Ezekiel45
1“‘Israel krungchakuüa vüi pren kowi kowh süng tabak mih khin khe CHAKRAMANG vüi nabakla pe süng para kown takla. Nami süng klang dow akhai müa hown 25,000 muk hai aphia 20,000 muk naown kown. Nami pasüngma dow CHAKRAMANG vüi chimsaima naown kown.2Nami hownia aklang 500 muk hai aphia 500 muk mowr mih arah dow Thurai chup kim vüi natowah kown; nami riaret kowi dow akuangma mih arah nauowi 50 muk kown.3Nami chimsaima mih arah maten hownia aklang 25,000 muk hai aphia 10,000 muk mowr nalang towah para kown. Nami arah kowi dow Thurai chup kim lang chimsai mih rah nauowi kown.4Nami arah dow uamowuüa vüi chekhai; nami dow chimsaima chekhai. Uamowuüa mih Thurai chup kim hai CHAKRAMANG vüi nachang lup kownkow nakowi nauowi kown. Nami arah kowi chowtaih amatni kowh kim hai Thurai chup kim nauowi kown.5Now ta lat mih aklang 25,000 muk hai aphia 10,000 muk mowr mih arah dow Thurai chup kim kowi kowh lup chang mih Leviuüa kowh uowi rah naown kown. Nami arah dow Leviuüa kowh marow nachowng kown.6“‘Now nami chimsaima mih arah ria kowi aklang 25,000 muk hai aphia 5,000 muk mowr mih arah dow nachangla marow kownkow natowah kown. Nami marow kowi dow lowra mih Israeluüa nanowng uowi kown.7“‘Now chimsaima mih arah hai marow rihi satlawt pra hai satkup prakowi kowh krawng bawn dow pren kruitown miuüa vüi naown kown. Satkup pra kowh amatni kowh süng rihi dow Mediteranean Sata naown kown, now satlawt pra kowh amatni kowh süng dow satlawt pra kowh rihi mowr naown kown. Nami arah dow tawngphak hai mrawkphak pra kowh chimsaima mih arah hai marow tawngphak hai mrawkphak pra kowh rihi hown atengma naown kown.8Nami arah dow Israel pren kowi kowh kruitown miuüa vüi naown kown. Ang kowh kruitown miuüa mih ang kowh maru-uüa kowi nachangah nowng kown nadowi bowt. Amatni dow Israel chenchap kowi amatni kowh krungchak uowi iawng naret pe krawng bawn bowt kown.9“‘Aw Israel kowi kowh kruitown miuüa, ang CHAKRAMANG Thurai tek khowk, enni kowh angak chang na khowk tak. Kawmat dow kür hown krawi khün maru uanh mih hai krawi chang nowng mih lup towta büah hanow anowmma uowi hai chang lup iung büah bowt. Ang maru-uüa kowh krawng bawn nakrawi khün kown mih taingta büah bowt.10Enni mih set hai akeng mih uanh khai müa athikma mih tawngah büah bowt.11Akangma mih chap khai müa efa hai tui chap khai müa bat hown kowh uanh khai dow adik katsang naown kown. Efa lowk dik dow homer dik hamüt bak kowi pabak chekhai, now bat lowk dik paw homer dik hamüt bak kowi pabak dik chekhai. Nami pre chap mih uanh khai müa dow homer nowk iawng nanowkah kown.12Adik khai müa sekel lowk kowi dow pirmi gera chi naown kown, now mina lowk kowi dow 60 sekel naown kown.13“‘Uanh pek enni nape kown mih dow maiawng: Enni kowh püm maten hownia 60 bak kowi pabak, iakmow maten hownia 60 bak kowi pabak,14now kanrawn sau maten hownia 100 bak kowi pabak chekhai. Sau nowk dow bat hown nakhaiah kown takla.15Israel pren kowi kowh süng kowi taw mih rua hai ruapur hownia 200 pum kowi papum chi enni nape kown takla. Naiawngün dow maru-uüa kowh angak lawt lük müa kowi kawmdi uanap, tikah mih uanap hai taking tasangra uanap vüi natawngah kown.16Naiawngün awmrawm sung dow pren kowi kowh maru maten Israel kowi kowh kruitown mih kowi napeah kown.17Pren kruitown mih kowh kurdik dow pawi maten, Lacher pawi hai Tanai Ni vüi ün, Israel chenchap kowh amülüng mih pawi maten vüi tikah mih uanap, kawmdi uanap hai hüngah mih uanap chang müa uanh nakram kown mih chekhai. Aia dow Israel chenchap kowh angak nakhula pe kownkow angak lawt lük müa uanap, kawmdi uanap, tikah mih hai taking tasangra uanap chang müa uanh nakrawi kram kown.18“‘Ang CHAKRAMANG Thurai tek khowk, la uown kowi kowh ni uown kowi aser auowk uowi dowi mih chiala powrchow pawla papum hanow Thurai chup kim mih enni nachimsaiah kown.19Angak lawt lük müa uanap kowi kowh ngar vi dow uamow mih napawah ne hanow Thurai chup kim kowi kowh kimplawt mawm pre pra trui kowi, phuchuara aluk pra kowh anui tali nui kowi hai alak pra kowh viadawng kowi kowh tapplawt mawm pre pra trui kowi nakrawi plikah kown.20La uown kowi kowh ranit ni mih ni khe dow maiawng chang büa diah: Tawita mata hai tuk dowi kowh Thurai chup kim kowi kingküala mih lup ngak changta mih uowi khai hanow nami maru vüi lacher ranit ni mih ni khe nami angak lawt lük müa uanap pawi nachang pe kown. Naiawng hown angak khu müa pawi chang hanow Thurai chup kim mih enni nachimsaiah kown.21“‘La uown kowi kowh lacher laitali ni khe dow Takat Pawi enni nachang kown. Nami pawi dow ranit ni mowr enni nasunah kown; nami khin khe dow the pe tuah dowi mih kawm enni nacha kown takla.22Nami ni khe dow pren kruitown mih hownia prenchak maten vüi hai aiamat vüi kowi nachangla angak lawt lük müa uanap kownkow nape chiala apum kown.23Ranit ni mowr mih pawi kowi ni towng aia mih CHAKRAMANG vüi tikah mih uanap chang müa kowi aser auowk uowi dowi mih chiala ranit pum hai ruapurla ranit pum nape kown, now angak lawt lük müa uanap vüi pani kowi papum chi nape ruala kown.24Kawmdi uanap iawng hown aia mih chiala hai ruapurla papum vüi kowi kawmdi lairaiat set hai sau sum set hown sum pua chi nape kown takla.25“‘Now ranit la kowi kowh lacher laitanga ni khe dow ranit ni mih Te Pawi natarowng kown. Nakhowk khe paw Takat Pawi khe kowh iawng pren kruitown mih hownia angak lawt lük müa uanap, tikah mih uanap hai kawmdi uanap chang müa uanh nape kown, now sau paw nape kown.
The Seed Company