Ezekiel42
1Nami kung kowi nami maru mih tawngphak pra kowh tapplawt hownia uat kowi kowh viadawng kowi pawla ang khai, now tawngphak pra kowh kim kowi kowpawla ang khai. Nami kim dow satkup pra kowh kim hown atawnchow chekhai.2Nami kim reng klang dow 100 muk chekhai, now adowng phia dow 50 muk chekhai. Nami kimplawt dang mih dow tawngphak prakowi chekhai.3 Nami kim pur kowi dow alak pra kowh viadawng uowi chekhai, now nami viadawng 20 muk mowr mih dow nami kim pur kowi chekhai. Nami kimkhung kowi dow uat kowi kowh viadawng uowi chekhai. Nami kim dow sum krowng chekhai, now akrowng towng kowi kowh towklak pur kowi dow tiama uowi bowk chekhai.4Nami kim dawnglang kowi kowh tiama dow auar hamüt muk, now aklang dow 100 muk chekhai. Nami kim kowi kowh towklak plawt dow tawngphak prakowi auowma kangowh chekhai.5Tawkche aluk krowng kowi kowh towklak dow asowmchow chekhai. Tawngplawng kowchow panow nami kimkrowng dow akeng mih kimkrowng iawng thawpla pe achüng dowi chekhai. Naiawng rakowi adak kowi kowh krowng lak-e aluk krowng dow aiui takla khai.7Uat kowi kowh viadawng pra khüa mih kimbang dow areng klang 50 muk chekhai, now kimbang ria kowi dow areng klang 50 muk mih tap uowi lowk chekhai. Tawkche alak kowi kowh viadawng pra khüa mih kimbang dow areng klang 100 muk chekhai. Uat kowi kowh viadawng hownia nami kim kowi nauang kupla kownkow nami kim satlawt prakowi aplawt uowi lowk chekhai.10Thurai chup kim mrawkphak prakowi paw nami iawng mih kim uowi lowk chekhai. Nami kim dow alak pra kowh viadawng akuangma mih re-e hai satkup pra kowh kim re-e chekhai.11Tawngphak pra kowh kim iawng nami kim kowi paw tiama uowi lowk chekhai. Nami kim paw areng klang, adowng phia, kupra tiama hai alak kowi kowh uowi mih maten tawngphak pra kowh kim iawng chekhai.12Nami kim kowi kupla mih plawt dow mrawkphak prakowi chekhai, now nami kim satlawt prakowi paw kupra plawt uowi lowk tak chekhai. Nami kim pur kowi paw tap uowi lowk chekhai.13Nami kung kowi aia tek ang mih, “Tawngphak hai mrawkphak pra kowh kim pre buk mih dow chimsaima chekhai. Tawngplawng kowchow panow naiawngün kim dow Thurai pur kowi kowkowi reng mih uamowuüa changla lang chimsai mih phuchua müa uanh chakra kim chekhai. Now nakowi dow lang chimsai mih uanap natowah kown: Kawmdi uanap, angak lawt lük müa uanap hai aprek lawt lük müa uanap nakowi natowah kown.14Thurai chup kim kowi chang lup khe kowh uamowuüa khupah mih tawnguat dow klüpta now nami kim pre buk mih kowi natowah kown. Nami kung kowi chiang amatni mih prang kowi kowh viadawng kowi naia lawt kown. Tawngplawng kowchow panow naiawngün tawnguat dow chimsaima chekhai. Naiawng rakowi iawngpa mih maru-uüa uowi rah kowi cham kowi mih khin khe amatni mih akeng tawnguat nakhupla kown takla,” pakhai.15Naiawng hown aia mih Thurai chup kim uowi mih arah maten krawi khaiah khai. Nami kung kowi dow aia mih satlawt pra kowh tapplawt iawng Thurai chup kim uowi mih arah hownia prang kowi pawla ang khai, now nakowi kowh uat kowi kowh tap aia krawi khaiah khai.16Aia dow akhai müa hown prang kowi kowh arah maten satlawt, satkup, tawngphak hai mrawkphak pra kowh tap krawi khaiah khai. Naiawngün tap dow bowkbowk prakowi 500 muk chi chekhai.20Chimsaima mih hai iawngpa mih uanh kowi nakraah kownkow bowkbowk prakowi aklang 500 muk mih tap uowi chekhai.
The Seed Company