Ezekiel30
1CHAKRAMANG laiklow dow ang tut-e uang plan ting khai iawk. Aia tek ang mih,2“Aw maru chapa, Aigupta prenchakuüa kowi maiawng kowtek pe diah: CHAKRAMANG tek mih,“‘Nami kramra uowima mih ni vüi kowi taprüa tanguk büa diah.3Tawngplawng kowchow panow kramra uowima mih ni dow uang tawn khowk,CHAKRAMANG kowh ni dow uang tawn khowk.Nami ni dow uangnim kangowh naown kown.Nami dow chenchapuüa piakra ni naown kown.4Ransu siphaiuüa dow uang sen Aigupta prenchakuüa kownkow saidawng dowkma nauang kown,now Ethiawpia chenchapuüa luk kowi dow kawm kratra nauang ting kown.Nakhowk khe Aigupta prenchakuüa dow tasenra kowi nakowng kown;nahanow amatni kowh dawngthawnguan maten dow ransu-uüa napawla pe bowk kown,now nakowi kowh arah maten dow napiak bowk kown.5“‘Nami tasenra kowi dow Ethiawpia, Lidia, Libia, Put, Arab chenchap maten hai aia kowh auiua hawmh maten mih amatni hown natawi kowng kown.6“‘Aiguptauüa kowi tawi khowngah miuüa dow napiak kown,now Aiguptauüa changla bawri mih kür paw nakhowk kown.Tawngphak prakowi kowh Midawl marow hownia Sene marow mowr kowi kowh uowi miuüa dow nakowng kown,naiawngün maru kawmuüa dow ransu-uüa kowh saidawng kowi nakowng kown.Ang CHAKRAMANG mami laiklow ang tek khowk.7Aigupta pren dow piak mih pren pungmadawng kowi kowh lang piak mih pren naown kown,now amatni kowh marow dow akeng mih piak mih marow pungmadawng kowi natawi uowi kown.8Aigupta pren dow maih hown ang natowkta kown,now aia kowi uang tawi khowngah miuüa kowi paw ang napiakah kown.Nakhowk khe dow ang chowtaih CHAKRAMANG pami natuk büah bowt kown.9“‘Nami khin khe Ethiawpia chenchapuüa kowi natüng pe kram kownkow ang kowh satang phowng miuüa dow chawnlawng hown nakowtarü kown. Ethiawpiauüa dow amatni thaulangma pahai naka tuak büah kown. Tawkche Aiguptauüa kowi ang ripah mih khin khe dow amatni mih nakram kown. Sünta nami dow nauang ting ngengche kown.10“‘Ang CHAKRAMANG mami laiklow ang tek khowk.Aigupta pren kowi kowh dawngthawnguan dow Nebuknezar kowi ang nape pawah kown,now nami pren mih aia kowi ang nape piakah kown.11Nebuknezar hai sanara lang uowi dowi nowm nowm mih siphai hawmh dow uang piak Aigupta pren kownkow nauang kown;amatni dow Aigupta pren kowi uang senah hanow pren kowi maru uak hown atekma nachangah kown.12Nail aw tui dow ang nakangta kown,now maru ngakuüa rut kowi nami pren mih ang nasumta pe kown.Aigupta pren hai nakowi kowh uowi mih kowi dow prenlang maru-uüa kowi ang nape piakah kown;ang CHAKRAMANG mami laiklow ang tek khowk.13“‘Aigupta pren kowi kowh arup aren dow ang napiakta kown,now Memfis marow kowi kowh arup paw ang napiakta kown.Nakowi dow kruitown mih nata lat kown nadowi bowt,now paprenma kowi kowh uowi miuüa tut-e kramra kangowh ang nachang pe kown.14Aigupta pren mrawkphak pra kowh süng dow apiaknama mih krawng iawng ang natowta hüah kown;Aigupta pren tawngphak pra kowh Zoan marow kowi dow ang natowkah kown,now Aigupta pren tawngphak pra kowh Tebes marow kri kowi dow ang napiakah kown.15Aigupta pren kowi kowh akhawtma mih kangchawngra kim uowi mih Pelusium marow dow akhawtma chekhai;nami marow luk kowi dow ang kowh kunmaraura mih ang nauang iu khük pe kown,now Tebes marow kowi kowh asung khakma mih uanh maten dow ang napiakta pe kown.16Aigupta pren kowi dow ang natowkah kown,now Pelusium marowchakuüa dow nakawm nakrat kown.Tebes marow luk kowi dow phih nauang ting kown,now Memfis marow dow takrow takrai hown atungma nauowi kown.17Heliawpawlis marow hai Bebastis marow kowi kowh klanguüa hawmh dow tasenra kowi nakowng kown,now akeng mih maru-uüa dow Babulawn kowi nacham takhang kown.18Aiguptauüa changla bawri mih kürra ang napiakta pe kown;nami khin khe Tapanhes marow vüi dow aiiuma mih ni naown kown.Nami aiiu dow Tapanhes marow kowi nauang takhu kown,now aia maru-uüa dow Babulawn pren kowi nacham takhang kown.19Naiawng hai Aigupta pren kowi dow ang naripah kown,now amatni dow ang chowtaih CHAKRAMANG pami natuk büah bowt kown,’ pape diah,” pakhai.20Anging cham takhang mih lailowk ning kowi kowh lacher ranit ni khe CHAKRAMANG laiklow dow ang tut-e uang ting khai. Aia tek ang mih,21“Aw maru chapa, Aigupta pren mang Faraw kowh rut dow ang klowkta pe khowk. Aia kowh rut dow naiung kownkow amiapaw bawm pe uan dowi chekhai. Naiawng rakowi aia dow nadowkla saidawng kown mih kür ka dowi chekhai.22Ang CHAKRAMANG mami laiklow ang tek khowk. Ang dow Aigupta pren mang Faraw kowh ransu chekhai. Aia kowh aklowkma mih bawng hai aiungma mih bawng dow pre buk trui ang naklowkta pe kown. Aia kowh rut hownia dow saidawng mih ang nakuakta pe kown.23Aiguptauüa kowi dow akeng chenchap hai prenchakuüa pungmadawng kowi ang nasetta plawt kown.24Babulawn pren mang kowh bawng mih akürma ang nachang pe kown, now aia rut kowi dow ang naap pe saidawng kown. Tawkche Faraw kowh rut dow ang naklowkta pe kown. Nahanow Babulawn pren mang pur kowi Faraw dow natasai katlat hanow nakowng kown.25Babulawn pren mang rut kowi dow ang napeah kür kown. Tawkche Faraw kowh rut dow kür akhawma ang nachang pe kown. Babulawn pren mang kowi dow ang kowh saidawng ang napeah kown. Nami saidawng dow Aiguptauüa kowi nakingküala kown mih vüi aia natawngah kown. Nakhowk khe lusa maru kawmuüa dow ang chowtaih CHAKRAMANG pami natuk büah bowt kown.26Aiguptauüa kowi dow akeng chenchapuüa hai prenchakuüa pungmadawng kowi ang nacham setta plawt kown. Nakhowk khe amatni dow ang chowtaih CHAKRAMANG pami natuk büah bowt kown,” pakhai.
The Seed Company