Ezekiel36
1Akung kowi CHAKRAMANG tek ang mih, “Aw maru chapa, mami laiklow Israel kowh hungma mawngma kowi kowtek pe diah, now CHAKRAMANG kowh mami laiklow pe süntaah diah.2Israel lawnguan kowi amatni kowh ransu-uüa dow awmrawmma hown tek mih, ‘Khaleng dow alowngma mih arah prim a-i ka powngta khai bowt!’ pakhai.3Naiawng rakowi ang CHAKRAMANG Thurai tek khowk, akeng chenchapuüa napowngta enni kownkow hai maru prawngren müa enni nachowng kownkow enni riaret kowi kowh maru-uüa piak enni hai iawn enni mih chekhai.4Naiawng rakowi aw Israel kowh hungma mawngma, ang laiklow sünta büa diah. Aw aiukma mih hungh hai asowmchow mih hungh, rak hai lawngrawi maten ang laiklow sünta büa diah. Apiaknama hai akhaw aklaima mih arah maten ang laiklow sünta büa diah; enni kowh marow hownia dow ariaret kowi kowh chenchapuüa pawla enni uanh bowk khowk, now enni kowh marow dow ransu-uüa changla rensi kau khai bowt.5Ang CHAKRAMANG Thurai tek enni khowk, ang kunmaraura maih iawng lün pluplup towbowt kowh akeng chenchapuüa hai Edawmuüa maten kowi ang nakingküaah kown mih laiklow ang tek khowk. Tawngplawng kowchow panow amatni dow nasui enni kownkow hai napawta enni uanh bowk kownkow ang kowh pren mih powngta büah khai.6“Naiawng rakowi en mih pur prakowi tawng iawng chow Israel pren naphaw kown mih lawnguan krawi tek diah. Aia kowh aiukma mih hai asowmchow mih hungh, rak hai lawngrawi kowi maiawng kowtek pe diah: CHAKRAMANG thurai tek mih, ‘Ang kunmarau lai bowt kowh ang tek lai khai. Tawngplawng kowchow panow akeng chenchap tut-e enni ka rukrai khai.7Naiawng rakowi ang takham khowk, enni riaret kowi kowh chenchapuüa paw naka rukrai kown.8“‘Nachenganchepaw aw Israel kowh hungma mawngma, enni mih enni kowh singh mia kowi krawi pe prekah hanow ang kowh maru Israeluüa kowi ahuma nape uiah kown. Tawngplawng kowchow panow amatni mih alenma nauang plan bowt kown.9Ang natawi tangila enni hai enni prakowi ang nape ching bowt kown. Nahanow enni luk kowi mih nachang üa nachang laih hanow nasawt liu bowt kown.10Enni luk kowi mih Israel pachenma kowi maru iun ahuma ang nape prungah kown. Enni kowh marow kowi maru nauowi bowt kown, now apiaknama mih arah maten narawah kown.11Enni luk kowi maru hai tawncher ahuma ang nape prungah kown, now amatni dow naprung hanow aiun akawmma naphaw kown. Enni luk kowi mih alai kowh iawng maru kowi ang nape uowiah kown, now alai kowh lak-e lup lang chawn iawng ang nachang enni kown. Nakhowk khe dow ang chowtaih CHAKRAMANG pami enni natuk bowt kown.12Enni luk kowi ang kowh maru Israeluüa kowi ang nape mangah kown. Amatni dow napowngta enni kown, now enni dow amatni kowh nachowng kown. Enni mih Israeluüa kowh chauüa kowi sakkrai hown nape kowngah kown nadowi bowt.13“‘Aw Israel pren, en matia maru kowi en iawnah pahai maru tek en khai, now kowmatia chenchap kowi kowngta pe chauüa bowk pahai maru tek en khai.14Nachenganchepaw ang tek khowk, en matia maru kowi en nakrawi piak kown nadowi bowt, now en matia chenchap kowi en nakowngta pe chauüa kown nadowi bowt.15Chenchapuüa prawngren en mih ang nape ta en kown nadowi bowt, now chenchapuüa pe en mih rukrai paw ang nape kham en kown nadowi bowt. En rakowi en chenchapuüa natatheu kown nadowi bowt. Ang CHAKRAMANG mami laiklow ang tek khowk,’ pape diah,” pakhai.16Nami kung kowi CHAKRAMANG laiklow dow ang tut-e uang ting khai. Aia tek ang mih,17“Aw maru chapa, Israeluüa mih amatni pren kowi uowi khe amatni kowh chowm krang uowi krang hai amatni kowh alup ala hown pren mih sürlawkah khai. Amatni kowh chowm krang uowi krang dow ang mik kowi mih masiuüa uisawng uowi khe kowh asürlawkma mih iawng chekhai.18Naiawng rakowi amatni luk kowi mih ang kowh kunmaraura ang hüng pe khai. Tawngplawng kowchow panow amatni dow pren kowi mih sai maru khai, now amatni kowh arup aren hown pren mih sürlawkah büah khai.19Naiawng rakowi amatni kowi mih akeng pren hai akeng chenchapuüa tut-e ang krawi uetah khai. Amatni kowi dow amatni kowh chowm krang uowi krang hai alup ala iawng ang ripah khai.20Akeng pren kowi amatni cham taset plawt khe amatni dow ang kowh ming chimsaima mih sürlawk ang khai. Tawngplawng kowchow panow amatni lawnguan kowi maru tek mih, ‘Amatni dow CHAKRAMANG kowh maru chowdiah. Tawkche amatni dow CHAKRAMANG kowh pren hownia apowt takla khai,’ pakhai.21Ang kowh ming chimsaima mih natownla kownkow ang pela ching reng chowdiah. Tawkche Israeluüa mih amatni cham taset plawt mih prenchakuüa tut-e ang kowh ming mih cham sürlawkah khai.22Naiawng rakowi Israeluüa kowi kowtek pe diah. CHAKRAMANG tek mih, ‘Aw Israeluüa, enni rakowi ang nauang plan pawla enni kown mih nadowi. Tawkche ang kowh ming chimsaima mih rakowi ang nauang plan pawla enni kown mih chowtaih. Enni dow enni cham taset plawt mih prenchakuüa tut-e ang kowh ming chimsaima mih enni sürlawkah khai.23Chenchapuüa pungmadawng kowi ang kowh kraingma mih ming chimsaima mih dow enni sürlawkah khai. Naiawng rakowi ang kowh kri kraingma mih chimsaima mih dow chenchapuüa pur kowi ang natüngah kown. Amatni pur kowi nami ming chimsaira enni hownia ang tüng mih khin khe dow chenchapuüa mih ang chowtaih CHAKRAMANG pami natuk bowt kown.24“‘Chenchapuüa pungmadawng hownia ang nauang lawtla enni kown. Pren maten hownia ang nakua nalawm enni hanow enni matia pren kowi ang nauang plan pawla enni kown.25Enni luk kowi achimma mih tui ang nathet enni kown. Naiawng rakowi enni mih nachimsai bowt kown. Enni kowh asür alawi maten ang nasauta enni hanow arup aren kowi enni nachup kown nadowi bowt.26Enni lak kowi mih sak hai saktuak sar ang natow enni kown. Enni kowh akhawtma mih saktuak ang nahenta enni hanow adechow mih saktuak ang natow enni kown.27Enni lak kowi ang kowh lümla ang natow enni kown; nahanow ang kowh ari aiang maten enni nachün kown, now ang kowh ari aiang nachün kownkow enni nape ching bowt kown.28“‘Enni pipu-uüa kowi ang peah mih pren kowi enni nauowi kown. Nakowi dow enni mih ang kowh maru nachowng kown, now ang dow enni kowh Thurai nachowng kown.29Enni natasür talawk kown mih maten hownia ang nasawk nasau enni kown. Luprak ahuma ang nape enni kown, now enni pren kowi ang nauang chin enni khown kown nadowi bowt.30Khown kuak rakowi chenchapuüa tut-e enni naka rukrai dowi kownkow singh kowi kowh uih-ak hai luprak kowi ang nape huah kown.31Nakhowk khe mih enni kowh chowm krang uowi krang ngak hai lup ngak lawnguan kowi enni naka tuak kown. Now enni matia kowh angak hai suiiai kaniaima mih lup rakowi enni matia kowi enni natasui kown.32Tukah büah reng diah. Mami lup ang nachang kown mih dow enni rakowi nadowi chekhai. Aw Israel chenchap, enni kowh chowm krang uowi krang rakowi rukrai büa diah, now sak kowi arauma uowi büa diah.33“‘Ang CHAKRAMANG Thurai tek khowk, angak maten ang nasauta enni kown mih ni khe enni kowh marow kowi maru-uüa kowi ang nape uowiah kown. Now apiakma mih arah ün dow ang naplan thawpah iawk kown.34Maru cham mang cham kat khe kowh apiaknama khila mih pren kowi dow maru nachang üa chang laih iawk kown.35Nami kung kowi dow amatni natek kown mih, “Alai khe dow mami pren mih apiaknama chowdiah. Nachenganchepaw kawmat dow Eden bakan iawng towbowt. Aia kowh marow dow apiaknama, akhaw aklaima hai adi asekma takuak hüah chowdiah. Nachenganchepaw kawmat dow tap taum lut towbowt, now maru uowi rah phaw khai bowt,” napa kown.36Nakhowk khe dow enni riaret kowi kowh ta sing uowi mih chenchapuüa mih ang CHAKRAMANG chowtaih apiakma mih arah krawi plan thawp mih hai krawi plan chowk singh mih pami natuk kown. Ang CHAKRAMANG mami laiklow ang tek khowk; ang tekta iawng ang nachang ngengche kown,’ pape diah,” pakhai.37Nami kung kowi CHAKRAMANG tek ang mih, “Israeluüa uang lü uang leng mih nasünta kownkow ang kamrüt khowk. Amatni kowi ruapur hawmh iawng maru iun akawmma ang nachangah iawk kown mih ang kamrüt khowk.38Pawi khe Jerusalem marow kowi phuchua müa ruapur atekma chekhai. Nami powm iawng tapiak khowk mih Jerusalem marow kowi maru iun natek mup iawk kown. Nakhowk khe dow amatni mih ang chowtaih CHAKRAMANG pami natuk bowt kown,” pakhai.
The Seed Company