Ezekiel43
1Nami kung kowi dow nami maru mih satlawt pra kowh tapplawt kowi kowpawla ang khai.2Nakhowk khe satlawt hownia Israeluüa kowh Thurai kraingra uang ting mih ang khi khai. Aia kowh klow dow tui hawr klunglung mih tün iawng chekhai, now aia kowh kraingra hown lusa mih anowima uang phaw khai.3Nami mukmang khita hanow krawng kowi ang tabawk krawm khai. Nami mukmang kowi ang khi mih dow Thurai uang piak Jerusalem marow khe kowh iawng hai Kebar aw pang kowi kowh ang khi-ah mih mukmang iawng chekhai.4CHAKRAMANG kowh kraingra dow satlawt pra kowh tapplawt iawng uang kup hanow Thurai chup kim kowi kowkup khai.5Nakhowk khe CHAKRAMANG kowh lümla mih krowngla ang hanow alak kowi kowh viadawng kowi uang pawla ang khai. Nami khin khe CHAKRAMANG kowh kraingra dow Thurai chup kim kowi atekma chekhai.6Nakhowk khe nami maru dow ang ria kowi tawi iowng phülü khai, now Thurai chup kim hownia mia iawng mih chünchü klangah mih ang ta khai.7Aia tek ang mih, “Aw maru chapa, mami chowbowt ang kowh mang chowm rah hai ang kowh khawk towk rah. Mami re-e Israeluüa pungmadawng kowi chowngchowng saksakma ang natawi uowi kown. Israeluüa mih ang kowh ming chimsaima mih katpaw napiak ang kown nadowi bowt. Amatni hai amatni kowh manguüa chup arup mih hownia hai amatni kowh manguüa uak akroma mih phuchuara kowi pawla mih hownia nami ang kowh ming chimsaima mih dow nasürlawk ang kown nadowi bowt.8Manguüa dow ang kowh kim ria kowi amatni kowh kim thawpah khai. Amatni kowh kim hai ang kowh kim dow kimbang lowkchow towbowt taria. Amatni dow amatni kowh suiiai kaniaima mih lup hown ang kowh ming chimsaima mih piak ang büah khai. Naiawng rakowi ang kowh kunmaraura hown amatni kowi dow ang piakah khai.9Kawmat dow amatni kowh arup aren hai amatni kowh manguüa uak mih ang hownia pacham henta büah lah. Nahanow chowngchowng saksakma amatni pungmadawng kowi ang natawi uowi kown towbowt.10“Aw maru chapa, Israeluüa mih amatni kowh angak rakowi narukraila kownkow nami Thurai chup kim tawng iawng chow naown kown mih lawnguan kowi kowtek pe diah. Amatni changta mih lup rakowi narukraila büah kownkow Thurai chup kim chang krang natuakah büah kown mih tek pe diah. Amatni kowi dow Thurai chup kim chang krang, prang kowi kowh lawtra tiama hai alak kowi kowh kup müa tiama chang krang, ari aiang hai rirow ün tek pe diah. Nami achang krang iawng naia changla kownkow hai naiawngün rirow naia chünla kownkow naiawngün mih amatni pur kowi en ruiah diah.12“Thurai chup kim vüi lang pankri mih ari aiang dow Thurai chup kim uowi mih hungh tavir lut chimsaima naown kown takla. Thurai chup kim vüi kowi kowh ari aiang dow naiawng chekhai.13“Thurai chup kim kowi kowh phuchuara nowk dow maiawng: Phuchuara adak nowm nowm mih krowng kro dow pamuk chekhai, now nami krowng phia dow nami luk kowi kowh krowng lak-e lang chüt amuk chi khai. Nami adak krowng kowi dow bowkbowk prakowi auer akro pakar chi changah khai. Phuchuara kro dow maiawng naown kown:14Nami phuchuara dow adak kowi kowh achüng hownia aluk krowng prakowi akro pre muk chi chekhai, now aphia amuk chi chekhai. Nami luk kowi kowh krowng dow akro tali muk chi chekhai, now aphia amuk chi chekhai. Naiawngün maten luk kowi dow maih changra krowng akro tali muk, areng klang hai adowng phia laipre muk chi chekhai. Nami dow tali tingnui chekhai, now anui towng kowi dow anang uowi lowk chi chekhai.17Dawnglang kowi kowh krowng paw tali tingnui chekhai. Nami krowng dow areng klang hai adowng phia laitali muk chi chekhai. Nami krowng dow aluk krowng lak-e aphia lang chüt pamuk chekhai, now nami krowng luk kowi dow bowkbowk prakowi auer kro pakar chi khai. Now Phuchuara dawng dow satlawt prakowi chekhai,” pakhai.18Nami kung kowi dow aia tek ang mih, “Aw maru chapa, CHAKRAMANG Thurai tek mih, ‘Ki thawpta phuchuara kung kowi CHAKRAMANG vüi nachang phuchua kown. Nami ni dow phuchuara luk kowi tikah mih uanap pawi naia changla kownkow hai naia thetla vi kownkow mami rirow nachün kown takla.19Levi chenchap kowi kowh Zadawk krungchak uamowuüa dow nachang ang lup kownkow ang tut-e uang reng chekhai. Amatni kowi dow nachangla angak lawt lük müa uanap kownkow chiala powrchow en napeah apum kown.20Nami chiala vi mih en napawah sangrum hanow phuchuara nang tali klüng mih kowi, adawnglang kowi kowh tali tingnui mih kowi hai auer tapat lut mih kowi en nakrawi plikah kown. Naiawng hai angak khu müa uanap pawi chang pe hanow phuchuara mih en nachimsaiah kown.21Now angak lawt lük müa uanap vüi kowi kowh ngenah mih chiala dow Thurai chup kim uat kowi kowh amülüng mih arah kowi pawla hanow en natikah kown.22“‘Pre ni mih ni khe dow aser auowk uowi dowi mih ruala en nauang pawla apum kown, now uamowuüa mih angak lawt lük müa uanap pawi nachang kown. Nami pawi khe paw chiala vi hown phuchuara kowi chimsaiah iawng en nachimsaiah kown.23Phuchuara chimsaita kung kowi dow aser auowk uowi dowi mih chiala powrchow hai aser auowk uowi dowi mih ruapurla en nauang pawla hanow CHAKRAMANG pur kowi nauang towah kown. Now nami chiala hai ruapurla luk kowi uamowuüa naprui pe awisa hanow CHAKRAMANG vüi tikah mih uanap pawi nachangla kown.25“‘Naiawng hai ranit ni mowr ni towng angak lawt lük müa uanap vüi en nauang pawla ruala apum chi kown takla. Nami klen kowi aser auowk uowi dowi mih chiala powrchow hai ruapurla paw en nauang pawla apum chi kown takla.26Uamowuüa mih ranit ni mowr phuchuara ngak khu müa pawi nachang hanow nami dow nachimsaiah kown. Naiawng hai phuchuara dow CHAKRAMANG vüi naap-ah kown.27Naiawngün chur kung kowi dow raiat ni mih ni hownia uamowuüa mih nami phuchuara luk kowi enni kowh tikah mih uanap hai taking tasangra uanap pawi nachang kown. Nakhowk khe dow ang nasak-ih enni bowt kown. Ang CHAKRAMANG Thurai mami laiklow ang tek khowk,’ pakhai,” pah ang khai.
The Seed Company