Ezekiel37
1Akat khe CHAKRAMANG kowh kür mih ang luk kowi uang uowi khai, now aia mih aia kowh lümla hown pawla ang hanow lawngrawi dawnglang kowi kowtow ang khai. Nami arah kowi dow hut tapung hüah khai.2Now aia mih nami lawngrawi kowi krawi lenla ang khai. Nakhowk khe nami lawngrawi kowi mih hut ahuma ang khi khai; naiawngün hut dow akang khawngma kangowh chekhai.3Nakhowk khe aia lünta ang mih, “Aw maru chapa, naiawngün hut awr ia sing kown bow?” pakhai. Now ang klangah mih, “Aw CHAKRAMANG Thurai, nami dow en chowtaih tuk,” pape khai.4Nakhowk khe aia mih naiawngün hut tut-e maiawng pe tek ang lai khai, “Akangma mih hut maten ow, enni mih CHAKRAMANG kowh laiklow sünta diah.5CHAKRAMANG tek mih, ‘Ang nachua enni kawli kown, now enni mih nasing iawk kown.6Enni luk kowi nga ang nape uowiah kown, now naiawngün kowi mih pik hown ang nabawmta enni lut kown. Nami kung kowi dow ang nachua enni kawli kown, now enni mih nasing kown. Nakhowk khe dow ang chowtaih CHAKRAMANG pami enni natuk bowt kown,’ pape diah,” pakhai.7Now CHAKRAMANG pe tek ang iawng rowprowp ang krawi tek khai. Naiawng ang krawi tek mih khin khe takhingla khawk mih atün ang ta khai, now naiawngün hut mih chowlowkkow hut hown tachawk bowk khai.8Naiawngün hut luk kowi dow nga krawi tachai khai, now naiawngün nga luk kowi dow pik krawi tachai bowk khai. Nachenganchepaw naiawngün tut-e kawli uowi dowi chekhai.9Nakhowk khe CHAKRAMANG tek ang mih, “Aw maru chapa, li tut-e mami laiklow krawi tek diah: CHAKRAMANG tek mih, ‘Li ow, maiawngün uak naia singla kownkow uangah hanow uang krawi chua pe kawli diah,’ pape diah,” pakhai.10Naiawng rakowi aia tek ang iawng ang krawi tek khai, now naiawngün uak kowi kawli krawi kup khai. Amatni dow awr sing hanow khawk hown awr iowng khai. Amatni dow siphai hawmh akawmma mih iawng chekhai.11Nami kung kowi dow aia tek ang mih, “Aw maru chapa, Israeluüa dow maiawngün hut iawng chekhai. Amatni dow tek mih, ‘Anging lawngtang kowh hut ün keu khai bowt; anging kowh sakowmra paw uowi dowi bowt. Anging chenchap dow chur mih chowbowt,’ pakhai.12Naiawng rakowi amatni tut-e mami laiklow kowtek pe diah, ‘Aw maru-uüa, enni kowh tadupra kuam ang nathaiah hanow nami hownia ang nalau enni kown, now akung kowi Israel pren kowi ang nauang plan pawla enni kown.13Tadupra kuam hownia ang lawtla enni mih khin khe dow ang chowtaih CHAKRAMANG pami enni natuk bowt kown.14Ang kowh lümla mih enni lak kowi ang natow enni kown, now enni mih nasing kown. Enni matia pren kowi ang nape uowi enni kown. Nakhowk khe dow ang CHAKRAMANG mih tekta iawng chang reng pami enni natuk bowt kown,’ pape diah,” pakhai.15Akung kowi CHAKRAMANG laiklow dow ang tut-e uang ting khai. Aia tek ang mih,16“Aw maru chapa, cham paw müa lowk hanow nami müa kowi, ‘Juda vüi hai Juda hown kowh tatawm mih chenchapuüa vüi,’ pahai ruiah diah. Nami kung kowi cham plan paw müa lowk hanow nami müa kowi, ‘Efraim vüi hai Israel tawngphak pra kowh chenchapuüa vüi,’ pahai ruiah diah.17Akung kowi nami müa pre buk mih en rut kowi müa lowkchow iawng nachowng kownkow chawkah hanow dowkah diah.18Now en chenchapuüa nalünta en kown mih, ‘Nami auan tawng chow,’ napa kown.19Nakhowk khe en natek pe kown mih maiawng: CHAKRAMANG Thurai tek mih, ‘Efraim hai tawngphak pra kowh krungchakuüa kowi ang napawah hanow Juda hown ang nabawngah kown. Müa pre buk mih hownia müa lowkchow ang nachangah kown,’ pape diah.20“Now en rui pe laiklow mih müa pre buk mih amatni pur kowi dowkah hanow maiawng en natek pe kown: CHAKRAMANG Thurai tek mih, ‘Akeng chenchap hownia Israeluüa kowi ang nauang lawtla kown. Amatni kowi dow pren tali nui hownia ang nakrawi kuaah hanow amatni kowh pren kowi ang nauang pawla kown.22Israel kowi kowh hungma mawngma luk kowi amatni hown pren lowkchow ang nachangah kown. Amatni bowkbowk luk kowi mang lowk iachow taih nauowi kown, now amatni mih katpaw pre bak nauowi kown nadowi bowt.23Amatni kowh asürlawkma mih arup aren hai angak hown amatni mih katpaw natasür talawk kown nadowi bowt. Angak maten hai piakra tiama pra mang mih hownia amatni kowi ang nahenah kown, now ang nachimsaiah kown. Nami kung kowi dow amatni mih ang kowh maru nachowng bowt kown, now ang dow amatni kowh Thurai nachowng bowt kown.24“‘Ang kowh nar David mih amatni kowh mang nachowng kown, now amatni bowkbowk kowh athing mih lowk iachow nauowi kown. Amatni dow ang kowh ari aiang iawng nauowi kown, now ang kowh rirow maten kaneuma nachünah büah kown.25Ang kowh nar Jakawb kowi ang peah mih pren kowi, amatni kowh pipu-uüa uowila mih pren kowi amatni nauowi kown. Amatni, amatni kowh chauüa hai amatni kowh chu cheuüa nakowi mih chowngchowng saksakma nauowi kown, now ang kowh nar David mih chowngchowng saksakma amatni kowh mang nachowng kown.26Amatni vüi taking tasangra sangbowk laitawm ang natow pe lowk kown; nami dow chowngchowng saksakma mih sangbowk laitawm nachowng kown. Amatni kowi dow amatni kowh pren ang napeah kown, now amatni kowi ang nape prungah kown. Ang kowh kim mih chowngchowng saksakma vüi amatni pungmadawng kowi ang natowah kown.27Ang kowh uowi rah mih amatni pungmadawng kowi nachowng kown; ang dow amatni kowh Thurai nachowng kown, now amatni dow ang kowh maru nachowng kown.28Ang kowh kim chowngchowng saksakma vüi amatni pungmadawng kowi chowng khe dow ang CHAKRAMANG mih Israeluüa kowi ang matia vüi ang lang kraah mih pami chenchap maten natuk bowt kown,’ pape diah,” pakhai.
The Seed Company