Ezekiel29
1Babulawn pren kowi anging takhang mih hamüt ning kowi kowh lacher hamüt la khe kowh laipre ni khe CHAKRAMANG laiklow dow ang tut-e uang ting khai. Aia tek ang mih,2“Aw maru chapa, Aigupta pren mang Faraw prakowi haidang hanow aia hai aia maru maten vüi kowi maiawng phuang diah:3CHAKRAMANG tek mih,“‘Aw Aigupta pren mang Faraw, ang mih en kowh ransu chekhai,en dow en matia aw kowi kowh uowi mih aiukma mih rua mang chekhai.En tek mih, “Nail aw dow ang kowh chekhai,now nami aw dow ang vüi kowi kowh ang thawpah mih chekhai,” pakhai.4Tawkche en kowh awm kowi dow kuai hown ang nauowk en hanow dam iawng ang nadowk en kown,nahanow aw hownia süng kowi ang nauang küngla en kown.Nami khin khe asowmchow mih dam hawmh dow en kowh alip kowi nauang tawi tadan kown.5Ang dow en kowi mih süngrüp süngkangma kowi ang nakuakta en hüah kown,now en kowh aw kowi kowh uowi mih dam hawmh kowi paw süngrüp süngkangma kowi ang nakuakta enni hüah kown.Nahanow en dow dowm kowi natakuak hüah kown,en kowi dow amiapaw nadup en kown nadowi.Tawngplawng kowchow panow en kowi dow ang nachangla en chakkham kown,en kowi dow krawng kowi kowh kaurawng uaramchak hawmh hai kuang kowi kowh uakling uaber hawmh chakkham ang nachangla en kown.6“‘Nahanow Aigupta pren kowi uowi miuüa dow ang chowtaih CHAKRAMANG pami natuk büah bowt kown. Israeluüa dow naka khowng kownkow Aiguptauüa luk kowi cham owmsak khai. Tawkche Aigupta dow uaklung kawng iawng kür uowi dowi chekhai.7Amatni rut hown dowk en mih khin khe en dow taphuk khai, now amatni kowh pangkawt dow ka ngarau khai. En luk kowi amatni tane mih khin khe en taphuk khai, now amatni kowh kumlawng dow en merta pe khai.8Naiawng rakowi ang CHAKRAMANG mami laiklow ang tek khowk: Ang nasen en kownkow en kowh ransu-uüa kowi ang nauang chin en kown, now en kowh maru-uüa hai tawncher kowi mih ang nakowngta en kown.9Aigupta pren dow apiaknama panow akhaw aklaima naphaw kown. Nami khin khe Aigupta prenchakuüa dow ang chowtaih CHAKRAMANG pami natuk büah bowt kown. En dow chang bawri se tek mih, “Nail aw dow ang kowh chekhai. Nami aw dow ang vüi kowi kowh ang thawpah mih chekhai,” pakhai.10Naiawng rakowi ang dow en hai en kowh aw kowh ransu chekhai. Ang dow Aigupta pren kowi kowh tawngphak prakowi kowh Migdawl marow hownia mrawkphak prakowi Sene marow mowr apiaknama panow akhaw aklaima ang nachangah kown. Sene marow dow Ethiawpiauüa kowh sünghi chekhai.11Aigupta pren iawng dow 40 ning mowr mih maru hai asadua namang kown nadowi, now nakowi dow amiapaw nauowi kown nadowi.12Aigupta pren dow piak mih pren pungmadawng kowi kowh lang piak mih pren ang nachangah kown. Amatni kowh marow dow apiaknama nauowi kown, now 40 ning mowr akhaw aklaima nauowi kown. Aigupta prenchakuüa kowi dow akeng pren kowi ang nacham setta plawt kown.13“‘Nachenganchepaw ang CHAKRAMANG mami laiklow ang tek khowk. 40 ning kung kowi dow akeng pren kowi ang cham setta plawt mih Aiguptauüa kowi ang nakua nalawmah kown.14Amatni kowi dow alai khe kowh iawng ang naiungah iawk kown, now Aigupta pren mrawkphak pra kowh amatni pipu-uüa kowh pren kowi ang napawla kown. Tawkche amatni kowh pren dow nakowi nakür kown nadowi.15Amatni dow chenchap maten lak-e kowh kür lang khaw mih chenchap nachowng kown, now akeng chenchapuüa luk kowi katpaw naia chang alow kown nadowi bowt. Now nami pren kowi dow akeng chenchap luk kowi katpaw ia kruitown dowi bowt mih iawng auaklakma ang nachangah kown.16Nahanow Israeluüa dow Aigupta prenchakuüa luk kowi katpaw naowmsak kown nadowi bowt. Aigupta pren prakowi tang mü hanow Aigupta pren luk kowi amatni owmsak mih dow angak pami naka tuak büah kown. Nakhowk khe amatni dow Ang chowtaih CHAKRAMANG pami natuk büah bowt kown,’ pape diah,” pakhai.17Babulawn pren kowi anging cham takhang mih 27 ning kowi kowh lacher pani mih khin khe CHAKRAMANG laiklow dow ang tut-e uang ting khai. Aia tek ang mih,18“Aw maru chapa, Babulawn pren mang Nebuknezar dow Tura marow mih kowsen khai. Nakhowk khe aia kowh siphaiuüa kowi dow adikma mih uanh pe kurla khai. Naiawng rakowi aia siphaiuüa kowh sam dow tachawi khai, now pangkawt paw tanir khai. Tawkche aia hai aia kowh siphaiuüa kowsenah mih Tura marow dow kownowng powng büah dowi chekhai.19Naiawng rakowi Aigupta pren mih Babulawn pren mang kowi ang napeah kown. Now Aigupta pren kowi kowh asung khakma mih uanh dow aia napawta hanow aia kowh siphaiuüa kowi mih sukkri kha iawng Nebuknezar napeah kown.20Nebuknezar kowi dow aia kowh kawm sung iawng Aigupta pren ang peah khai. Tawngplawng kowchow panow aia hai aia kowh siphai hawmh dow ang kowh lup chang mih chekhai. Ang CHAKRAMANG mami laiklow ang tek khowk.21“Aigupta pren kowi Nebuknezar nowngta mih kung kowi dow Israel chenchap kowi mih akürma ang nachangah kown, now Ezekiel, en kowh laiklow kowi mih Israeluüa naringkaw bowt kown. Nakhowk khe amatni dow ang chowtaih CHAKRAMANG pami natuk büah bowt kown,” pakhai.
The Seed Company