Ezekiel3
1Nami kung kowi Thurai tek ang mih, “Aw maru chapa, en pur kowi kowh uowi mih cha diah; mami charam tua mih chata diah. Nami kung kowi dow Israeluüa tut-e kowkowiah hanow kowtek lai diah,” pakhai.2Nami khin khe ang ha nawr hanow aia dow nami charam tua mih sawk ang khai.3Nami kung kowi Thurai plan tek ang mih, “Aw maru chapa, mami ang pe en mih charam tua cha diah, en kowh mu pacham duh lah,” pakhai. Naiawng rakowi nami charam tua mih ang chata khai, now nami achak sowr dow ang nawr kowi kuai tui iawng dow adingma chekhai.4Nami kung kowi aia dow plan tek ang mih. “Aw maru chapa, kawmat Israeluüa tut-e kowkowiah now ang kowh laiklow kowkrawi tek diah.5En kowi dow en tukah dowi mih maru-uüa, lai akratma mih tut-e nadowi ang kowchin en, ang chin en mih dow Israeluüa tut-e chowtaih.6En tuktaah dowi mih hai en tuk tekah dowi mih lai akratma mih akeng chenchapuüa tut-e dow ang cham chin en dowi chekhai. Naiawng mih maru-uüa tut-e ang cham chin en panü dow en kowh laiklow nasünta büah ngengche kown.7Tawkchedow Israeluüa mih en laiklow nau sünta kown nadowi. Tawngplawng kowchow panow amatni dow ang laiklow nau sünta dowi chekhai. Nami auan dow Israel chenchap maten mih lai üa kürma hai kingküa dawma chekhai.8Tawkchedow en kowi paw amatni powm iawng saktuak akhawtma hai amiasiama ang nachang en kown.9En kowh sak dow maiak iawng akhawtma ang changta en khowk. Amatni dow kingküa hai sen mih chenchap chekhai. Nachenganchepaw hangkow kram diah, amatni kowi khi chepaw hangkow kram diah,” pakhai.10Thurai kutplan tek ang mih, “Aw maru chapa, ang nau tek en kown mih laiklow srui sak hown süntaah hanow sakdawng kowi towah diah.11Kawmat mih cham takhang mih en prenchakuüa tut-e kowkowi now kowtek lai diah. Amatni sünta lah, sünta dowi lah, amatni tut-e, ‘CHAKRAMANG tek mih maiawng,’ pahai kowtek pe diah,” pakhai.12Nami kung kowi Thurai Lümla dow towngla ang khai. Now ang kung prakowi lihowng mang tün iawng ang ta khai. Nami laiklow dow maiawng, “CHAKRAMANG uowi rah kowi dow aia kowh kraingra hai akiow pauowi lah,” pakhai.13Ang mih nami kaurawng uaramchak hawmh kowh lowkkowlowk alap tahik mih atün dow ang ta khai. Nami klen kowi amatni riaret kowi kowh lawngkua khawk taui mih dow atünma ang ta khai.14Thurai Lümla towngla ang mih khin khe lainowmma sak-hiah hai ang kunmarau khai. Nachenganchepaw CHAKRAMANG kür dow ang luk kowi uowi mih ang tatuk chekhai.15Now Kebar aw ria kowi kowh Tel-Abib kowi takhang miuüa tut-e ang kowkowi khai, now amatni uowi rah kowi amatni tut-e amawlawma hown ranit ni mowr ang tawi uowi khai.16Now ranit ni kung kowi dow CHAKRAMANG laiklow mih ang tut-e uang ting khai.17CHAKRAMANG tek ang mih, “Aw maru chapa, Israeluüa vüi kangchawng mih ang thawp en khowk. Naiawng rakowi ang hownia en ta laiklow hown krowksang nauowi kaneu kown mih Israeluüa kowi kowkrawi tek diah.18Maru ngak lowk ia kowi, ‘En nakowng ngengche kown,’ pahai ang tek pe mih khin nauowi kown. Nami khin khe aia kowh sak naplaila kownkow lup ngak hownia uang plan kown mih en tek pe dowi hanow nami maru ngak dow aia kowh angak rakowi nakowng kown. Tawkchedow nami kowng mih aprek dow en luk kowi ang natang en kown.19Tawkchedow nami maru kowi aia kowh angak hownia natarip kown mih en tek pe khowk chepaw nau tarip dowi, chang ngak rengreng hanow aia kowh angak rakowi aia dow nakowng kown. Tawkche en dow chün ang laiklow khai rakowi naplai kown.20“Maru iungma mih lowk ia che chang lup ngak khai hanow amatni kowh tiama kowi ang nakrawi hangah kown. Nachenganchepaw aia che lup ngak chang taingta dowi hanow aia dow nakowng kown. Aia kowi dow natarip kown en tek pe dowi hanow aia dow aia ngak rakowi nakowng kown. Now aia changah mih lup iung srui dow natuak pe kown nadowi; aia kowng mih aprek dow en luk kowi ang natang en kown.21Tawkchedow nachang lup ngak dowi kownkow nami maru iung kowi en hangah khai, now en hangah mih laiklow chün hai chang angak dowi hanow aia dow nasing ngengche kown, now en matia kowh sak paw naplai kown,” pakhai.22Nakowi dow CHAKRAMANG kowh kür akraingma mih ang luk kowi uang uowi khai. CHAKRAMANG tek ang mih, “Awr rü now lawngrawi kowi kowkowi diah, nakowi dow en hown ang nataklang kown,” pakhai.23Naiawng rakowi ang awr rü hanow lawngrawi kowi ang kowkowi khai. Kebar aw ria kowi kowh ang khi-ah mih CHAKRAMANG kraingra dow nakowi paw ang khi khai. Naiawng rakowi tabawk krawm se ang chupah khai.24Nami khin khe Thurai Lümla dow uangah now uang krüng ang khai. Now CHAKRAMANG tek ang mih, “En matia kim kowi kowkowi hanow büngta kim now alak kowi kowuowi phülü diah.25Aw maru chapa, leng hown maru natawmta en kown. Now prang kowi kowh maru-uüa tut-e en tawi ia kowi kown nadowi bowt.26Israeluüa dow kingküa hai sen mih chenchap chekhai. Naiawng rakowi ririmma en nauowila kownkow hai en ia pringhawila amatni dowi kownkow en kowh dai mih krang kowi ang nadanta en kown.27Tawkchedow en hown ang taklang mih khin khe en kowh nawr dow ang nauow en kown. Now amatni tut-e en natek pe kown mih, ‘Mami chowtaih CHAKRAMANG laiklow,’ napape kown. Amatni pungmadawng kowi sünta kown nau miuüa dow pacham sünta lah, now sünta kown nau dowi miuüa dow hang pacham sünta lah. Tawngplawng kowchow panow amatni dow kingküa dawma mih chenchap chekhai,” pakhai.
The Seed Company