Ezekiel35
1Akung kowi CHAKRAMANG laiklow dow ang tut-e uang ting khai. Aia tek ang mih,2“Aw maru chapa, Edawm pren kowi kowh Seir hungh prakowi dangah hanow aia kowi ang kingküaah mih laiklow maiawng tek pe diah:3CHAKRAMANG Thurai tek mih, ‘Aw Seir hungh, ang nakingküa en kown; ang kowh rut ang naparah hanow akhaw aklaima ang natow en kown.4En kowh marow ün dow ang napiakta en kown. Nahanow en mih akhaw aklaima naphaw kown. Nakhowk khe dow ang chowtaih CHAKRAMANG pami en natuk bowt kown.5“‘Israel kowh ransu en chowng mih akrama khowk. Ang ripah kowh amatni kowh akhowng mih uowi dowi khe amatni kowi dow saidawng rut kowi en ap-ah khai.6Naiawng rakowi ang CHAKRAMANG Thurai, ang matia ming hown takham se ang tek khowk. En dow maru sak sai dawma rakowi nasai en kown miuüa rut kowi ang naap en kown. Kawmat dow en kowi nasai en kown mih khin chowbowt.7Seir hungh kowi mih akhaw aklaima hai apiaknama ang nachangah kown, now nakowi kowh kowmang kowkat miuüa maten kowi ang nakowngta kown.8En kowh hungma mawngma süng dow kowng miuüa kowh uak hown nataphum kown. Tasenra kowi kowh kowng mih en kowh maru-uüa uak dow chut kowi ün, lawngrawi kowi ün hai awchawng awlang kowi ün natakuakla pan kown.9En kowi dow chowngchowng saksakma vüi akhaw aklaima ang natow en kown. Nakowi dow miapaw naplan uowi kown nadowi bowt. Nakhowk khe dow ang chowtaih CHAKRAMANG pami en natuk bowt kown.10“‘Tawngplawng kowchow panow en tek mih, “Israel hai Juda pren dow anging kowh towbowt. Nami pren dow anging napowngta kown towbowt. Nakowi CHAKRAMANG uowi chepaw tawngpaw anging tuak dowi,” pakhai.11Naiawng rakowi ang CHAKRAMANG Thurai, ang matia ming hown takham se ang tek khowk. Amatni kowi en suiah kowh kunmaraura hai irsira en tüng pe iawng en kowi paw ang natüng en kown. Ang chet en tara mih khin khe amatni pungmadawng kowi ang natatüng kown.12Nami khin khe dow Israel kowh hungma mawngma kowi en peah rukrai mih laiklow maten ang CHAKRAMANG ta chekhai pami en natuk kown. “Israel pren dow apiaknama uowi khai. Nami pren dow naiawnta kownkow pe anging mih chowbowt,” padow en tek khai.13En dow bawrima hown kingküala ang mih laiklow ahuma en tek khai. Naiawngün en kowh laiklow dow ang ta bowk chekhai.14“‘CHAKRAMANG Thurai tek mih maiawng: Akhaw aklaima ang chang en khe dow palusama maru napiaw kown.15Israel chenchap powngah mih pren akhaw aklaima uowi mih en khi hanow en piaw khai. Nami powm iawng en kowi paw akhaw aklaima ang nachang en kown. Aw Seir hungh, en hai Edawm kowi kowh arah maten akhaw aklaima naphaw kown. Nakhowk khe dow ang chowtaih CHAKRAMANG pami en natuk bowt kown,’ pape diah,” pakhai
The Seed Company