaih naia pe kown. Nahanow ang maru-uüa hownia dow amatni kowh krawng bawn iah amatni nachowng reng kown,’ pape diah,” pakhai.19Nami kung kowi dow nami maru mih tapplawt ria kowi kowh kupra iawng uamowuüa vüi khowm bowkta mih rum ün re-e pawla ang khai. Naiawngün rum dow tawngphak pra kowh tapplawt ria kowi chekhai, now naiawngün rum dang mih dow tawngphak pra chekhai. Aia dow satkup pra naiawngün rum chur kowi tüng ang arah lowk khai.20Aia tek ang mih, “Mami arah kowi dow uamowuüa mih aprek lawt lük müa phuchua ngar hai angak lawt lük müa phuchua ngar nabut kown, now kawmdi uanap chang müa uanh paw nakreng büah kown. Nahanow naiawngün chimsaima mih uanh dow prang kowi kowh viadawng kowi nauang pawla büah kown nadowi bowt. Tawngplawng kowchow panow naiawngün kak miuüa dow CHAKRAMANG vüi kowi nalang takra kown towbowt,” pakhai.21Nami kung kowi aia dow prang kowi kowh viadawng kowi uang pawla ang khai, now nami viadawng tali tingnui kowi krawi lenla ang khai. Now anui towng kowi dow aluk uowi dowi mih kim chalachow uowi lowk chi mih ang khi khai.22Nami chalachow mih viadawng kowi dow tap tapat lut chekhai. Nami viadawng dow aklang 40 muk, now adowng phia 30 muk chekhai. Nui towng kowi kowh nami viadawng dow anowk katsang chekhai.23Nami tali klüng mih viadawng kowi dow hua hown kowh tap tapat lut chekhai, now nami tap rinrin dow hawm eng kan engra tapat lut chekhai.24Aia tek ang mih, “Naiawngün dow hawm eng kan engra chekhai. Nami hawm eng kan engra kowi dow Thurai chup kim kowi kowh lup chang miuüa mih maru uang phuchuaah mih uanh nabutah kown,” pakhai.
The Seed Company